Dikgosi wa Ntlha

5 Fa Hirame kgosi ya Ture+ a utlwa gore Solomone o ne a tloditswe gore a nne kgosi mo boemong jwa ga rraagwe, o ne a romela batlhanka ba gagwe kwa go Solomone, ka gonne Hirame e ne e ntse e le tsala ya ga Dafide.*+ 2 Solomone le ene o ne a romela mongwe kwa go Hirame+ a re: 3 “O itse sentle gore rre e bong Dafide o ne a sa kgone go agela leina la ga Jehofa, Modimo wa gagwe ntlo ka ntlha ya dintwa tse di neng di lowa le ene go tswa mo matlhakoreng otlhe, go fitlha Jehofa a fenya baba ba gagwe.+ 4 Mme jaanong Jehofa, Modimo wa me o nneile boikhutso mo matlhakoreng otlhe.+ Ga go na ope yo o nkganetsang e bile ga go na sepe se se bosula se se diregang.+ 5 Ka jalo, ke ikaeletse go agela leina la ga Jehofa, Modimo wa me ntlo, fela jaaka Jehofa a ile a solofetsa Dafide rre a re: ‘Morwao yo ke tla mo tlhomang mo setulong sa gago sa bogosi mo boemong jwa gago, ke ene yo o tla agelang leina la me ntlo.’+ 6 Jaanong laela batho ba gago gore ba nthemele masedara a Lebanona.+ Batlhanka ba me ba tla bereka le batlhanka ba gago, mme ke tla duela batlhanka ba gago go ya ka tlhwatlhwa e o e bayang, ka gonne o itse sentle gore ga go na ope wa rona yo o itseng go rema ditlhare jaaka Basidona.”+

7 E rile Hirame a utlwa mafoko a ga Solomone, o ne a itumela thata a bo a re: “A Jehofa a bakwe gompieno, ka gonne o neile Dafide morwa yo o botlhale gore a okamele setšhaba seno se segolo!”*+ 8 Ka jalo, Hirame o ne a roma mongwe kwa go Solomone a re: “Ke utlwile molaetsa o o nthomeletseng one. Ke tla dira sotlhe se o se eletsang ka go go naya dikota tsa mosedara le tsa mofira.+ 9 Batlhanka ba me ba tla di tlisa kwa lewatleng go tswa kwa Lebanona, mme ke tla di bofaganya gore di tsamaye di kokobetse mo lewatleng di ya kwa lefelong le o tla le mpolelelang. Ke tla laela gore di bofololwe gone koo, mme o tla di tsaya teng. Mme wena o tla naya ba ba nnang mo ntlong ya me dijo tse ke tla di kopang.”+

10 Ka jalo, Hirame o ne a tlisa dikota tsa mosedara le tsa mofira tse Solomone a neng a di batla. 11 Mme Solomone o ne a naya Hirame korong ya dikilogerama di le 3 200 000* e le dijo tsa ba ba nnang mo ntlong ya gagwe le leokwane la motlhware le le a gaisang* la dilitara di le 4 400.* Seo ke se Solomone a neng a se naya Hirame ngwaga le ngwaga.+ 12 Jehofa o ne a naya Solomone botlhale, fela jaaka a ne a mo solofeditse.+ Mme go ne ga nna le kagiso fa gare ga ga Hirame le Solomone, mme boobabedi ba ne ba dira tumalano.*

13 Kgosi Solomone o ne a tlhopha banna mo Iseraele yotlhe gore ba mmerekele; go ne ga tlhophiwa banna ba le 30 000.+ 14 Kgwedi le kgwedi o ne a tle a romele setlhopha sa batho ba le 10 000 kwa Lebanona. Ba ne ba tle ba nne kgwedi yotlhe kwa Lebanona ba bo ba nna dikgwedi di le pedi kwa magaeng a bone; mme Adonirame+ o ne a okametse ba ba neng ba tlhophilwe gore ba berekele kgosi. 15 Solomone o ne a na le babereki* ba le 70 000 le batho ba ba segang maje+ mo dithabeng ba le 80 000,+ 16 mmogo le dikgosana+ tsa ga Solomone di le 3 300 tse di neng di direla e le balebedi ba ba okamelang badiri. 17 Kgosi e ne ya laela gore ba gabe maje a magolo a a turang,+ gore motheo+ wa ntlo o thaiwe ka maje a a betlilweng.+ 18 Ka jalo, baagi ba ga Solomone le baagi ba ga Hirame le Bagebale+ ba ne ba a sega, mme ba ne ba baakanya dikota le maje gore ba age ntlo.