SEFANIA
1 Seno ke se Jehofa a neng a se bolelela Sefania* morwa Kushi morwa Gedalia morwa Amaria morwa Hesekia mo motlheng wa ga Josia+ morwa Amone+ kgosi ya Juda:
2 “Ke tla fedisa sengwe le sengwe mo lefatsheng,” go bua Jehofa.+
3 “Ke tla fedisa batho le diphologolo.
Ke tla fedisa dinonyane le ditlhapi,+
Le dikgoreletsi*+ mmogo le badirabosula;
Mme ke tla tlosa batho mo lefatsheng,” go bua Jehofa.
4 “Ke tla otlololela Juda seatla sa me
E bile ke tla otlololela banni botlhe ba Jerusalema seatla sa me,
Mme ke tla fedisa masalela* a ga Baale mo lefelong leno,+
E leng leina la baperesiti ba medimo e sele mmogo le baperesiti ba teng,+
5 Le ba ba ikobelang masomosomo a magodimo ba le mo marulelong,+
Le ba ba ikobelang Jehofa e bile ba bolela gore ba ikanyega mo go ene+
Mme ka fa letlhakoreng le lengwe ba ikobela Malekame;+
6 Le ba ba tlogelang go sala Jehofa morago+
Le ba ba sa batleng Jehofa e bile ba sa kope kgakololo mo go ene.”+
7 Didimalang fa pele ga Morena Molaodimogolo Jehofa, ka gonne letsatsi la ga Jehofa le gaufi.+
Jehofa o dirile setlhabelo; o tlhophile* ba a ba laleditseng.
8 “Mo letsatsing le nna Jehofa ke tla ntshang setlhabelo ka lone, ke tla atlhola dikgosana,
Bomorwa kgosi,+ le botlhe ba ba apereng diaparo tsa mafatshe a sele.
9 Ke tla atlhola mongwe le mongwe yo o palamang serala* mo letsatsing leo,
Ba ba tlatsang ntlo ya mong wa bone ka thubakanyo le tsietso.”
10 Jehofa a re, “Mo letsatsing leo,
Go tla utlwala modumo wa selelo o tswa kwa Kgorong ya Ditlhapi,+
Modumo wa go bokolela o tswa kwa Karolong ya Bobedi ya motse,+
Le modumo o mogolo o tswa kwa dithoteng.
11 Bokolelang lona banni ba Makateshe,*
Ka gonne barekisi* botlhe ba nyeleditswe;*
Botlhe ba ba lekanyang bokete jwa selefera ba sentswe.
12 Ka nako eo, ke tla tlhatlhoba Jerusalema ka kelotlhoko ka dipone,
Mme ke tla atlhola batho ba ba sa tshwenyegeng ka sepe,* ba ba buang mo pelong ya bone ba re,
‘Jehofa ga a kitla a dira molemo, e bile ga a kitla a dira bosula.’+
13 Dikhumo tsa bone di tla gapiwa le matlo a bone a tla senngwa.+
Ba tla aga matlo, mme ga ba kitla ba nna mo go one;
E bile ba tla jala masimo a morara,* mme ga ba kitla ba nwa beine ya one.+
14 Letsatsi le legolo la ga Jehofa le gaufi!+
Le gaufi e bile le atamela ka bonako!*+
Letsatsi la ga Jehofa le tla bo le boifisa.+
Mo letsatsing leo, motlhabani o tla goa.+
15 Letsatsi leo ke letsatsi la tšhakgalo,+
Letsatsi la matshwenyego le la pitlagano e kgolo,+
Letsatsi la matsubutsubu le la thubakanyo,
Letsatsi la lefifi,+
Letsatsi la maru le lefifi le lentshontsho,+
16 Letsatsi la modumo wa lonaka le mokgosi wa tlhabano,+
Le le tlelang metse e e sireletsegileng le ditora tse di goletseng kwa godimo tse di mo dikhoneng.+
17 Ke tla dira gore batho ba tshwenyege thata,
Mme ba tla tsamaya jaaka batho ba ba foufetseng,+
Ka gonne ba leofetse Jehofa.+
18 Selefera ya bone kgotsa gauta ya bone ga e kitla e ba golola mo letsatsing la tšhakgalo ya ga Jehofa;+
Gonne lefatshe lotlhe le tla lailwa ke molelo wa bogale jwa gagwe,+
Ka gonne o tla fedisa batho ba ba nnang mo lefatsheng, ruri o tla ba fedisa ka tsela e e tshosang.”+
2 Pele ga taelo e diragadiwa,
Pele ga letsatsi le feta fela jaaka mmoko,
Pele ga bogale jo bo tukang jwa ga Jehofa bo tla mo go lona,+
Pele ga letsatsi la bogale jwa ga Jehofa le tla mo go lona,
3 Tlang mo go Jehofa,+ lona lotlhe ba ba pelonolo* ba ba mo lefatsheng,
Ba lo ikobelang ditaelo tsa gagwe tse di siameng.*
Nnang lo dire se se siameng e bile lo nne pelonolo.*
Gongwe lo ka nna lwa* sirelediwa* mo letsatsing la bogale jwa ga Jehofa.+
4 Gonne Gasa e tla nna motse o o tlogetsweng;
Mme Ashekelona e tla fetoga sekaka.+
5 “Ruri go latlhega ba ba nnang fa losing lwa lewatle, setšhaba sa Bakeretha!+
Jehofa o lo atlhotse batho ke lona.
Wena Kanana, lefatshe la Bafilisitia, ke tla go senya,
Gore go se ka ga sala monni ope mo go wena.
6 Mme kgaolo e e fa losing lwa lewatle e tla nna mafulo
A a nang le didiba tsa badisa le masaka a dinku a a dirilweng ka maje.
7 E tla nna kgaolo ya batho ba ba setseng ba Juda;+
Ba tla fula gone koo.
Ba tla rapama mo matlong a Ashekelona maitseboa.
Gonne Jehofa, Modimo wa bone o tla ba gopola,*
Mme o tla phutha batho ba bone ba ba neng ba isitswe botshwarwa.”+
8 “Ke utlwile kgobo ya Bamoabe+ le matlhapa a Baamone,+
Ba ba neng ba kgoba batho ba me e bile ba bua ka boikgodiso ba re ba tla gapa naga ya bone.+
9 Ka jalo, ke ikana ka nna,” go bua Jehofa wa masomosomo, Modimo wa Iseraele,
“Moabe o tla nna fela jaaka Sodoma,+
Mme Amone* o tla nna jaaka Gomora,+
Lefelo la dibabetsane, khuti ya letswai le lefelo le le sa nniweng.+
Batho ba me ba ba setseng ba tla ba gapela,
E bile masalela a setšhaba sa me a tla ba leleka mo lefatsheng la bone.
10 Seno ke sone se ba tla se amogelang ka ntlha ya boikgogomoso jwa bone,+
Ka gonne ba ne ba kgoba batho ba ga Jehofa wa masomosomo e bile ba ne ba ba ikgodisetsa.
11 Jehofa o tla nna yo o boitshegang* mo go bone;
Gonne o tla fedisa* medimo yotlhe ya lefatshe,
Mme batho ba ba nnang mo ditlhaketlhakeng ba tla mo ikobela,*+
Mongwe le mongwe a tswa kwa lefelong la gagwe.
12 Le lona Baethiopia lo tla bolawa ke tšhaka ya me.+
13 Modimo o tla otlololela seatla sa gagwe ntlheng ya bokone a bo a senya Asiria,
E bile o tla dira gore Ninife e kgakgabale+ fela jaaka sekaka.
14 Metlhape e tla rapama mo gare ga gagwe, e leng mefuta yotlhe ya diphologolo tsa naga.*
Nonyane e e bidiwang kukara mmogo le noko di tla lala bosigo mo ditlhogong tsa dipilara tsa gagwe.
Lentswe la dinonyane* le tla utlwala mo fensetereng.
Kgoro e tla nna marope;
Gonne o tla manolola dipolanka tsa mosedara tse go manegilweng ka tsone.
15 Ono ke motse o o ikgodisang o o neng o ntse ka pabalesego,
O o neng o bua mo pelong ya one o re, ‘Ke nna fela, ga go na ope o sele.’
Batho ba ba o bonang ba tla gakgamala,
Lefelo le diphologolo tsa naga di rapamang mo go lone!
Mongwe le mongwe yo o fetang fa go one o tla letsa molodi a bo a tshikinya tlhogo.”*+
3 Ruri motse o o tlhanogang le o o gatelelang batho ba one o tla tlelwa ke ditlamorago tse di botlhoko!+
2 Batho ba one ga ba reetse ope;+ e bile ga ba reetse kotlhao epe.+
Ga ba ikanye Jehofa;+ e bile ga ba atamele kwa Modimong wa bone.+
3 Dikgosana tsa gagwe ke ditau tse di kurutlang.+
Baatlhodi ba gagwe ke diphiri tsa bosigo;
Ga di tlogele lerapo lepe le di ka le kokonang mo mosong.
4 Baporofeti ba gagwe ga ba na maitseo, ke maferefere.+
5 Jehofa o siame e bile o nna mo motseng;+ ga a dire sepe se se sa siamang.
Moso le moso o itsise dikatlholo tsa gagwe+
Tse di nnang di le teng jaaka lesedi la motshegare.
Mme yo o bosula ga a tlhabiwe ke ditlhong.+
6 “Ke ne ka fedisa ditšhaba; ditora tsa tsone tse di mo dikhoneng di ne tsa sala e le marope fela.
Ke ne ka senya mebila ya tsone, mo go neng go se na ope yo o e ralalang.
Metse ya tsone e ne ya sala e le marope, go se na motho ope, go se na monni ope mo go yone.+
7 Ke ne ka raya banni ba motse oo ka re, ‘Ruri lo tla mpoifa lo bo lo amogela kotlhao,’*+
Le fa go ntse jalo, botlhe ba ne ba ikemiseditse go dira boferefere.+
8 Jehofa a re, ‘Ka jalo nnang lo ntebeletse*+
Go fitlha ka letsatsi la fa ke ema gore ke tlhasele batho le go tsaya dithoto tsa bone,*
Gonne tshwetso ya me ya boatlhodi ke go phutha ditšhaba, go kokoanya magosi,
Gore ke tshololele tšhakgalo ya me mo go one, e leng bogale jotlhe jwa me jo bo tukang;+
Gonne lefatshe lotlhe le tla lailwa ke molelo wa bogale jwa me.+
9 Gonne ka nako eo ke tla ruta ditšhaba gore di bue puo e e itshekileng,
Gore botlhe ba tle ba bitse leina la ga Jehofa,
10 Ba ba nthapelang, e leng morwadia batho ba me ba ba gasamisitsweng, ba tla ntlisetsa mpho+
Go tswa kwa kgaolong ya dinoka tsa Ethiopia.
11 Mo letsatsing leo, ga o kitla o tlhabiwa ke ditlhong
Ka ntlha ya ditiro tsotlhe tse o neng wa di dira fa o ntlhanogela,+
Gonne ka nako eo ke tla tlosa batho ba ba mabela le ba ba boikgodiso mo go wena;
Mme ga o kitla o tlhola o nna mabela gape mo thabeng ya me e e boitshepo.+
12 Ke tla letla gore go sale batho ba ba ikokobeditseng le ba maemo a a kwa tlase mo go wena,+
Mme ba tla ikanya leina la ga Jehofa.
13 Ba ba setseng ba Iseraele+ ga ba kitla ba dira tshiamololo;+
Ga ba kitla ba bua maaka e bile ga ba kitla ba tsietsa batho;
Ba tla ja* ba bo ba rapama, mme ga go na ope yo o tla ba tshosang.”+
14 Goa ka boitumelo, wena morwadia Siona!
Goa o itumelele phenyo wena Iseraele!+
Ipele o bo o itumele ka pelo yotlhe, wena morwadia Jerusalema!+
15 Jehofa o tlositse dikatlholo tse di neng di go tletse.+
O fapositse mmaba wa gago.+
Kgosi ya Iseraele e bong Jehofa, o na le wena.+
Ga o kitla o tlhola o boifa masetlapelo.+
16 Mo letsatsing leo Jerusalema o tla tewa go twe:
“O se ka wa boifa, wena Siona.+
O se ka wa letla diatla tsa gago di repa.
17 Jehofa, Modimo wa gago o na le wena.+
E re ka e le Ene yo o maatla, o tla go boloka.
O tla go itumelela fela thata.+
O tla didimala* ka gonne a go rata.
O tla go itumelela ka mekgosi ya boitumelo.
18 Ke tla phutha ba ba hutsafadiwang ke go bo ba seyo mo meletlong ya gago;+
Ba ne ba seyo mo go wena ka gonne ba ne ba rwele kgobo ya gagwe.+
19 Bona! Ka nako eo, ke tla tlhasela botlhe ba ba go bogisang;+
Mme ke tla boloka yo o tlhotsang,+
E bile ke tla phutha ba ba phatlaletseng.+
Ke tla dira gore ba galalediwe ba bo ba tume*
Mo lefatsheng lotlhe le ba neng ba tlhabisiwa ditlhong mo go lone.
20 Ka nako eo ke tla lo busetsa kwa nageng ya lona,
E leng ka nako ya fa ke lo phutha mmogo.
Gonne ke tla dira gore lo galalediwe+ lo bo lo tume* mo ditšhabeng tsotlhe tse di mo lefatsheng,
Fa ke tla bo ke busa batshwarwa ba lona lo ntse lo lebile,” go bua Jehofa.+
Mo go kayang “Jehofa o Fitlhile (Sireleditse).”
Go lebega go tewa dilo kgotsa ditiro tse di amanang le kobamelo ya medingwana.
Kgotsa “motlhala; matlhasedi.”
Kgotsa “o dirile boitshepo.”
Kgotsa “setupu.” Gongwe go tewa serala se go bewang setulo sa bogosi sa kgosi mo go sone.
Go lebega go tewa karolo ya Jerusalema e e gaufi le Kgoro ya Ditlhapi.
Kgotsa “bagwebi.”
Seheb., “didimaditswe.”
Seheb., “ba ba itshekileng mo dintsheng tsa bone,” jaaka e kete ba mo segatisetsong sa beine.
Kgotsa “diterebe; moretlwa.”
Kgotsa “le itlhaganela thata!”
Seheb., “mala.”
Kgotsa “ba ba boikokobetso.”
Seheb., “katlholo ya gagwe.”
Kgotsa “lo ikokobetse.”
Kgotsa “Go ka direga gore lo.”
Kgotsa “sujwa; fitlhwa.”
Kgotsa “ka sethoboloko.”
Kgotsa “ba tlhokomela.”
Seheb., “Baamone.”
Kgotsa “yo o tshosang.”
Kgotsa “bopamisa.”
Kgotsa “obamela.”
Seheb., “phologolo nngwe le nngwe ya setšhaba.”
Kgotsa gongwe “Lentswe la phefo kgotsa phologolo ya naga.”
Seheb., “lebole.”
Kgotsa “kgalemelo.”
Kgotsa “otlhaela.”
Kgotsa “ntetetse ka bopelotelele.”
Kgotsa gongwe “la fa ke ema ke le mosupi.”
Kgotsa “ba mo obamele ka kutlwano.”
Kgotsa “fula.”
Kgotsa “ritibala; kgotsofala.”
Seheb., “ba nne le leina.”
Seheb., “lo nne le leina.”