Esekiele

36 “Mme wena morwa motho, bua le dithaba tsa Iseraele mme o re, ‘Lona dithaba tsa Iseraele, utlwang lefoko la ga Jehofa. 2 Seno ke se Morena Molaodimogolo Jehofa a se buang: “Mmaba o buile ka lona a re, ‘Ruri go a itumedisa! Tota le mafelo a a kwa godimo a bogologolo a fetogile a rona!’”’+

3 “Ka jalo porofeta mme o re, ‘Seno ke se Morena Molaodimogolo Jehofa a se buang: “E re ka ba lo kgakgabaditse e bile ba ne ba lo tlhasela go tswa mo dikarolong tsotlhe gore lo nne boswa jwa ba ba falotseng* go tswa mo ditšhabeng e bile batho ba nna ba bua ka lona e bile ba lo senya maina,+ 4 ka jalo lona dithaba tsa Iseraele, utlwang lefoko la Morena Molaodimogolo Jehofa! Morena Molaodimogolo Jehofa o bua le dithaba le dithota, melatswana le mekgatšha, marope a a neng a kgakgabadiwa le metse e e tlogetsweng+ e batho ba ba falotseng mo ditšhabeng tse di e dikologileng ba neng ba e gapa ba bo ba e sotla;+ 5 Morena Molaodimogolo Jehofa o raya dilo tseno a re: ‘Ke tla bua ke galefile thata+ le batho ba ba setseng mo ditšhabeng le Baedoma botlhe, ba ba neng ba itumela thata e bile ba sotla mo go botlhoko+ ba re lefatshe la me ke la bone, mme ba tlile go le gapa ka ntlha ya mafulo a lone.’”’+

6 “Ka jalo, porofeta ka ga lefatshe la Iseraele, mme o reye dithaba le dithota, le melatswana le mekgatšha o re, ‘Seno ke se Morena Molaodimogolo Jehofa a se buang: “Ke tla bua ke galefile e bile ke shakgetse, ka gonne lo ne lwa itshokela go tlontlololwa ke ditšhaba.”’+

7 “Ka jalo, seno ke se Morena Molaodimogolo Jehofa a se buang: ‘Ke ne ka tsholetsa seatla sa me ke ikana gore ditšhaba tse di lo dikologileng di tla rwala ditlhong tsa tsone.+ 8 Mme lona dithaba tsa Iseraele, lo tla tlhoga ditlhare tse di nang le dikala le maungo a mantsi a a tla jewang ke batho ba me ba Iseraele,+ ka gonne ba tloga ba boa. 9 Gonne ke na le lona, e bile ke tla leba kwa go lona, mme lo tla lemiwa lo bo lo jalwa peo. 10 Ke tla ntsifatsa batho ba ba nnang mo go lona, Baiseraele botlhe fela, mme ba tla nna mo metseng ya bone+ e bile ba tla tsosolosa marope.+ 11 Ruri ke tla ntsifatsa batho ba ba nnang mo go lona le diruiwa tsa lona;+ ba tla oketsega ba bo ba ata. Mme ke tla dira gore lo nniwe jaaka pele,+ e bile ke tla dira gore lo atlege thata go feta mo nakong e e fetileng;+ mme lo tla tshwanelwa ke go itse gore ke nna Jehofa.+ 12 Ke tla dira gore batho ba me ba Iseraele ba tsamaye mo go lona, mme ba tla lo rua.+ Lo tla nna boswa jwa bone, mme ga lo kitla lo tlhola lo dira gore ba se ka ba nna le bana.’”+

13 “Seno ke se Morena Molaodimogolo Jehofa a se buang: ‘E re ka ba lo raya ba re, “Lo lefatshe le le kometsang batho le le le amogang ditšhaba tsa lone bana,”’ 14 ‘ga lo kitla lo tlhola lo kometsa batho, e bile ga lo kitla lo tlhola lo dira gore ditšhaba tsa lona di se ka tsa nna le bana,’ go bua Morena Molaodimogolo Jehofa. 15 ‘Ga nkitla ke tlhola ke letla ditšhaba gore di go tlhapatse kgotsa ke dira gore o itshokele go kgobiwa ke ditšhaba,+ e bile ga o kitla o tlhola o dira gore ditšhaba tsa gago di kgopiwe,’ go bua Morena Molaodimogolo Jehofa.”

16 Mme Jehofa o ne a bua le nna gape a re: 17 “Morwa motho, fa batho ba Iseraele ba ne ba nna mo lefatsheng la bone, ba ne ba le leswafatsa ka tsela e ba neng ba tshela ka yone le ka dilo tse ba neng ba di dira.+ Mo go nna, tsela e ba neng ba itshwere ka yone e ne e tshwana le leswe la mosadi yo o mo kgweding.+ 18 Ka jalo, ke ne ka tshololela bogale jwa me mo go bone ka ntlha ya madi a ba neng ba a tshololetse mo nageng ya bone+ le ka gonne ba ne ba leswafatsa lefatshe ka medingwana ya bone e e ferosang sebete.*+ 19 Ke ne ka ba gasamisetsa kwa ditšhabeng tse dingwe e bile ke ne ka ba phatlalaletsa kwa dinageng tse dingwe.+ Ke ne ka ba atlhola go ya ka fa ba neng ba tshela ka gone le go ya ka dilo tse ba neng ba di dira. 20 Mme fa ba ne ba goroga kwa ditšhabeng tseo, batho ba ne ba dira gore leina la me le le boitshepo le se ka la tlhola le nna boitshepo+ ka go bua ka bone ba re, ‘Bano ke batho ba ga Jehofa, le fa go ntse jalo, ba ne ba tshwanelwa ke go tswa mo lefatsheng la gagwe.’ 21 Ka jalo, ke tla bontsha gore ke amega ka leina la me le le boitshepo, leina le batho ba Iseraele ba dirileng gore le se ka la tlhola le nna boitshepo kwa ditšhabeng tse ke ba gasamiseditseng kwa go tsone.”+

22 “Ka jalo, raya batho ba Iseraele o re, ‘Seno ke se Morena Molaodimogolo Jehofa a se buang: “Ga ke dire seno ka ntlha ya lona, lona batho ba Iseraele, mme ke se dira ka ntlha ya leina la me le le boitshepo, le lo dirileng gore le se ka la tlhola le nna boitshepo kwa ditšhabeng tse ke lo gasamiseditseng kwa go tsone.”’+ 23 ‘Ruri ke tla dira gore batho ba bone gore leina la me le legolo le boitshepo,+ le fa gone lo dirile gore batho ba ditšhaba tse dingwe ba se ka ba le tlotla; mme ditšhaba di tla tshwanelwa ke go itse gore ke nna Jehofa.+ Ke tla dira gore ba bone gore ke Modimo yo o boitshepo,’ go bua Morena Molaodimogolo Jehofa. 24 ‘Ke tla lo ntsha kwa ditšhabeng e bile ke tla lo phutha go tswa kwa dinageng tsotlhe ke bo ke lo tlisa mo nageng ya lona.+ 25 Ke tla lo kgatšha ka metsi a a phepa, mme lo tla nna phepa;+ ke tla lo tlhapisa leswe lotlhe+ la lona e bile ke tla tlosa medingwana ya lona e e ferosang sebete.+ 26 Ke tla fetola dipelo tsa lona+ le tsela e lo akanyang ka yone.+ Ke tla ntsha pelo ya leje+ mo mebeleng ya lona ke bo ke lo naya pelo ya nama.* 27 Ke tla dirisa maatla a me go fetola tsela e lo akanyang ka yone, e bile ke tla dira gore lo tsamaye mo melaong ya me,+ mme lo tla ikobela ditshwetso tsa me tsa boatlhodi lo bo lo di diragatsa. 28 Foo lo tla nna mo lefatsheng le ke neng ka le naya borraalonamogolo, mme lo tla nna batho ba me mme nna ke tla nna Modimo wa lona.’+

29 “‘Ke tla lo golola mo lesweng lotlhe la lona ke bo ke laela gore go nne le dijo tsa ditlhaka di le dintsi, mme ga nkitla ke lo tlisetsa leuba.+ 30 Ke tla dira gore maungo a ditlhare a nne mantsi le gore naga e ungwe thata, gore ditšhaba di se ka tsa tlhola di lo tlontlolola gape ka ntlha ya leuba.+ 31 Foo lo tla gakologelwa tsela e e bosula e lo neng lo itshwara ka yone le dilo tse di sa siamang tse lo neng lo di dira, mme lo tla itlhoa ka ntlha ya maleo a lona le ditiro tsa lona tse di makgapha.+ 32 Mme itseng seno: Ga ke dire seno ka ntlha ya lona,’+ go bua Morena Molaodimogolo Jehofa. ‘Go na le moo, tlhabiwang ke ditlhong lo bo lo ikutlwe lo tlontlologile ka ntlha ya tsela e lo itshwarang ka yone, lona batho ba Iseraele.’

33 “Seno ke se Morena Molaodimogolo Jehofa a se buang: ‘Mo letsatsing la fa ke tla bo ke lo tlhapisa ke tlosa maleo otlhe a lona,+ ke tla dira gore lo nne mo metseng ya lona lo bo lo tsosolose marope.+ 34 Naga e e kgakgabetseng e mongwe le mongwe yo o fetang ka tsela a neng a lemoga gore e kgakgabetse, e tla lemiwa. 35 Mme batho ba tla re: “Naga e e kgakgabetseng jaanong e tshwana le tshingwana ya Edene,+ le metse e e neng e le marope, e e neng e kgakgabetse e bile e thubilwe, jaanong e sireletsegile e bile batho ba nna mo go yone.”+ 36 Mme ditšhaba tse di setseng tse di go dikologileng di tla tshwanelwa ke go itse gore nna Jehofa, ke agile metse e e neng e thubilwe e bile ke jetse naga e e neng e kgakgabetse. Nna Jehofa, ke buile e bile ke dirile seo.’+

37 “Seno ke se Morena Molaodimogolo Jehofa a se buang: ‘Gape ke tla letla batho ba Iseraele gore ba nkope go ba direla seno: Ke tla dira gore batho ba bone ba nne bantsi jaaka letsomane. 38 Fela jaaka boidiidi jwa batho ba ba boitshepo, jaaka dinku mo Jerusalema* ka nako ya meletlo,+ metse e e neng e le marope e tla tlala ka batho ba bantsi;+ mme ba tla tshwanelwa ke go itse gore ke nna Jehofa.’”