Tshenolo e e Yang Kwa go Johane
12 Go tswa foo, ke ne ka bona sesupo se segolo kwa legodimong: Mosadi+ mongwe o ne a apere letsatsi, mme ngwedi e ne e le ka fa tlase ga dinao tsa gagwe, e bile mo tlhogong ya gagwe go ne go na le serwalo sa dinaledi di le 12, 2 mme o ne a imile. Mme e re ka a ne a tloga a belega, o ne a lela ka gonne a le mo ditlhabing tsa pelegi.
3 Gape ke ne ka bona sesupo se sengwe kwa legodimong. Go ne go na le noga* e kgolo e e bohibidu jwa molelo,+ e na le ditlhogo di le supa le dinaka di le lesome, mme mo ditlhogong tsa yone go ne go na le dirwalo tsa segosi di le supa; 4 mogatla wa yone o ne wa goga karolo e nnye ya dinaledi+ tsa legodimo mme wa di latlhela mo lefatsheng.+ Mme noga eo e kgolo e ne ya tswelela e eme fa pele ga mosadi+ yo a neng a tloga a belega, gore fa a belega, e tle e kometse ngwana wa gagwe.
5 O ne a tshola ngwana wa mosimane,+ yo o tla busang ditšhaba tsotlhe ka lore lwa segosi lwa tshipi.+ Mme ngwana wa gagwe o ne a phamolelwa* kwa Modimong le kwa setulong sa gagwe sa bogosi. 6 Mosadi yoo ene o ne a tshabela kwa nageng, kwa Modimo a mmaakanyeditseng lefelo gone, kwa a neng a tla fepelwa gone malatsi a le 1 260.+
7 Go ne ga tsoga ntwa kwa legodimong: Mikaele*+ le baengele ba gagwe ba ne ba lwa le noga e kgolo, mme noga eo le baengele ba yone ba ne ba lwa le bone, 8 le fa go ntse jalo ga ba a ka ba fenya,* e bile ga ba a ka ba tlhola ba nna le lefelo kwa legodimong. 9 Ka jalo, noga e kgolo+ e ne ya latlhelwa mo lefatsheng, e leng noga ya kwa tshimologong,+ e e bidiwang Diabolo+ le Satane,+ yo o tsietsang lefatshe lotlhe;+ le baengele ba gagwe ba ne ba latlhelwa mo lefatsheng+ le ene. 10 Mme ke ne ka utlwa lentswe le le kwa godimo kwa legodimong le re:
“Jaanong Modimo o tlisitse poloko+ e bile maatla a gagwe a setse a senotswe. Bogosi jwa gagwe+ bo simolotse go busa e bile Keresete wa gagwe o simolotse go dirisa taolo ya gagwe, ka gonne molatofatsi wa bakaulengwe ba rona o latlhetswe kwa lefatsheng, ene yo o ba latofatsang bosigo le motshegare fa pele ga Modimo wa rona!+ 11 Mme ba ne ba mo fenya+ ka ntlha ya madi a Kwana+ le ka ntlha ya molaetsa o ba neng ba o bolela,+ e bile ga ba a ka ba rata matshelo*+ a bone thata, tota le fa ba ne ba lebane le loso. 12 Ka jalo, itumeleng, lona magodimo le lona ba lo agileng mo go one! Ruri lefatshe le lewatle di tlhomola pelo,+ ka gonne Diabolo o fologetse kwa go lona, a tletse bogale jo bogolo, ka gonne a itse gore o saletswe ke nako e khutshwane fela.”+
13 Jaanong e rile noga e kgolo e bona gore e latlhetswe mo lefatsheng,+ e ne ya bogisa mosadi+ yo o ileng a tshola ngwana wa mosimane. 14 Le fa go ntse jalo, mosadi yoo o ne a newa diphuka tse pedi tsa ntsu e kgolo,+ gore a tle a fofele kwa nageng kwa lefelong la gagwe, kwa a tla fepiwang gone ka motlha o le mongwe le ka metlha e le mebedi le halofo ya motlha*+ a le kgakala le noga.+
15 Mme noga e ne ya kgwa metsi a a tshwanang le noka ka kwa morago ga mosadi, gore noka eo e tle e tseye mosadi yoo. 16 Le fa go ntse jalo, lefatshe le ne la thusa mosadi, mme le ne la bula molomo wa lone le bo le kometsa noka e noga e kgolo e neng ya e kgwa. 17 Ka jalo, noga eo e ne ya galefela mosadi yoo mme ya ya go tlhasela ba ba setseng ba losika lwa gagwe,+ ba ba bolokang ditaelo tsa Modimo e bile ba neilwe kabelo ya go naya bosupi ka ga Jesu.+