Bathesalonika wa Bobedi

1 Nna Paulo, Silefano* le Timotheo,+ re kwalela phuthego e e kwa Thesalonika e e seoposengwe le Modimo Rara le Morena Jesu Keresete:

2 E kete Modimo Rraarona le Morena Jesu Keresete ba ka lo naya bopelonomi jo bogolo* le kagiso.

3 Bakaulengwe, ka metlha re patelesega go leboga Modimo ka lona. Mme seno se a tshwanela ka gonne tumelo ya lona e ntse e gola thata e bile tsela e lo ratanang ka yone, le yone e a oketsega.+ 4 Seo se dira gore re bue ka lona re le motlotlo+ mo diphuthegong tsa Modimo, ka gonne le fa lo bogisiwa e bile lo kopana le mathata* lo tswelela lo itshokile e bile lo ikanya Modimo.+ 5 Jono ke bosupi jwa gore Modimo o atlhola ka tsela e e siameng, mme seno se dira gore lo tsewe lo tshwanelegela Bogosi Jwa Modimo, jo ruri lo bogang ka ntlha ya jone.+

6 E re ka Modimo a siame, o tla otlhaya ba ba lo bogisang.+ 7 Mme lona ba lo bogang, lo tla gololwa mmogo le rona fa Morena Jesu a senolwa+ a tswa kwa legodimong a na le baengele ba gagwe ba ba maatla+ 8 a le mo kgabong ya molelo, fa a otlhaya ba ba sa itseng Modimo le ba ba sa reetseng dikgang tse di molemo tse di buang ka Morena wa rona Jesu.+ 9 Morena o tla ba atlhola. Ba tla nyelediwa ka bosakhutleng,+ ka jalo, ga a kitla a ba leba e bile ga a kitla a ba thusa ka maatla a gagwe a magolo. 10 Ka letsatsi leo, o tla galalediwa mmogo le ba ba boitshepo ba gagwe mme botlhe ba ba nang le tumelo ba tla mo tlotlomatsa. Lona ba lo neng lwa dumela dilo tse re neng re lo di rerela lo tla bo lo na le bone.

11 Ka ntlha ya seo, re lo rapelela ka metlha gore Modimo wa rona a lo kaye lo tshwanelwa ke botshelo jo a lo bo bileditseng,+ a dirise maatla a gagwe go dira sotlhe se se molemo se a se ratang e bile a atlegise dilo tse lo di dirang ka gonne lo na le tumelo. 12 Seno se tla direga gore leina la Morena wa rona Jesu le galalediwe mo go lona, le lona lo galalediwe mmogo le ene ka ntlha ya bopelonomi jo bogolo jwa Modimo wa rona le jwa Morena Jesu Keresete.