Samuele wa Bobedi

12 Ka jalo, Jehofa o ne a romela Nathane+ kwa go Dafide. O ne a ya kwa go ene+ mme a re: “Go ne go na le banna ba le babedi mo motseng o le mongwe, yo mongwe o ne a humile mme yo mongwe a humanegile. 2 Monna yo o humileng o ne a na le dinku le dikgomo di le dintsi thata;+ 3 mme monna yo o humanegileng ene o ne a se na sepe fa e se kwanyana e le nngwe e namagadi, e a neng a e rekile.+ O ne a e tlhokomela, mme e ne e gola mmogo le ene le bomorwawe. E ne e tle e je mo dijong tse dinnye tse a neng a na le tsone e bo e nwa se se tswang mo koping ya gagwe e bile e ne e robala mo mabogong a gagwe. E ne ya nna jaaka morwadie. 4 Moragonyana go ne ga tla moeng kwa monneng wa mohumi, mme o ne a se ka a tsaya epe ya dinku le dikgomo tsa gagwe gore a direle motsamai yo o neng a tlile kwa go ene dijo. Go na le moo, o ne a tsaya kwanyana ya monna yo o humanegileng a bo a e tlhabela monna yo a neng a tlile kwa go ene.”+

5 Foo Dafide o ne a galefela monna yoo fela thata, mme o ne a raya Nathane a re: “Ke ikana ka Jehofa Modimo yo o tshelang,+ monna yo o dirileng seno o tshwanelwa ke go swa! 6 Mme o tshwanetse go duelela kwanyana eo makgetlo a le manê,+ ka gonne a dirile seno e bile a sa nna pelotlhomogi.”

7 Go tswa foo, Nathane o ne a raya Dafide a re: “Ke wena monna yoo! Seno ke se Jehofa, Modimo wa Iseraele a se buang: ‘Nna ka bonna ke ne ka go tlotsa gore o nne kgosi ya Iseraele+ e bile ke ne ka go golola mo seatleng sa ga Saulo.+ 8 Ke ne ke ikemiseditse go go naya dithoto tsa mong wa gago+ le basadi ba mong wa gago,+ mme ke ne ka go naya batho ba Iseraele le ba Juda gore o ba buse.+ Mme jaaka e kete seo se ne se sa lekana, ke ne ke ikemiseditse go go direla dilo di le dintsi thata.+ 9 Ke ka ntlha yang fa o ile wa nyatsa se Jehofa a se buileng ka go dira se se bosula mo matlhong a gagwe? O kgemethile Uria wa Mohite ka tšhaka!+ Go tswa foo, o ne wa tsaya mosadi wa gagwe gore e nne mosadi wa gago+ fa o sena go mmolaya ka tšhaka ya Baamone.+ 10 Jaanong tšhaka ga e kitla e tswa mo lelapeng la gago+ ka gonne o ne wa nnyatsa ka go tsaya mosadi wa ga Uria wa Mohite gore e nne mosadi wa gago.’ 11 Seno ke se Jehofa a se buang: ‘Ke go tlisetsa masetlapelo go tswa mo lelapeng la gago;+ mme ke tla tsaya basadi ba gago ke bo ke ba naya monna yo mongwe*+ fa pele ga matlho a gago, mme ene o tla tlhakanela dikobo le basadi ba gago letsatsi le penne.*+ 12 Le fa gone o dirile seno mo sephiring,+ nna ke tla dira seno fa pele ga Iseraele yotlhe letsatsi le penne.’”*

13 Foo Dafide o ne a raya Nathane a re: “Ke leofetse Jehofa.”+ Nathane o ne a araba Dafide a re: “Jehofa le ene o itshwarela boleo jwa gago.*+ Ga o kitla o swa.+ 14 Le fa go ntse jalo, e re ka o ile wa nyatsa Jehofa thata mo kgannyeng eno, morwa yo o sa tswang go mo tsholelwa ruri o tla swa.”

15 Go tswa foo, Nathane o ne a ya kwa ntlong ya gagwe.

Mme Jehofa o ne a dira gore ngwana yo mosadi wa ga Uria a neng a mo tsholetse Dafide a lwale. 16 Dafide o ne a rapela Modimo wa boammaaruri ka ntlha ya mosimane. Dafide o ne a itima dijo gotlhelele mme o ne a tle a tsene mo phaposing ya gagwe a bo a fetsa bosigo jotlhe a rapame fa fatshe.+ 17 Ka jalo, bagolwane ba ntlo ya gagwe ya segosi ba ne ba ema fa go ene mme ba leka go mo emisa, le fa go ntse jalo, o ne a gana e bile o ne a sa je le bone. 18 Mo letsatsing la bosupa ngwana yoo o ne a swa, mme batlhanka ba ga Dafide ba ne ba boifa go mmolelela gore ngwana o ne a sule. Ba ne ba re: “Fa ngwana a ne a sa ntse a tshela re ne ra bua le ene, mme o ne a se ka a re reetsa. Ka jalo, re ka mmolelela jang gore ngwana o sule? A ka nna a dira sengwe se se maswe.”

19 E rile Dafide a bona batlhanka ba gagwe ba sebaseba, o ne a lemoga gore ngwana o sule. Dafide o ne a raya batlhanka ba gagwe a re: “A ngwana o sule?” Ba ne ba araba ba re: “O sule.” 20 Ka jalo, Dafide o ne a tsoga fa fatshe. O ne a tlhapa, a itshasa leokwane,+ a apara diaparo di sele mme o ne a ya kwa ntlong+ ya ga Jehofa a bo a obama. Morago ga moo, o ne a ya kwa ntlong* ya gagwe mme a kopa gore a tlisediwe dijo, mme o ne a ja. 21 Batlhanka ba gagwe ba ne ba mmotsa jaana: “Goreng o itshwere ka tsela eno? Fa ngwana a ne a sa ntse a tshela o ne o itima dijo e bile o nna o lela; mme fela fa ngwana a sena go swa, o ne wa tsoga mme wa ja dijo.” 22 O ne a araba jaana: “Fa ngwana a ne a sa ntse a tshela, ke ne ke itima dijo+ e bile ke nna ke lela ka gonne ke ne ke ipolelela ke re, ‘Ke mang yo o itseng gore a Jehofa a ka nna a nkutlwela botlhoko mme a letla ngwana gore a tshele?’+ 23 E re ka jaanong a sule, goreng ke tshwanetse go itima dijo? A nka kgona go mo tsosa?+ Ke tla ya kwa go ene,+ mme ene ga a kitla a boela kwa go nna.”+

24 Go tswa foo, Dafide o ne a gomotsa mosadi wa gagwe e bong Bathe-sheba.+ O ne a tsena kwa go ene mme a tlhakanela dikobo le ene. Fa nako e ntse e tsamaya, o ne a tshola morwa mme o ne a bidiwa Solomone.*+ Mme Jehofa o ne a mo rata,+ 25 e bile o ne a romela molaetsa ka moporofeti Nathane+ gore a bidiwe Jedidia,* ka ntlha ya ga Jehofa.

26 Joabe o ne a tswelela a tlhabana le Raba+ wa Baamone+ mme o ne a gapa motse wa segosi.*+ 27 Ka jalo, Joabe o ne a romela barongwa kwa go Dafide mme a re: “Ke tlhabane le Raba,+ e bile ke gapile motse wa metsi.* 28 Jaanong phutha masole a mangwe otlhe mme o tlhasele motse o bo o o gapa. Go seng jalo, ke nna yo ke tla gapang motse, mme ke tla tlotlomadiwa ka ntlha ya seo.”*

29 Ka jalo, Dafide o ne a phutha masole otlhe mme a ya kwa Raba a bo a tlhabana le yone mme a e gapa. 30 Go tswa foo, o ne a rola Malekame serwalo sa tlhogo. Bokete jwa sone e ne e le talenta* ya gauta, mmogo le maje a a tlhwatlhwakgolo, mme se ne sa rwesiwa Dafide. Gape o ne a gapa dilo di le dintsi thata mo motseng.+ 31 Mme o ne a ntsha batho ba ba neng ba le mo go one a bo a ba naya tiro ya go shaga maje, ya go bereka ka didirisiwa tsa tshipi tse di bogale le ka dilepe tsa tshipi, le ya go dira ditena. Seo ke se a neng a se dira metse yotlhe ya Baamone. La bofelo Dafide le masole otlhe ba ne ba boela kwa Jerusalema.