Timotheo wa Ntlha

4 Le fa go ntse jalo, lefoko le le tlhotlheleditsweng* le tlhalosa gore mo nakong e e tlang* bangwe ba tla wa mo tumelong, ba reetsa dipolelo tse di tsietsang tse e keteng di tswa kwa Modimong*+ le dithuto tsa madimona, 2 e bile ba tla reetsa boitimokanyi jwa batho ba ba buang maaka,+ ba digakolodi tsa bone di sa berekeng jaaka e kete di fisitswe ka tshipi e e molelo. 3 Ba thibela batho go nyala+ e bile ba ba laela gore ba se ka ba ja dijo+ tse Modimo a di diretseng+ gore batho ba ba nang le tumelo+ e bile ba itse boammaaruri sentle, ba di je e bile ba leboge Modimo. 4 Gonne sengwe le sengwe se Modimo a se dirileng se molemo,+ mme ga go na sepe se se tshwanetseng go ganwa+ fa e le gore fa batho ba se ja, ba a rapela ba se lebogela, 5 ka gonne dijo di tsewa di le boitshepo ka lefoko la Modimo le ka go di rapelela.

6 Fa o naya bakaulengwe kgakololo eno, o tla bo o le modiredi yo o molemo wa ga Keresete Jesu; o tla bo o bontsha gore fa o ne o rutiwa, go ne go dirisiwa mafoko a a boammaaruri le a thuto e e molemo e o ntseng o e setse morago.+ 7 Mme o se ka wa reetsa dipolelo tsa maaka tse di tlontlololang Modimo,+ tse di tshwanang le tse di buiwang ke basadibagolo. Ka fa letlhakoreng le lengwe, dira ka natla* mme o bontshe gore o ikemiseditse go ikanyega mo Modimong. 8 Gonne go ikatisa mmele go tswela mosola go le gonnye, mme go ikanyega go thusa motho mo dilong tsotlhe ka gonne o amogela masego gone jaanong le mo nakong e e tlang.+ 9 Mafoko ao a a ikanyega e bile a tshwanetse go dumelwa ka botlalo. 10 Ke gone ka moo re dirang ka natla e bile re itekang thata,+ ka gonne re tshepa Modimo yo o tshelang, yo e leng Mmoloki+ wa batho ba mefuta yotlhe,+ segolobogolo ba ba ikanyegang.

11 Nna o ba neye ditaelo tseno o bo o di ba rute. 12 Le ka motlha o se ka wa letla ope a go tseela kwa tlase ka gonne o le mosha. Go na le moo, nna sekao mo go ba ba ikanyegang mo tseleng e o buang ka yone, mo boitshwarong, mo loratong, mo tumelong, mo boitshekong. 13 Tswelela o dira bojotlhe go balela ba bangwe,+ go ba rotloetsa* le go ba ruta, go fitlha ke tla. 14 O se ka wa tlhokomologa mpho e o neng wa e newa ka boporofeti fa setlhopha sa bagolwane se ne se go baya diatla.+ 15 Akanya thata* ka dilo tseno; nwelelela mo go tsone, gore batho botlhe ba bone tsela e o gatelang pele ka yone. 16 Ikele tlhoko o bo o tlhokomele tsela e o rutang ka yone.+ Ngangatlela dilo tseno, ka gonne fa o di dira, o tla ipoloka o bo o boloka ba ba go reetsang.+