Bakorintha wa Ntlha
16 Jaanong ka kgang ya go phuthela ba ba boitshepo madi,+ lo ka latela ditaelo tse ke di neileng diphuthego tsa kwa Galatia. 2 Mo letsatsing la ntlha la beke nngwe le nngwe, mongwe le mongwe wa lona o tshwanetse go beela sengwe kwa thoko go ya ka se a se kgonang, gore go se ka ga phuthiwa madi fa ke setse ke gorogile. 3 Mme fa ke fitlha koo, ke tla roma banna ba lo ba buang bontle mo makwalong a lona+ kwa Jerusalema, gore ba ise madi a lo a ntshitseng ka go rata. 4 Mme fa go tlhokega gore le nna ke ye koo, ba tla tsamaya le nna.
5 Mme ke tla tla kwa go lona fa ke sena go tsena ka Makedonia, ka gonne ke batla go feta ka Makedonia pele;+ 6 gongwe ke tla nna le lona ka nakwana kgotsa ke tla fetsa mariga ke na le lona, gore lo tle lo mpuledise* kwa nka tswang ke ya gone. 7 Ga ke batle go lo bona ke feta fela, mme fa Jehofa* a ratile, ke eletsa go nna le lona lobakanyana.+ 8 Mme ke sa ntse ke le mo Efeso+ go fitlha ka Moletlo wa Pentekosete, 9 ka gonne ke bulegetswe ke tshono e kgolo* ya gore ke direle Morena,+ le fa go ntse jalo, go na le baganetsi ba le bantsi.
10 Jaanong fa Timotheo+ a goroga, dirisanang le ene sentle gore a se ka a boifa sepe fa a na le lona, ka gonne o dira tiro ya ga Jehofa,*+ fela jaaka le nna ke e dira. 11 Ka jalo, a ope a se ka a mo nyatsa. Mmulediseng, gore a tle a fitlhe fano mo go nna ka kagiso, ka gonne nna le bakaulengwe re mo letetse.
12 Mme fa e le ka ga Apolose+ mokaulengwe wa rona, ke ne ka mo kopa gore a tsamaye le bakaulengwe fa ba lo etela. Mme o ne a sa ikaelela go tla gone jaanong, le fa go ntse jalo, o tla tla fa a na le nako.
13 Nnang lo tsogile,+ tlhomamang mo tumelong,+ nnang pelokgale,*+ nnang maatla.+ 14 Dirang sengwe le sengwe ka lorato.+
15 Lo a itse gore ba ba nnang mo lelapeng la ga Setefanase ke ba ntlha go nna badumedi* mo Akaia le gore ba ne ba ikemisetsa go direla ba ba boitshepo. Ka jalo, ke lo rotloetsa jaana bakaulengwe: 16 E kete le lona lo ka nna lo ikobela batho ba ba ntseng jalo le botlhe ba ba dirisanang sentle le batho ba bangwe e bile ba dira ka natla.+ 17 Mme ke itumelela gore Setefanase+ le Foretunato le Akaiko ba tlile mono; ba nthusitse thata ka dilo tse ke itseng gore lo ka bo lo nthusitse ka tsone. 18 Gonne ba nkgothaditse e bile le lona ba lo kgothaditse. Ka jalo, tlotlang banna ba ba ntseng jalo.
19 Diphuthego tsa Asia di a lo dumedisa. Akhwila le Periseka mmogo le phuthego e e kopanelang mo ntlong ya bone+ ba lo dumedisa ka pelo yotlhe lona balatedi ba Morena. 20 Bakaulengwe botlhe ba a lo dumedisa. Dumedisanang ka lorato.*
21 Jaanong nna Paulo, ke lo romelela ditumediso tsa me ka seatla sa me.
22 Fa mongwe a sa rate Morena, a a hutsege. Ao tlhe Morena wa rona, tlaya! 23 A bopelonomi jo bogolo* jwa Morena Jesu bo nne le lona. 24 Ke batla gore lo itse gore ke lo rata thata lona balatedi ba ga Keresete Jesu.