Dikgosi wa Bobedi
22 Josia+ o ne a na le dingwaga di le robedi fa a nna kgosi, mme o ne a busa dingwaga di le 31 mo Jerusalema.+ Leina la ga mmaagwe e ne e le Jedida morwadia Adaia yo o tswang kwa Bosekathe.+ 2 O ne a dira se se siameng mo matlhong a ga Jehofa e bile o ne a tsamaya mo ditseleng tsotlhe tsa ga Dafide rraagwemogolo,+ mme ga a ka a tsaya tsela e e phoso.
3 Mo ngwageng wa bo18 wa ga Kgosi Josia, kgosi e ne ya roma mokwaledi e bong Shafane, morwa Asalia morwa Meshulame, kwa ntlong ya ga Jehofa,+ a re: 4 “Ya kwa go Hilekia+ moperesiti yo mogolo, mme o mmolelele gore a phuthe madi otlhe a a tlisiwang mo ntlong ya ga Jehofa,+ a balebedi ba dikgoro ba a phuthileng mo bathong.+ 5 A madi ao a newe ba ba tlhomilweng go okamela tiro e e dirwang mo ntlong ya ga Jehofa, mme bone ba tla a naya badiri ba ba berekang mo ntlong ya ga Jehofa gore ba baakanye ntlo mo e senyegileng* teng,+ 6 ba a neye badiri ba ba ditswerere, baagi le ba ba agang ka leje; mme ba a dirisetse go reka dikota le maje a a segilweng gore ba baakanye ntlo.+ 7 Le fa go ntse jalo, ga ba tlhoke go ntsha pego ya kafa ba dirisitseng madi ka teng ka gonne ba a ikanyega.”+
8 Moragonyana Hilekia moperesiti yo mogolo o ne a raya mokwaledi e bong Shafane+ a re: “Ke bone buka ya Molao+ mo ntlong ya ga Jehofa.” Ka jalo, Hilekia o ne a naya Shafane buka eo, mme o ne a simolola go e bala.+ 9 Go tswa foo, mokwaledi e bong Shafane o ne a ya kwa kgosing a bo a mo raya a re: “Batlhanka ba gago ba ntshitse madi a a fitlhetsweng mo ntlong, mme ba a neile batho ba ba tlhomilweng go okamela tiro e e dirwang mo ntlong ya ga Jehofa.”+ 10 Gape mokwaledi e bong Shafane o ne a raya kgosi a re: “Go na le buka+ e moperesiti Hilekia a e nneileng.” Foo Shafane o ne a simolola go e bala fa pele ga kgosi.
11 Fela fa kgosi e utlwa mafoko a buka eo ya Molao, e ne ya gagoganya diaparo tsa yone.+ 12 Go tswa foo, kgosi e ne ya naya moperesiti Hilekia, Ahikame+ morwa Shafane, Akabore morwa Mikaia, Shafane mokwaledi le Asaia motlhanka wa kgosi taelo eno: 13 “Tsamayang, lo ye go botsa Jehofa ka nna le ka batho ba ba setseng mo Iseraele le mo Juda gore mafoko a buka e e bonweng a re ama jang; ka gonne bogale jwa ga Jehofa jo bo re tukelang bo bogolo,+ ka gonne borraaronamogolo ga ba a ikobela mafoko a buka eno e bile ga ba a boloka sotlhe se re se kwaletsweng.”
14 Ka jalo, moperesiti Hilekia, Ahikame, Akabore, Shafane le Asaia ba ne ba ya kwa go moporofeti Huleda.+ E ne e le mosadi wa ga Shalume morwa Tikefa morwa Harahase, motlhokomedi wa phaposi ya diaparo, mme o ne a nna mo Karolong ya Bobedi ya Jerusalema; mme ba ne ba bua le ene teng koo.+ 15 O ne a ba raya a re: “Seno ke se Jehofa, Modimo wa Iseraele a se buang, ‘Bolelelang monna yo o lo romileng kwa go nna lo re: 16 “Seno ke se Jehofa a se buang, ‘Ke tla tlisa masetlapelo mo lefelong leno le mo banning ba lone. Mafoko otlhe a a mo bukeng e kgosi ya Juda e e badileng a tla diragadiwa.+ 17 E re ka ba ntlogetse mme ba ntshetsa medimo e mengwe ditlhabelo+ gore ba nkgopise ka tiro yotlhe ya diatla tsa bone,+ bogale jwa me bo tla tukela lefelo leno mme ga bo kitla bo timiwa.’”+ 18 Le fa go ntse jalo, lo reye kgosi ya Juda e e lo romileng go tla go botsa Jehofa, lo re, “Seno ke se Jehofa, Modimo wa Iseraele a se buang: ‘Ka ga mafoko a o a utlwileng, 19 e re ka pelo ya gago e ile ya reetsa* mme wa ikokobetsa+ fa pele ga ga Jehofa fa o ne o utlwa se ke se buileng ka lefelo leno le banni ba lone, gore ba tla nna selo se se tshosang le phutso, mme o ile wa gagoganya diaparo tsa gago+ wa bo wa lela fa pele ga me, le nna ke go utlwile, go bua Jehofa. 20 Ke gone ka moo o tla swang jaaka borragomogolo,* mme o tla fitlhwa mo lebitleng la gago ka kagiso, mme ga o kitla o bona masetlapelo otlhe a ke tla a tlisetsang lefelo leno.’”’” Foo ba ne ba tlisetsa kgosi karabo.