Dipesalema
Pesalema e e buang ka Solomone.
72 Ao tlhe Modimo, dira gore kgosi e atlhole go dumalana le dikatlholo tsa gago,
O bo o abele morwa kgosi tshiamo ya gago.+
2 E kete a ka seka kgetsi ya batho ba gago ka tshiamo,
Le ya batho ba gago ba maemo a a kwa tlase ka tshiamiso.+
3 E kete dithaba di ka tlisetsa batho kagiso,
E bile e kete dithota di ka ba tlisetsa tshiamo.
4 A a femele* batho ba maemo a a kwa tlase,
A a boloke barwa ba bahumanegi,
Mme a a thubaganye batho ba ba tsietsang.+
5 Ba tla go boifa fa fela go sa ntse go na le letsatsi
Le fa fela go sa ntse go na le ngwedi,
Kokomana morago ga kokomana.+
6 O tla nna jaaka pula e e nelang bojang jo bo kgaotsweng,
Jaaka pula ya medupe e e kolobetsang lefatshe.+
7 Mo motlheng wa gagwe basiami ba tla oketsega,*+
E bile kagiso e tla nna ntsi+ go fitlha ngwedi e sa tlhole e le teng.
9 Batho ba ba nnang kwa sekakeng ba tla ikoba fa pele ga gagwe,
Mme baba ba gagwe ba tla latswa lorole.+
10 Dikgosi tsa Tareshishe le tsa ditlhaketlhake di tla duela sehuba.*+
Dikgosi tsa Sheba le tsa Seba di tla tlisa dimpho.+
11 Dikgosi tsotlhe di tla ikoba fa pele ga gagwe,
Mme ditšhaba tsotlhe di tla mo direla.
12 Gonne o tla golola mohumanegi yo o goang a kopa thuso,
Le motho wa maemo a a kwa tlase le ope fela yo o se nang mothusi.
13 O tla utlwela batho ba maemo a a kwa tlase le bahumanegi botlhoko,
E bile o tla boloka matshelo* a bahumanegi.
14 O tla ba golola mo kgatelelong le mo thubakanyong,
Mme madi a bone a tla nna tlhwatlhwakgolo mo matlhong a gagwe.
15 E kete a ka tshela a bo a newa gauta ya kwa Sheba.+
E kete a ka rapelelwa ka metlha,
E bile e kete a ka segofadiwa letsatsi lotlhe.
Masimo a Kgosi a tla tlhogisa dijo tse dintsi jaaka kwa Lebanona,+
Mme batho ba ba mo metseng ba tla nna bantsi jaaka dimela tsa lefatshe.+
17 E kete leina la gagwe le ka nna ka bosakhutleng,+
E bile e kete le ka atlega fa fela go sa ntse go na le letsatsi.
E kete batho ba ka segofadiwa ka ntlha ya gagwe;+
E kete ditšhaba tsotlhe di ka bolela gore o itumetse.
18 E kete Jehofa Modimo a ka bakwa, e bong Modimo wa Iseraele,+
Yo e leng ene fela a dirang dilo tse di gakgamatsang.+
19 E kete leina la gagwe le le galalelang le ka bakwa ka bosakhutleng,+
Mme e kete kgalalelo ya gagwe e ka tlala mo lefatsheng lotlhe.+
Amen le Amen.
20 Dithapelo tsa ga Dafide morwa Jese,+ di felela fano.