Bakorintha wa Ntlha
9 A ga ke a gololesega go dira se ke se batlang? A ga ke moaposetoloi? A ga ke a bona Jesu Morena wa rona?+ A ga lo diphelelo tsa tiro e ke e direlang Morena? 2 Tota le fa ke se moaposetoloi mo go ba bangwe, ruri ke ene mo go lona! Gonne lo letshwao le le bontshang gore ke moaposetoloi mo Moreneng.
3 Ke iphemela jaana mo go ba ba ntatofatsang: 4 A ga re na tshwanelo* ya go ja le go nwa? 5 A ga re na tshwanelo ya go nyala mosadi wa Mokeresete+ re bo re tsamaya le ene fela jaaka baaposetoloi ba bangwe botlhe le bomonnawe* Morena+ le Kefase*+ ba dira? 6 Kgotsa a ke nna le Barenabase+ fela ba re sa tshwanelang go tlogela tiro e re itshedisang ka yone? 7 Ke lesole lefe le le ka ituelelang ditshenyegelo fa le direla kwa sesoleng? Ke mang yo o jalang tshimo ya morara* a bo a sa je maungo a yone?+ Kgotsa ke mang yo o disang letsomane a bo a sa nwe mashi a letsomane leo?
8 Ga ke bue dilo tseno go ya ka se batho ba se akanyang, mme molao wa ga Moshe le one o bua ka tsone, a ga go jalo? 9 Gonne go kwadilwe jaana mo Molaong wa ga Moshe: “Ga o a tshwanela go bofa poo molomo fa e photha dijo tsa ditlhaka.”+ A Modimo o ne a bua jalo ka gonne a tshwenyegile ka dipoo? 10 Kgotsa a tota o ne a bua jalo ka ntlha ya rona? Sentlentle go ne go kwalelwa rona, ka gonne motho yo o lemang le yo o phothang ba dira jalo ba na le tsholofelo ya gore ba tla ja.
11 Fa e le gore re lo rutile dilo tse di tswang kwa Modimong, jaaka e kete re ne re jala, a go phoso gore re amogele thuso go tswa mo go lona, jaaka e kete re ne re roba?+ 12 Fa e le gore batho ba bangwe ba na le tshwanelo ya gore lo ba neye se ba se tlhokang, a rona ga re na tshwanelo eo go ba feta? Le fa go ntse jalo, ga re a dirisa tshwanelo* eno,+ mme re itshokela dilo tsotlhe gore ka tsela epe re se ka ra kgoreletsa dikgang tse di molemo tse di ka ga Keresete.+ 13 A ga lo itse gore banna ba ba dirang ditiro tse di boitshepo ba ja dijo tsa tempele, le gore ba ba direlang ka metlha kwa sebesong ba amogela karolo nngwe ya dilo tse di ntshiwang mo sebesong?+ 14 Ka tsela e e tshwanang, Morena o ne a laela gore ba ba bolelang dikgang tse di molemo ba tshele ka dikgang tse di molemo.+
15 Le fa go ntse jalo, ga ke a lo kopa sepe.+ Eleruri, ga ke a kwala jaana gore lo ntirele sengwe, gonne go ne go ka nna botoka thata gore ke swe go na le gore ke letle motho ope a ntseele tshwanelo ya go ikgantsha!+ 16 Jaanong, fa ke rera dikgang tse di molemo, ga ke na lebaka la go ikgantsha, ka gonne ke patelesega go dira jalo. Ruri go latlhega nna fa ke sa rere dikgang tse di molemo!+ 17 Fa ke dira jalo ka pelo yotlhe, ke tla duelwa; mme le fa ke dira jalo ke sa batle, ke sa ntse ke na le maikarabelo a go dira tiro eno.+ 18 Jaanong ke duelwa ka eng? Ka gore fa ke bolela dikgang tse di molemo ke dire jalo ke sa duedise ope, gore ke se ka ka dirisa taolo* e ke e neilweng ya go rera dikgang tse di molemo ka tsela e e sa tshwanelang.
19 Gonne, le fa ke se motlhanka wa ga ope, ke itirile motlhanka mo go botlhe, gore ke tlise batho ba le bantsi mo tseleng ya ga Keresete. 20 Mo Bajudeng ke ne ka nna Mojuda, gore ke tlise Bajuda+ mo tseleng ya ga Keresete; mo go ba ba latelang molao* ke ne ka nna yo o latelang molao, le fa gone nna ke sa latele molao, gore ke tlise ba ba latelang molao mo tseleng ya ga Keresete.+ 21 Mo bathong ba ba sa lateleng molao* ke ne ka nna yo o sa lateleng molao, le fa gone ke latela molao wa Modimo e bile ke latela molao wa ga Keresete,+ gore ke tlise batho ba ba sa lateleng molao mo tseleng ya ga Keresete. 22 Mo bathong ba ba bokoa ke ne ka nna bokoa,+ gore ke tlise ba ba bokoa mo tseleng ya ga Keresete. Ke nnile dilo tsotlhe mo bathong ba mefuta yotlhe, gore fa go ka kgonega ke boloke bangwe. 23 Mme ke dira dilo tsotlhe ka ntlha ya dikgang tse di molemo, gore ke di bolelele ba bangwe.+
24 A ga lo itse gore batho botlhe ba a taboga mo lobelong, mme ke a le mongwe fela yo o newang sekgele? Tabogang gore lo se gape.+ 25 Jaanong batho botlhe ba ba nnang le seabe mo kgaisanong* ba ithiba mo dilong tsotlhe. Mme gone, ba dira jalo gore ba newe serwalo se se senyegang,+ mme rona gore re newe se se sa senyegeng.+ 26 Ka jalo, ga ke taboge ke sa itse gore ke ya kae;+ gape ga ke lwe ka tsela e e dirang gore ke iteye phefo; 27 mme ke laola* mmele wa me+ ke bo ke o tshwara jaaka motlhanka, gore fa ke sena go rerela ba bangwe, nna ka bonna ke se ka ka iphitlhela ke sa amogelesege* mo Modimong ka tsela nngwe.