Samuele wa Ntlha

30 E rile Dafide le banna ba gagwe ba goroga kwa Sikelage+ mo letsatsing la boraro, Baamaleke+ ba ne ba tlhasetse kwa borwa* le kwa Sikelage, mme ba ne ba tlhasetse Sikelage ba bo ba e fisa ka molelo. 2 Ba ne ba isitse basadi+ le botlhe ba ba neng ba le mo go yone botshwarwa, go simolola ka yo mmotlana thata go fitlha ka yo mogolo thata. Ba ne ba sa bolaya ope, mme ba ne ba ba tsaya ba bo ba tsamaya ka bone. 3 Fa Dafide le banna ba gagwe ba goroga mo motseng, ba ne ba fitlhela o fisitswe ka molelo, e bile basadi ba bone le bomorwaabone le bomorwadiabone ba ne ba isitswe botshwarwa. 4 Ka jalo, Dafide le banna ba ba neng ba na le ene ba ne ba goa ba lela go fitlha ba sa tlhole ba na le maatla a go lela. 5 Basadi ba ga Dafide ba babedi le bone ba ne ba isitswe botshwarwa, Ahinoame wa kwa Jesereele le Abigaile motlholagadi wa ga Nabale wa Mokaremele.+ 6 Dafide o ne a tshwenyegile thata, ka gonne banna bao ba ne ba re ba mo kgobotletsa ka maje ka gonne batho botlhe ba ne ba utlwile botlhoko thata ka ntlha ya bomorwaabone le bomorwadiabone. Le fa go ntse jalo, Dafide o ne a inonotsha ka Jehofa, Modimo wa gagwe.+

7 Foo Dafide o ne a raya moperesiti Abiathare,+ morwa Ahimeleke a re: “Tsweetswee, tlisa khiba kwano.”+ Ka jalo, Abiathare o ne a tlisa khiba kwa go Dafide. 8 Dafide o ne a botsa Jehofa+ jaana: “A ke lelekise setlhopha seno sa dirukutlhi? A ke tla ba tshwara?” Fa a rialo, Modimo o ne a mo raya a re: “Ba lelekise, ka gonne ruri o tla ba tshwara, mme o tla golola batho ba lona.”+

9 Ka yone nako eo, Dafide o ne a tsena mo tseleng le banna ba le 600+ ba ba neng ba na le ene, mme ba ne ba tsamaya go ya go fitlha kwa Molapong wa Besore, kwa bangwe ba banna bao ba neng ba sala gone. 10 Dafide o ne a nna a ba lelekisa a na le banna ba le 400, mme banna ba le 200 ba ne ba sala ka gonne ba ne ba lapile thata mo ba neng ba palelwa ke go kgabaganya Molapo wa Besore.+

11 Ba ne ba fitlhela monna mongwe wa Moegepeto mo nageng mme ba ne ba mo isa kwa go Dafide. Ba ne ba mo naya dijo gore a je le metsi gore a nwe, 12 mmogo le thathana ya kuku e e dirilweng ka difeige tse di kgobilweng le dikuku tse pedi tse di dirilweng ka morara* o o swabisitsweng. Fa a sena go ja, o ne a nna le maatla gape,* ka gonne o ne a na le malatsi a le mararo le masigo a le mararo a sa je sepe e bile a sa nwe sepe. 13 Jaanong Dafide o ne a mmotsa jaana: “O motlhanka wa ga mang, mme o tswa kae?” mme ene o ne a re: “Ke motlhokomedi wa Moegepeto, motlhanka wa monna mongwe wa Moamaleke, le fa go ntse jalo mong wa me o ne a ntlogela ka gonne ke ne ka lwala malatsi a le mararo a a fetileng. 14 Re ne ra tlhasela kwa borwa jwa* Bakeretha+ le mo nageng ya Juda le kwa borwa jwa* Kalebe,+ mme Sikelage re ne ra e fisa ka molelo.” 15 Foo Dafide o ne a mo raya a re: “A o tla nkisa kwa setlhopheng seno sa dirukutlhi?” Ene o ne a araba jaana: “Fa o inkanela ka Modimo gore ga o kitla o mpolaya le gore ga o kitla o nkisa kwa go mong wa me, ke tla go isa kwa setlhopheng seno sa dirukutlhi.”

16 Ka jalo, o ne a mo isa kwa ba neng ba ntse teng, ba ja, ba nwa e bile ba itumeletse dilo tse dintsi tse ba neng ba di gapile kwa lefatsheng la Bafilisitia le kwa lefatsheng la Juda. 17 Foo Dafide o ne a ba kgemetha go tloga mo mosong go sa ntse go le lefitshwana go fitlha maitseboa a a latelang; ga go na monna yo o neng a falola+ ntle le banna ba le 400 ba ba neng ba tshaba ba palame dikamela. 18 Dafide o ne a tsaya sotlhe se Baamaleke ba neng ba se tsere,+ mme Dafide o ne a golola basadi ba gagwe ba babedi. 19 Ga go na sepe sa bone se se neng se tlhaela, go simolola ka se sebotlana go fitlha ka se segolo. Ba ne ba tsaya bomorwaabone le bomorwadiabone le dilo tse ba neng ba di gapile;+ Dafide o ne a golola sengwe le sengwe se ba neng ba se tsere. 20 Ka jalo, Dafide o ne a tsaya matsomane otlhe le metlhape yotlhe, mme banna ba gagwe ba ne ba e kgweetsa kwa pele ga leruo la bone. Ba ne ba re: “Tseno ke dilo tse Dafide a di gapileng.”

21 Go tswa foo, Dafide o ne a goroga kwa banneng ba le 200 ba ba neng ba lapile thata ba ba neng ba paletswe ke go tsamaya le ene e bile ba ne ba setse kwa Molapong wa Besore,+ mme ba ne ba tswa ba tla go kgatlhantsha Dafide le batho ba ba nang le ene. Fa Dafide a atamela banna bao, o ne a ba botsa gore ba ne ba tsoga jang. 22 Le fa go ntse jalo, monna mongwe le mongwe yo o bosula le yo o se nang mosola mo go ba ba neng ba tsamaile le Dafide o ne a re: “E re ka ba ne ba sa tsamaya le rona, ga re kitla re ba naya dilo dipe tse re di golotseng ntle le gore mongwe le mongwe wa bone a ka nna a tsaya mosadi wa gagwe le bomorwawe mme a tsamaya.” 23 Mme gone, Dafide o ne a re: “Bomorwarra, ga lo a tshwanela go dira jalo ka se Jehofa a se re neileng. O ne a re sireletsa a bo a tsenya setlhopha sa dirukutlhi se se neng se tlile go re tlhasela mo seatleng sa rona.+ 24 Ke mang yo o tla dumalanang le lona mo kgannyeng eno? Kabelo ya yo o neng a ile tlhabanong e tla lekana le kabelo ya yo o neng a setse le dithoto.+ Botlhe ba tla nna le kabelo.”+ 25 Mme go tloga mo letsatsing leo go ya pele, o ne a tlhoma seo e le taelo le molao mo Iseraele go fitlha mo letsatsing leno.

26 E rile Dafide a boela kwa Sikelage, o ne a tsaya dilo dingwe mo go tse di gapilweng a bo a di romela kwa bagolwaneng ba Juda ba e neng e le ditsala tsa gagwe a re: “Mpho* ya lona ke eno e e tswang mo dilong tse di gapilweng mo babeng ba ga Jehofa.” 27 O ne a e romela kwa bagolwaneng ba ba neng ba le kwa Bethele,+ kwa Ramothe wa Negebe,* kwa Jatire,+ 28 kwa Aroere, kwa Sifemothe, kwa Eshetemoa,+ 29 kwa Rakale, kwa metseng ya Bajerameele,+ kwa metseng ya Bakene,+ 30 kwa Horema,+ kwa Borashane, kwa Athake, 31 kwa Heberone+ le kwa mafelong otlhe a Dafide le banna ba gagwe ba neng ba ntse ba tsamaya mo go one.