Bakorintha wa Bobedi

4 Ka jalo, e re ka re abetswe bodiredi jono ka gonne Modimo a re utlwetse botlhoko, ga re ineele. 2 Le fa go ntse jalo, re tlhoile dilo tsa boferefere tse di tlhabisang ditlhong, ga re tsietse, e bile re ruta fela se lefoko la Modimo le se buang;+ mme fa re itsise batho boammaaruri jwa Modimo, re itshupa re dira se se siameng fa pele ga Modimo gore segakolodi sa motho mongwe le mongwe se lemoge seo.+ 3 Tota e bile, fa e le gore dikgang tse di molemo tse re di bolelang di siregile, di siregile mo go ba ba nyelelang, 4 ba ba sa dumeleng, ba modimo wa lefatshe leno*+ a foufaditseng megopolo ya bone,+ gore lesedi la dikgang tse di molemo tse di galalelang ka ga Keresete, yo e leng setshwano sa Modimo,+ le se ka la ba phatsimela.+ 5 Gonne ga re rere ka ga rona, mme re rera ka ga Jesu Keresete gore ke Morena le gore rona re batlhanka ba lona ka ntlha ya ga Jesu. 6 Gonne Modimo ke ene yo o neng a re: “A lesedi le phatsime mo lefifing,”+ mme o dirile gore dipelo tsa rona di phatsime+ ka kitso ya gagwe e e galalelang a dirisa Keresete.

7 Ka jalo, le fa re tshwana le dijana* tsa letsopa,+ re amogetse letlotlo leno.+ Seno se dira gore go bonale sentle gore maatla a a sa tlwaelegang a re nang le one a tswa kwa Modimong, e seng mo go rona.+ 8 Re gateletswe ka ditsela tse di farologaneng, mme gone ga re a pitlagana mo re ka se kgoneng go tshikinyega; ga re itse gore re dire eng, mme gone re na le kgoro ya botso;*+ 9 re a bogisiwa, mme gone Modimo ga a re latlha;+ re gateletswe ke matshwenyego, mme gone re sa ntse re tshela.+ 10 Re nna re le mo kotsing ya go bolawa fela jaaka Jesu, mme seno se bontsha batho gore re boga jaaka Jesu.+ 11 Gonne rona ba re tshelang re nna re le mo kotsing ka metlha ka gonne re latela+ Jesu, mme seno se bontsha batho gore re boga jaaka Jesu. 12 Le fa gone re lebana le loso, seno se dira gore lo bone botshelo.

13 Go kwadilwe go twe: “Ke ne ke na le tumelo, ka jalo ke ne ka bua.”+ Le rona re na le tumelo, mme ka ntlha ya seo, re a bua. 14 Re a itse gore yo o neng a tsosa Jesu le rona o tla re tsosa gore re nne le Jesu, mme o tla isa rona le lona fa pele ga ga Jesu.+ 15 Gonne dilo tseno tsotlhe di direga ka ntlha ya lona, gore bopelonomi jo bogolo* bo oketsege le go feta ka gonne ba le bantsi ba leboga Modimo ka ntlha ya kgalalelo ya gagwe.+

16 Ka jalo, ga re ineele, mme le fa motho yo re leng ene ka fa ntle a onala, motho yo re leng ene mo teng o ntšhafadiwa letsatsi le letsatsi. 17 Gonne le fa diteko* tsa rona e le tsa nakwana e bile di le motlhofo, di dira gore re amogele kgalalelo e kgolo* thata le e e sa feleng;+ 18 re ntse re tlhomile matlho a rona mo dilong tse di sa bonweng,+ e seng mo dilong tse di bonwang. Gonne dilo tse di bonwang ke tsa nakwana, mme dilo tse di sa bonweng di nnela ruri.