Ditiragalo wa Bobedi
12 Fela fa bogosi jwa ga Rehoboame bo sena go tia thata e bile a setse a nonofile,+ o ne a tlogela Molao wa ga Jehofa,+ mme Baiseraele botlhe le bone ba ne ba dira jalo. 2 Mo ngwageng wa botlhano wa ga Kgosi Rehoboame, Kgosi Shishake+ wa Egepeto o ne a tla go tlhasela Jerusalema, ka gonne Baiseraele ba ne ba ile ba se ka ba ikanyega mo go Jehofa. 3 O ne a na le dikara di le 1 200, masole a a tsamayang ka dipitse a le 60 000 le mephato e mentsi ya masole a a neng a na le ene go tswa kwa Egepeto: e le Balibia, Basukime le Baethiopia.+ 4 O ne a gapa metse ya Juda e e sireletsegileng mme la bofelo a goroga kwa Jerusalema.
5 Moporofeti Shemaia+ o ne a tla kwa go Rehoboame le dikgosana tsa Juda tse di neng di phuthegetse kwa Jerusalema ka ntlha ya ga Shishake, mme o ne a ba raya a re: “Seno ke se Jehofa a se buang, ‘Lo ntlogetse, ka jalo le nna ke lo tlogetse+ ka lo tsenya mo seatleng sa ga Shishake.’” 6 Foo dikgosana tsa Iseraele mmogo le kgosi ba ne ba ikokobetsa+ mme ba re: “Jehofa o tshiamo.” 7 E rile Jehofa a bona gore ba ikokobeditse, Jehofa o ne a raya Shemaia a re: “Ba ikokobeditse. Ga nkitla ke ba senya,+ mme mo lobakanyaneng fela ke tla ba golola. Ga nkitla ke tshololela bogale jwa me mo godimo ga Jerusalema ke dirisa Shishake. 8 Mme gone, ba tla nna batlhanka ba gagwe, gore ba tle ba itse pharologanyo fa gare ga go ntirela le go direla dikgosi* tsa mafatshe a mangwe.”
9 Ka jalo, Kgosi Shishake wa Egepeto o ne a tla go tlhasela Jerusalema. O ne a tsaya matlotlo a ntlo ya ga Jehofa+ le matlotlo a ntlo ya kgosi.* O ne a tsaya sengwe le sengwe, go akaretsa le dithebe tsa gauta tse Solomone a neng a di dirile.+ 10 Ka jalo, Kgosi Rehoboame o ne a dira dithebe tsa kopore mo boemong jwa tsone, mme o ne a di baya mo taolong ya balaodi ba bafemedi,* ba ba neng ba disa kgoro ya ntlo ya kgosi. 11 Nako nngwe le nngwe fa kgosi e ne e ya kwa ntlong ya ga Jehofa, bafemedi ba ne ba tsena ba bo ba di tshola, go tswa foo ba ne ba di busetsa kwa ntlwaneng ya bafemedi. 12 E re ka kgosi e ile ya ikokobetsa, Jehofa o ne a faposa bogale jwa gagwe mo go ene,+ mme o ne a se ka a ba senya gotlhelele.+ Mo godimo ga moo, go ne go na le dilo dingwe tse di molemo tse di neng tsa fitlhelwa mo Juda.+
13 Kgosi Rehoboame o ne a nonotsha maemo a gagwe mo Jerusalema mme o ne a tswelela a busa; Rehoboame o ne a na le dingwaga di le 41 fa a nna kgosi, mme o ne a busa dingwaga di le 17 mo Jerusalema, motse o Jehofa a neng a o tlhophile mo ditsong tsotlhe tsa Iseraele gore e nne lefelo le a neng a tla baya leina la gagwe mo go lone. Leina la ga mmaagwe kgosi e ne e le Naama wa Moamone.+ 14 Mme Rehoboame o ne a dira se se bosula, ka gonne o ne a sa ikemisetsa mo pelong ya gagwe gore a batle Jehofa.+
15 Fa e le pego yotlhe ya botshelo jwa ga Rehoboame, sotlhe se a se dirileng, go tswa kwa tshimologong go ya kwa bokhutlong, a ga e a kwalwa mo mafokong a ga moporofeti Shemaia+ le a ga Ido+ mmoni wa diponatshegelo mo pegong ya tatelano ya masika? Mme go ne ga tswelela go na le ntwa fa gare ga ga Rehoboame le Jeroboame.+ 16 Morago ga moo, Rehoboame o ne a swa jaaka borraagwemogolo mme o ne a fitlhwa mo Motseng wa ga Dafide;+ mme morwawe e bong Abija+ o ne a nna kgosi mo boemong jwa gagwe.