JOELE
1 Leno ke lefoko la ga Jehofa le le neng la tla mo go Joele* morwa Pethuele:
2 “Utlwang seno, lona bagolwane,
Mme lo tlhwaye tsebe, lona batho botlhe ba ba nnang mo lefatsheng.
A go kile ga direga selo se se tshwanang le seno mo malatsing a lona,
Kgotsa mo malatsing a borraalonamogolo?+
3 Se boleleleng bomorwaalona,
Mme a bomorwaalona ba se bolelele bomorwaabone,
Le bomorwaabone ba se bolelele kokomana e e latelang.
4 Se se sadisitsweng ke tsie e e jang sengwe le sengwe, se jelwe ke lesogodi la tsie;+
Mme se se sadisitsweng ke lesogodi la tsie, se jelwe ke tsie e e se nang diphuka;
E bile se se sadisitsweng ke tsie e e se nang diphuka, se jelwe ke tsie e e senyang.+
5 Tsogang lona matagwa,+ mme lo lele!
Bokolelang, lona lotlhe ba lo nwang beine,
Ka gonne beine e e botshe e tlositswe mo melomong ya lona.+
6 Gonne setšhaba se se maatla le se se se nang palo, se tlile mo lefatsheng la me.+
Meno a sone a tshwana le a tau,+ le ditlhaa tsa sone di tshwana le tsa tau.
7 Se sentse morara* wa me sa bo sa dira gore setlhare sa me sa mofeige e nne sesana,
Se di ntshitse makwati, se di tlhotlhorile tsotlhe fela,
Sa bo sa tlogela dikalana tsa tsone di le ditshweu.
8 Bokolelang jaaka kgarebane* e e apereng letsela la kgetsi
E e hutsafaletseng loso lwa monna yo a neng a tlile go e nyala.*
9 Setlhabelo sa dijo tsa ditlhaka+ le setlhabelo sa senô+ ga di tlhole di le teng mo ntlong ya ga Jehofa;
Baperesiti, e leng badiredi ba ga Jehofa, ba mo khutsafalong.
10 Tshimo e kgakgabetse, mmu o hutsafetse;+
Gonne dijo tsa ditlhaka di sentswe, beine e ntšha e kgadile, leokwane le fedile.+
11 Balemi ba kotlomane pelo, batho ba ba berekang mo masimong a morara ba a bokolela
Ka ntlha ya korong le barele;*
Ka gonne thobo e nyeletse mo tshimong.
12 Morara o omeletse,
Setlhare sa mofeige se swabile.
Setlhare sa garanata, sa mokolane le sa diapole,
Ditlhare tsotlhe tsa tshimo di omeletse;+
Gonne boitumelo bo fetogile matlhabisaditlhong mo bathong.
13 Aparang letsela la kgetsi* mme lo hutsafale,* lona baperesiti;
Bokolelang, lona ba lo direlang mo sebesong.+
Tsenang mme lo lale mo letseleng la kgetsi, lona ba lo direlang Modimo wa me;
Gonne setlhabelo sa dijo tsa ditlhaka+ le setlhabelo sa senô+ ga di tlhole di tlisiwa mo ntlong ya Modimo wa lona.
14 Laelang* batho gore ba itime dijo; itsiseng gore go na le kopano e e kgethegileng.+
Phuthelang bagolwane le batho botlhe ba ba nnang mo lefatsheng leno,
Kwa ntlong ya ga Jehofa, Modimo wa lona,+ mme lo goele kwa go Jehofa lo kope thuso.
15 A letsatsi la masetlapelo ruri!
Letsatsi la ga Jehofa le gaufi,+
Mme le tla tlisa tshenyo e e tswang kwa go Mothatayotlhe!
16 A dijo ga di a tlosiwa fa pele ga rona re ntse re lebile,
E bile a boitumelo le boipelo ga di a tlosiwa mo ntlong ya Modimo wa rona?
17 Dipeo* di swabetse ka fa tlase ga digarawe tsa bone.
Mabolokelo a kgakgabetse.
Difalana* di rutlolotswe, ka gonne dijo tsa ditlhaka di omeletse.
18 Tota le diruiwa di utlwile botlhoko!
Metlhape ya dikgomo e kgarakgatshega e tlhakane tlhogo ka gonne ga e na mafulo!
E bile matsomane a dinku a a boga ka ntlha ya kotlhao eo.
19 Jehofa, ke tla biletsa kwa go wena;+
Gonne molelo o laitse mafulo kwa nageng,
Le ditlhare tsotlhe tsa naga di jelwe ke kgabo ya molelo.
20 Tota le diphologolo tsa naga di go tlhologeletswe,
Ka gonne melatswana ya metsi e kgadile
E bile molelo o laitse mafulo kwa nageng.”
2 “Letsang lonaka mo Siona!+
Tlhabang mokgosi wa ntwa mo thabeng ya me e e boitshepo.
A batho botlhe ba ba nnang mo lefatsheng ba rorome,
Ka gonne letsatsi la ga Jehofa le etla!+ Le gaufi!
2 Ke letsatsi la lefifi le la letobo,+
Letsatsi la maru le la letobo le lentshontsho,+
Le tshwana le lesedi la bosa le anama mo dithabeng.
Go na le setšhaba sa batho ba bantsintsi ba ba maatla;+
Ga go ise go ke go nne le setšhaba sepe se se tshwanang le sone,
E bile ga go kitla go nna le se sengwe gape
Go ralala dingwaga mo dikokomaneng tsotlhe.
3 Kwa pele ga sone molelo o a laila,
Mme kwa morago ga sone kgabo ya molelo e a ja.+
Lefatshe le le kwa pele ga sone le tshwana le tshingwana ya Edene,+
Le fa go ntse jalo, kwa morago ga sone ke naga e e kgakgabetseng,
E bile ga go na sepe se se kgonang go falola.
4 Batho bano ba tshwana le dipitse,
E bile ba taboga jaaka dipitse tsa ntwa.+
5 Modumo wa bone o utlwala jaaka wa dikara fa ba ntse ba tlola kwa godimo ga dithaba,+
O utlwala jaaka modumo wa molelo o o babolang o o lailang lotlhaka.
Ba tshwana le setšhaba se se maatla se se tlhomaganeng go ya ka thulaganyo ya tlhabano.+
6 Ditšhaba di tla roroma ka ntlha ya bone.
Difatlhego tsotlhe di tla aparelwa ke poifo.
7 Ba tlhasela jaaka batlhabani,
Ba palama lobota jaaka masole,
Mongwe le mongwe o tsamaya ka tsela ya gagwe,
E bile ga ba fapoge mo ditselaneng tsa bone.
8 Ga ba kgorometsane;
Mongwe le mongwe o tswelela a tsamaya mo tseleng ya gagwe.
Fa bangwe ba wa ba bolawa ke dibetsa,*
Ba bangwe ga ba phatlalale.
9 Ba itatlhela* mo motseng, ba taboga mo loboteng.
Ba palama mo godimo ga matlo, ba tsena ka difensetere jaaka legodu.
10 Lefatshe le roroma fa pele ga bone e bile magodimo a a reketla.
Letsatsi le ngwedi di fifetse,+
Dinaledi le tsone ga di tlhole di phatsima.
11 Jehofa o tla tsholetsa lentswe la gagwe fa pele ga masole a gagwe,+ ka gonne masole a gagwe a mantsi thata.+
Gonne yo o diragatsang lefoko la Modimo o maatla;
Gonne letsatsi la ga Jehofa le legolo e bile le a boitshega.+
Ke mang yo o ka le itshokelang?”+
12 Jehofa a re, “Tota le gone jaanong boelang mo go nna ka dipelo tsa lona tsotlhe,+
Lo itime dijo,+ lo lele lo bo lo bokolele.
13 Gagoganyang dipelo tsa lona,+ e seng diaparo tsa lona,+
Mme lo boele kwa go Jehofa, Modimo wa lona,
Ka gonne o pelotlhomogi* e bile o kutlwelobotlhoko, ga a galefe ka bonako+ e bile o na le lorato lo logolo lo lo sa kgaotseng,+
Mme o tla fetola mogopolo* mme ga a kitla a lo tlisetsa masetlapelo ao.
14 Ke mang yo o itseng gore a o tla fetola mogopolo,*+
A bo a lo segofatsa
Gore lo kgone go ntshetsa Jehofa, Modimo wa lona setlhabelo sa dijo tsa ditlhaka le setlhabelo sa senô?
15 Letsang lonaka mo Siona!
Laelang* batho gore ba itime dijo; itsiseng gore go na le kopano e e kgethegileng.+
16 Phuthang batho; dirang gore phuthego e nne boitshepo.+
Kokoanyang bannabagolo;* phuthang bana le masea a a anyang.+
A monyadi a tswe mo phaposing ya gagwe e e kwa teng, le monyadiwa a tswe mo ntlwaneng ya gagwe ya lenyalo.
17 A baperesiti, e leng badiredi ba ga Jehofa,
Ba eme fa gare ga mathudi le sebeso+ mme ba lele ba re:
‘Ao tlhe Jehofa, utlwela batho ba gago botlhoko;
O se ka wa dira gore boswa jwa gago e nne selo se se sotliwang,
Wa letla gore ditšhaba di ba laole.
Ke ka ntlha yang fa ditšhaba di tshwanetse gore, “Modimo wa bone o kae?”’+
18 Foo Jehofa o tla sireletsa lefatshe la gagwe ka tlhagafalo
A bo a tlhomogela batho ba gagwe pelo.+
19 Jehofa o tla araba batho ba gagwe jaana:
‘Jaanong ke lo romelela dijo tsa ditlhaka le beine e ntšha le leokwane,
Mme lo tla kgotsofala;+
Ga nkitla ke tlhola ke dira gore ditšhaba di lo kgobe.+
20 Ke tla lelekela motho wa bokone kgakala le lona;
Ke tla mo phatlalaletsa kwa lefatsheng le le omeletseng le le le kgakgabetseng,
Masole a gagwe a a sireletsang kwa pele ke tla a phatlalaletsa kwa ntlheng ya lewatle la botlhaba*
Mme masole a gagwe a a sireletsang kwa morago ke tla a phatlalaletsa kwa ntlheng ya lewatle la bophirima.*
Monko o o bosula o o tswang mo go ene o tla tlhatloga,
Sebodu se se tswang mo go ene se tla tswelela se tlhatloga;+
Gonne Modimo o tla dira dilo tse dikgolo.’
21 O se ka wa boifa, wena lefatshe.
Ipele o bo o itumele, ka gonne Jehofa o tla dira dilo tse dikgolo.
22 Lo se ka lwa boifa, lona diphologolo tsa naga,
Gonne mafulo a naga a tla nna matala,+
E bile ditlhare di tla ntsha maungo;+
23 Lona bomorwa Siona, ipeleng lo bo lo itumele ka ntlha ya ga Jehofa, Modimo wa lona;+
Ka gonne o tla lo nesetsa pula ya letlhabula ka selekanyo se se siameng,
E bile o tla lo nesetsa pula e ntsi,
Pula ya letlhabula le pula ya dikgakologo, fela jaaka a ne a dira pele.+
24 Diboana di tla tlala dijo tsa ditlhaka,
Mme digatisetso di tla penologa beine e ntšha le leokwane.+
25 Mme ke tla lo busetsa dilo tse di neng tsa senyega mo dingwageng
Tsa fa lesogodi la tsie, tsie e e se nang diphuka, tsie e e senyang le tsie e e jang sengwe le sengwe di ne di tlhasela,
E leng mophato wa me o mogolo o ke neng ke o rometse mo go lona.+
26 Ruri lo tla ja gore lo bo lo kgotsofale,+
Mme lo tla baka leina la ga Jehofa, Modimo wa lona,+
Yo o lo diretseng dilo tse di gakgamatsang;
Batho ba me ga ba kitla ba tlhola ba tlhabisiwa ditlhong gape.+
27 Mme lo tla tshwanelwa ke go itse gore ke mo gare ga Iseraele,+
Le gore ke nna Jehofa, Modimo wa lona,+ ga go na ope o sele.
Batho ba me ga ba kitla ba tlhola ba tlhabisiwa ditlhong gape.
28 Morago ga moo, ke tla tshololela moya wa me mo bathong ba* mofuta mongwe le mongwe,+
Mme bomorwaalona le bomorwadialona ba tla porofeta,
Bannabagolo ba lona ba tla lora ditoro,
Le makawana a lona a tla bona diponatshegelo.+
29 Tota e bile mo malatsing ao ke tla tshololela moya wa me
Le mo batlhankeng ba me le mo malateng a me.
30 Mme ke tla dira dikgakgamatso kwa magodimong le mo lefatsheng,
Madi le molelo le mosi o montsintsi o o tlhatlogang.+
31 Pele ga letsatsi le legolo le le boitshegang la ga Jehofa le tla,+
Letsatsi le tla fetoga lefifi, mme ngwedi e tla fetoga madi.+
32 Mme mongwe le mongwe yo o bitsang leina la ga Jehofa o tla bolokwa;+
Gonne kwa Thabeng ya Siona le kwa Jerusalema go tla nna le ba ba falolang,+ fela jaaka Jehofa a boletse,
E leng bafalodi ba Jehofa a ba bitsang.”
3 “Gonne mo malatsing ao le mo nakong eo,
Fa ke tla bo ke busa batho ba Juda le ba Jerusalema ba ba isitsweng botshwarwa,+
2 Gape ke tla phutha ditšhaba tsotlhe
Ke tla di sekisa teng koo+
Ka ntlha ya batho ba me le boswa jwa me, e leng Iseraele,
Gonne di ne tsa ba gasamisetsa mo ditšhabeng,
Mme di ne tsa ikgaoganyetsa lefatshe la me.+
3 Ba ne ba dirisa bola go kgaoganya batho ba me;+
Ba ne ba tle ba rekise ngwana wa mosimane gore ba thape seaka,
E bile ba ne ba tle ba rekise ngwana wa mosetsana gore ba nne le beine e ba tla e nwang.
4 Mme gone, tota lo lwela eng le nna,
Wena Ture le Sidona le dikgaolo tsotlhe tsa Filisitia?
A go na le sengwe se se dirang gore lo ipusolosetse?
Fa e le gore lo a ipusolosetsa,
Ke tla busetsa pusoloso eo mo ditlhogong tsa lona ka bofefo le ka bonako.+
5 E re ka lo tsere selefera le gauta ya me,+
Mme lo tlisitse matlotlo a me a a tlhwatlhwakgolo mo ditempeleng tsa lona;
6 E bile lo tsere batho ba Juda le ba Jerusalema lwa ba rekisetsa Bagerika,+
E le gore lo ba katosetse kgakala le naga ya bone;
7 Jaanong ke dira gore ba tswe kwa lefelong le lo ba rekiseditseng kwa go lone,+
Ke tla busetsa pusoloso ya lona mo ditlhogong tsa lona.
8 Ke tla tsenya bomorwaalona le bomorwadialona mo seatleng sa batho ba Juda,+
Mme ba tla ba rekisetsa banna ba kwa Sheba, e leng setšhaba se se kwa kgakala;
Gonne Jehofa ka boene o buile seno.
9 Itsiseng seno mo ditšhabeng:+
‘Ipaakanyetseng* ntwa! Kurusang banna ba ba maatla!
A masole otlhe a atamele, a ba ye go tlhasela!+
10 Fetolang magale a megoma ya lona gore e nne ditšhaka le dikere tsa lona tse di pomang gore e nne marumo.
A yo o bokoa a re: “Ke maatla.”
11 Tlang mme lo thuse, lona lotlhe ditšhaba tse di mo tikologong, phuthegang mmogo!’”+
Folosetsa batho ba gago ba ba maatla* kwa lefelong leo, tlhe Jehofa.
12 “A ditšhaba di kurusiwe mme di tle kwa Mokgatšheng* wa Jehoshafate;
Gonne ke tla nna koo gore ke atlhole ditšhaba tsotlhe tse di mo tikologong.+
13 Robang ka gonne e setse e le nako ya thobo.
Tlang mme lo gatake, ka gonne segatisetso sa beine se tletse.+
Dinkgo di a penologa, ka gonne bosula jwa ditšhaba tseo bo bogolo.
14 Boidiidi, boidiidi bo kwa mokgatšheng* wa katlholo,
Gonne letsatsi le Jehofa a tla atlholelang batho koo ka lone le gaufi.+
15 Letsatsi le ngwedi di tla fifala,
E bile dinaledi ga di kitla di phatsima.
16 Jehofa o tla kurutla a le kwa Siona,
O tla tlhatlosa lentswe la gagwe a le kwa Jerusalema.
Mme legodimo le lefatshe di tla reketla;
Le fa go ntse jalo, Jehofa o tla nna botshabelo jwa batho ba gagwe,+
Kago ya phemelo ya batho ba Iseraele.
17 Mme lo tla tshwanelwa ke go itse gore ke nna Jehofa, Modimo wa lona, yo o nnang mo Siona, thaba ya me e e boitshepo.+
18 Mo letsatsing leo, dithaba di tla rotha beine e e botshe,+
Dithota di tla elela mashi,
E bile melatswana yotlhe ya Juda e tla elela metsi.
Motswedi o tla elela o tswa kwa ntlong ya ga Jehofa,+
Mme o tla nosetsa Mokgatšha* wa Ditlhare Tsa Mokala.
19 Le fa go ntse jalo, Egepeto e tla kgakgabala,+
Le Edoma e tla nna naga e e kgakgabetseng,+
Ka ntlha ya tshiamololo e ba e diretseng batho ba Juda,+
Ka go tsholola madi a a se nang molato mo lefatsheng la bone.+
20 Mme go tla nna go na le batho ba ba nnang mo Juda,
Jerusalema le yone e tla nniwa kokomana morago ga kokomana.+
21 Ke tla ba tsaya ba se na molato,* le fa gone ke ne ke ba tsaya ba le molato;+
Mme nna Jehofa, ke tla nna mo Siona.”+
Mo go kayang “Jehofa ke Modimo.”
Kgotsa “diterebe; moretlwa.”
Kgotsa “lekgarebe; morweetsana.”
Seheb., “monna wa bosha jwa yone.”
Semela se se tshwanang le korong.
Seheb., “Ikgatlheng.”
Kgotsa “lo ititeye dihuba.”
Seheb., “Itshepiseng.”
Kgotsa gongwe “Difeige tse di omisitsweng.”
Kgotsa “Mabolokelo.”
Kgotsa “dimmisaele.”
Kgotsa “gatlhamela.”
Kgotsa “pelontle.”
Kgotsa “o tla ikwatlhaya.”
Kgotsa “o tla ikwatlhaya.”
Seheb., “Itshepiseng.”
Kgotsa “bagolwane.”
Go tewa Lewatle le le Suleng.
Go tewa Lewatle la Mediterranean.
Kgotsa “diterebe; moretlwa.”
Seheb., “mo nameng ya.”
Kgotsa “kwa Lebaleng le le Kwa Tlase.”
Mo go kayang “Jehofa ke Moatlhodi.”
Seheb., “Itshepiseng.”
Kgotsa “batlhabani ba gago.”
Kgotsa “kwa Lebaleng le le Kwa Tlase.”
Kgotsa “kwa lebaleng le le kwa tlase.”
Kgotsa “Molapo.”
Seheb., “Ke tla tsaya madi a bone a se na molato.”