Jobe

 2 “Ke gone ka moo dikakanyo tsa me tse di ntshwenyang di ntlhotlheletsang gore ke arabe

Ka ntlha ya maikutlo a me a a fuduegileng.

 3 Mafoko a gago a ntlhapaditse;

Mme temogo ya me* e ntlhotlheletsa gore ke arabe.

 4 Ruri o tshwanetse wa bo o ntse o itse seno,

Gonne fa e sa le motho* a bewa mo lefatsheng, go diragetse seno:+

 5 Batho ba ba bosula ba itumela ka nako e khutshwane

Le motho yo o sa dumeleng mo Modimong* o itumela ka nakwana fela.+

 6 Le fa gone tlotlomalo ya gagwe e tlhatlogela kwa legodimong

Le tlhogo ya gagwe e fitlha kwa marung,

 7 O tla nyelela ka bosakhutleng jaaka mantle a gagwe;

Ba ba neng ba tle ba mmone ba tla re, ‘O kae?’

 8 O tla nyelela fela jaaka toro e nyelela, mme ga ba kitla ba mmona gape;

Ba tla mo lebala fela jaaka ponatshegelo ya bosigo e lebalwa.

 9 Yo o kileng a mmona ga a kitla a tlhola a mmona gape,

Le lefelo la gagwe ga le kitla le tlhola le mmona.+

10 Bana ba gagwe ba tla kopa bahumanegi gore ba ba utlwele botlhoko,

Mme diatla tsa gagwe di tla busa khumo e a e tsereng mo go ba bangwe.+

11 O ne a na le matlhagatlhaga a bosha,

Le fa go ntse jalo, a* tla lala le ene mo loroleng.

12 Fa e le gore se se bosula se utlwala se le botshe mo molomong wa gagwe,

Fa a se fitlha ka fa tlase ga loleme lwa gagwe,

13 Fa a se hupa mme a sa se kgwe

Mme a nna a se bolokile mo molomong wa gagwe,

14 Dijo tsa gagwe di tla nna botlha mo teng ga gagwe;

Di tla nna jaaka botlhole* jwa bokake mo teng ga gagwe.

15 O komeditse khumo, mme o tla e tlhatsa;

Modimo o tla e ntsha mo mpeng ya gagwe.

16 O tla anya botlhole jwa bokake;

Meno* a noga ya lebolobolo a tla mmolaya.

17 Ga a kitla a tlhola a bona melatswana ya metsi,

Dinokana tsa tswina ya dinotshe le botoro.

18 O tla busa dithoto tsa gagwe a sa di ja;*

Ga a kitla a itumedisiwa ke khumo e e tswang mo kgwebong ya gagwe.+

19 Gonne o thubagantse bahumanegi e bile o ba phuagantse;

O gapile ntlo e a sa e agang.

20 Mme gone, ga a kitla a nna le kagiso mo go ene;

Khumo ya gagwe ga e kitla e mo thusa go falola.

21 Ga go a sala sepe se a ka se kometsang;

Ke gone ka moo katlego ya gagwe e se kitlang e nnela ruri.

22 Fa khumo ya gagwe e fitlha kwa setlhoeng, o tla welwa ke tlhobaelo;

O tla tlelwa ke dilo tsotlhe tse di bosula.

23 Fa a ntse a tlatsa mpa ya gagwe,

Modimo o tla mo romelela bogale jwa gagwe jo bo tukang

A bo tshololela mo go ene mo teng ga mala a gagwe.

24 Fa a tshaba dibetsa tsa tshipi,

Metswi e e tswang mo boreng jwa kopore e tla mo tlhaba.

25 O goga motswi go tswa mo mokwatleng wa gagwe,

Sebetsa se se tsabakelang go tswa mo santlhokong ya gagwe,

Mme o aparelwa ke letshogo.+

26 Matlotlo a gagwe a tla latlhelwa mo lefifing le lentshontsho;

O tla lailwa ke molelo o o sa butswelwang ke ope;

Bafalodi bape fela ba ba mo tenteng ya gagwe ba emetswe ke masetlapelo.

27 Legodimo le tla senola molato wa gagwe;

Lefatshe le tla mo tlhanogela.

28 Morwalela o tla gogola ntlo ya gagwe;

E tla nna metsi a mantsintsi a a elelang mo letsatsing la bogale jwa Modimo.*

29 Eno ke kabelo ya motho yo o bosula e e tswang kwa Modimong,

Boswa jo Modimo a bo mo abetseng.”