Dipesalema
Pesalema. Pina ya letsatsi la Sabata.
92 Go molemo go go ntshetsa ditebogo Jehofa+
Le go opelela* leina la gago dipako, wena Mogodimodimo,
2 Go itsise lorato lwa gago lo lo sa kgaotseng+ mo mosong
Le boikanyegi jwa gago bosigo,
3 Ka seletswa sa megala e e lesome le ka lutu,
Ka molodi o o monate wa harepa.+
4 Gonne Jehofa, o dirile gore ke itumele ka ntlha ya ditiro tsa gago;
Ke goa ka boitumelo ka ntlha ya ditiro tsa diatla tsa gago.
5 Ruri ditiro tsa gago di dikgolo Jehofa!+
Ruri dikakanyo tsa gago di boteng thata!+
6 Ga go na motho ope yo o se nang tlhaloganyo yo o ka di itseng;
E bile ga go na motho ope yo o seeleele yo o ka tlhaloganyang seno:+
7 Fa batho ba ba sa siamang ba tlhoga jaaka mefero*
Le badirabosula botlhe ba atlega,
E a bo e le gore ba tle ba nyelediwe ka bosakhutleng.+
8 Mme o tlotlometse ka bosakhutleng Jehofa.
9 Bona fa baba ba gago ba wa Jehofa,
Bona kafa baba ba gago ba tla nyelelang ka gone;
Badirabosula botlhe ba tla gasama.+
10 Mme o tla oketsa maatla a me gore a nne jaaka a poo ya naga;
Ke tla kolobetsa letlalo la me ka leokwane le le lapolosang.+
11 Ke tla itumelela go bona baba ba me ba fenngwa;+
Ke tla utlwa gore batho ba ba bosula ba ba ntlhaselang ba sentswe.
12 Mme basiami ba tla gola jaaka setlhare sa mokolane
E bile ba tla gola thata jaaka mosedara wa kwa Lebanona.+
13 Ba jadilwe mo ntlong ya ga Jehofa;
Ba golela mo malwapeng a Modimo wa rona.+
14 Tota le fa ba tsofetse* ba tla tswelela ba atlega;+
Ba tla tswelela ba le matlhagatlhaga* e bile ba itekanetse,+
15 Ba itsise gore Jehofa o siame.
Ke Lefika la me,+ le go se nang tshiamololo mo go lone.