Bathesalonika wa Bobedi

3 La bofelo bakaulengwe, tswelelang lo re rapelela,+ gore lefoko la ga Jehofa* le tswelele le anama ka bonako+ le gore le galalediwe fela jaaka le galalediwa mo go lona, 2 le gore re gololwe mo bathong ba ba bosula thata,+ ka gonne tumelo ga se selo se batho botlhe ba nang le sone.+ 3 Mme Morena o a ikanyega, e bile o tla lo nonotsha a bo a lo sireletsa mo go Satane.* 4 E re ka le lona lo le balatedi ba Morena, re a lo tshepa. Re a itse gore lo dira dilo tse re di lo laetseng e bile lo tla tswelela lo di dira. 5 E kete Morena a ka lo thusa gore lo rate Modimo+ le gore lo itshoke+ gore lo kgone go direla Keresete.

6 Jaanong bakaulengwe, re lo naya ditaelo ka leina la Morena wa rona Jesu Keresete, gore lo tswe mo mokaulengweng mongwe le mongwe yo o sa direng dilo ka thulaganyo+ le yo o sa direng dilo go ya ka thuto* e re neng ra lo* e ruta.+ 7 Gonne lona ka bolona lo a itse gore lo tshwanetse go re etsa ka tsela efe,+ ka gonne ga re a ka ra dira dilo ka go tlhoka thulaganyo fa re ne re na le lona, 8 e bile ga re a ja dijo tsa ga ope mahala.*+ Go na le moo, re ne re dira ka natla motshegare le bosigo gore re se ka ra imetsa ope ka ditshenyegelo tsa rona.+ 9 Ga se gore ga re na tshwanelo ya go lo kopa gore lo re thuse,+ mme re ne re batla go lo tlhomela sekao gore lo se etse.+ 10 Tota e bile fa re ne re na le lona, re ne re tle re lo neye taelo eno: “Fa motho a sa batle go bereka, a a se ka a ja.”+ 11 Gonne re utlwalela gore bangwe ga ba dire dilo ka thulaganyo mo go lona+ e bile ga ba bereke gotlhelele mme ba itshunya nko mo dilong tse di sa ba ameng.+ 12 Re laela batho bao e bile re ba kgothatsa ka leina la Morena Jesu Keresete gore ba bereke mme ba tswe mo dikgannyeng tsa batho ba bangwe le gore ba je dijo tse ba di bereketseng.+

13 Mme lona bakaulengwe, lo se ka lwa tlogela go dira se se molemo. 14 Mme fa mongwe a sa ikobele se re se buileng mo lekwalong leno, mmeyeng leitlho* e bile lo tlogele go ikopanya le ene,+ gore a tle a tlhabiwe ke ditlhong. 15 Mme gone, lo se ka lwa mo tsaya e le mmaba, go na le moo, tswelelang lo mo tlhagisa+ e le mokaulengwe wa lona.

16 Jaanong e kete Morena wa kagiso a ka lo naya kagiso ka metlha ka ditsela tsotlhe.+ A Morena a nne le lona lotlhe.

17 Jaanong nna Paulo, ke lo romelela ditumediso ka seatla sa me,+ e leng sesupo mo lekwalong lengwe le lengwe; eno ke tsela e ke kwalang ka yone.

18 E kete Morena wa rona Jesu Keresete a ka lo naya bopelonomi jwa gagwe jo bogolo.*