Dipesalema
Go mokaedi wa Gitithe.* Pesalema ya ga Asafe.+
81 Goelang ka boipelo kwa Modimong yo e leng nonofo ya rona.+
Goang ka boitumelo mme lo bake Modimo wa ga Jakobe.
2 Tlhabeletsang pina mme lo tseye moropana,
Harepa ya molodi o o monate mmogo le seletswa sa megala.
3 Letsang lonaka ka nako ya ngwedi yo mosha,+
Ka nako ya ngwedi yo o tletseng, lo le leletse letsatsi la moletlo wa rona.+
4 Gonne ke molao o o neilweng Iseraele,
Taelo e e tswang kwa Modimong wa ga Jakobe.+
5 Modimo o ne a e tlhoma gore e nne sengwe se se tla gopotsang Josefa+
Fa a ne a ya go tlhasela lefatshe la Egepeto.+
Ke ne ka utlwa lentswe* le ke neng ke sa le itse le re:
6 “Ke ne ka tsholetsa morwalo o o boima o o neng o le mo legetleng la gagwe;+
Ke ne ka tsaya mmanki* o o neng o le mo diatleng tsa gagwe.
7 O ne wa bitsa o le mo matshwenyegong, mme ke ne ka go golola;+
Ke ne ka go leka kwa metsing a Meriba.*+ (Selah)
8 Utlwang lona batho ba me, mme ke tla lo tlhagisa.
Wena Iseraele, e kete o ka ntheetsa.+
9 Ga go kitla go nna le modimo o sele mo gare ga lona,
E bile ga lo kitla lo ikobela modimo yo mongwe.+
10 Nna Jehofa, ke Modimo wa gago,
Yo o go ntshitseng kwa lefatsheng la Egepeto.+
Bula molomo wa gago thata, mme ke tla o tlatsa.+
11 Le fa go ntse jalo, batho ba me ga ba a ka ba reetsa lentswe la me;
Iseraele ga a ka a inkobela.+
12 Ka jalo, ke ne ka ba tlogela gore ba laolwe ke dipelo tsa bone tse di kgwaraletseng;
13 Fa fela batho ba me ba ne ba ka ntheetsa,+
Fa fela Iseraele a ne a ka tsamaya mo ditseleng tsa me,+
14 Ke ne ke tla fedisa baba ba bone ka bonako;
Ke ne ke tla tsholeletsa dira tsa bone seatla.+
15 Ba ba tlhoileng Jehofa ba tla ikokobetsa fa pele ga gagwe,
Mme diphelelo* tsa bone di tla nna ka bosakhutleng.