Bakorintha wa Bobedi
2 Gonne ke dirile tshwetso ya gore ke se ka ka tla kwa go lona gape gore ke se ka ka lo utlwisa botlhoko. 2 Gonne fa ke lo utlwisa botlhoko, ke mang yo o tla dirang gore ke itumele fa e se ene yo ke mo utlwisitseng botlhoko? 3 Ke gone ka moo ke neng ka lo kwalela, gore fa ke tla ke se ka ka utlwa botlhoko ka ntlha ya lona mme ke itumele, ka gonne ke a itse gore se se dirang gore ke itumele se dira gore le lona lo itumele. 4 Ke ne ka lo kwalela ke lela thata, ke tshwenyegile e bile pelo ya me e utlwile botlhoko thata, e seng ka boikaelelo jwa gore ke lo utlwise botlhoko,+ mme gore lo itse kafa ke lo ratang thata ka gone.
5 Jaanong fa e le gore go na le mongwe yo o lo utlwisitseng botlhoko,+ ga a utlwisa nna botlhoko, mme o utlwisitse lona botlhoko. Mme gone, ga ke a ikaelela go lo tlhaba ka mafoko. 6 Tsela e motho yoo yo o leofileng a kgalemilweng ke batho ba le bantsi ka yone e lekane; 7 jaanong lo tshwanetse go mo itshwarela ka pelo yotlhe le go mo gomotsa,+ gore a se ka a fekeediwa* ke go utlwa botlhoko jo bo feteletseng.+ 8 Ka jalo, ke lo rotloetsa gore lo mo tlhomamisetse gore lo a mo rata.+ 9 Gape ke ne ka lo kwalela ka mabaka ano: Go bona gore a lo tla reetsa dilo tsotlhe tse ke di lo kwaletseng. 10 Fa lo itshwarela mongwe le mongwe ka sepe fela se a se dirileng, le nna ke a mo itshwarela. Tota e bile, mongwe le mongwe yo ke mo itshwaretseng, (fa e le gore ke ne ke tlhoka go itshwarela mongwe) ke ne ke mo itshwarela e le go thusa lona e bile Keresete e ne e le mosupi wa gore ke dirile jalo, 11 gore re se ka ra tsiediwa ke Satane,+ ka gonne re itse ditsela* tse a di dirisang go re raela.+
12 Jaanong e rile ke goroga kwa Teroase+ gore ke bolele dikgang tse di molemo ka ga Keresete, mme ke bulegelwa ke tshono* mo tirong ya Morena, 13 ke ne ka tshwenyega thata ka gonne ke sa bone Tito,+ mokaulengwe wa me. Ka jalo, ke ne ka ba sadisa sentle mme ka ya Makedonia.+
14 Mme a re lebogeng Modimo, yo ka metlha a re etelelang pele re na le Keresete jaaka e kete o etelela pele masole a a tswang kwa ntweng a fentse. Kitso ya Modimo ke sengwe se se nkgang monate e bile Modimo o dira gore batho mo lefelong lengwe le lengwe ba utlwe monko wa yone a dirisa tiro e re e dirang! 15 Gonne mo Modimong re lonko lo lo monate lwa ga Keresete mo go ba ba bolokwang le mo go ba ba nyelelang; 16 mo go ba ba nyelelang re lonko lo lo tswang mo losong lo ya losong,+ mo go ba ba bolokwang re lonko lo lo tswang mo botshelong lo ya botshelong. Mme ke mang yo o tshwanelegang go dira tiro eno? 17 Ke rona, ka gonne ga re dire kgwebo* ka lefoko la Modimo+ jaaka batho ba le bantsi ba dira, mme re bua ka dipelo tse di phepa re le balatedi ba ga Keresete fa pele ga Modimo e bile re romilwe ke Modimo.