“Ke E Batla Gone Jaanong Jaana!” Motlha wa go Batla go Ikgotsofatsa Kwantle ga go Dia Nako

Boemo jwa ga Johnny yo mmotlana bo tshwanetse bo ka bo bo bontsha pogo e e botlhoko tota, mme go thata gore motho a itshware gore a seka a mo tshega. Magetla a gagwe a obegile, mangole a gagwe a batlile a tshwana le raba, dikgato tsa gagwe di sepapetla ebile di boima. Sefatlhego sa gagwe se supa bohutsana—phatla e e sosobaneng, matlho a eketeng o a ikuela, le molomo o o tsupilweng ka ntlha ya tlalelo. O ne a akantse ka selo se le sengwe fela mo mogopolong wa gagwe: e leng phuding.

“Mma kana,—” o a ngongola. A seka a tlhola a tswelela. Mmaagwe o ikgara fa go ene, a tshotse mogopo le leswana. “NNYAA! Johnny, ke labofelo jaanong,” a bua a tiisitse. “Fa o ja phuding jaanong jaana, o tlile go palelwa ke go ja dijo tsa gago tsa maitsiboa. Ebile kana, mo metsotsong e e 15 re tla bo re ja!”

“Mme kana ke e batla GONE JAANONG JAANA!” a lela sa bohutsana. Mmaagwe o lesa go fudua a bo a tlhoma morwawe matlho. Morwawe o itse gore tebo eo e raya eng; o kata ka morago ka botlhale, a ya go boga a le nosi kwa kamoreng e nngwe. Ereka a ne a iteega tsebe ka bofefo fela, ka nako ya fa dijo tsa maitsiboa di setse di siame o ne a lebetse gotlhelele ka go ja.

Bana ka dinako tse dingwe go lebega ba sekametse thata mo go batleng dilo kwantle ga go dia nako. Fa ba batla sengwe, ba se batla ka yone nako eo. Kgopolo ya go letela sengwe se se botoka, kana go ithontsha monate mongwe ka go bo o ka ba gobatsa moragonyana, go thata mo go bone gore ba e tlhaloganye. Lefa go le jalo, ke kgopolo e bone—le rona rotlhe gantsi—re tlhokang go e ithuta.

Patlisiso ya bosheng jaana e e dirilweng ke borasaense bangwe kwa Yunibesithing ya Columbia kwa United States e ne ya sekaseka kgono ya bana ba babotlana ya go kgaphela kwa thoko go ikgotsofatsa e le gore ba tle ba bone maduo a a eletsegang. Bana bao ba ne ba abelwa go itlhophela mo mefuteng e mebedi ya dijo tse di monate, tse dingwe tsa tsone e le tse di eletsegang go feta tse dingwe—a re re, kuku e le nngwe fela e bapisitswe le tse pedi. Ba ne ba ka bona dijo tse di gaisang tse dingwe fa fela ba ne ba ka leta go fitlhela morutabana a boa. Lefa go ntse jalo, ba ne ba ka kgona go emisa go leta moo nako nngwe le nngwe ka go letsa tloloko, mo e neng e tla re fa ba go dira ba fiwe dijo tse dingwe mme ba latlhegelwe ke tse di gaisang tseo. Borasaense ba ne ba kwala kafa ba neng ba dira ka gone mme ba sekaseka botswelelopele jwa bone bana bano dingwaga di le lesome moragonyana.

Makasine wa Science o bega gore bana bao go neng go le motlhofo mo go bone gore ba seka ba itlhaganelela go ikgotsofatsa ba ne ba dira botoka jaaka basha. Ba ne ba kgona thata mo ditirong tsa leago le kwa sekolong mme ba ne ba kgona go dirisana botoka le tlalelo le dilo tse di khidiang. Ka mo go phepafetseng, kgono eno ya go nama o diegile go ikgotsofatsa—go leta nakonyana go bona seo re se batlang—ke bokgoni jo bo botlhokwa jwa botshelo. Mme gape bo solegela le bagolo molemo.

Letsatsi lengwe le lengwe rotlhe re gatelesega go itlhophela fa gare ga go ikgotsofatsa kwantle ga go dia nako le go diega sebakanyana. Ditlhopho tse dingwe di lebega e le tse e seng tsa sepe: ‘A ke ke je kuku ele kana ke akanyetse gore ke mokima go le kana kang?’ ‘A ke ke lebe thelebishene, kana go na le sengwe se se mosola se ke tshwanetseng go se dira jaanong jaana?’ ‘A ke tshwanetse go bua seno fela kana ke itshware loleme?’ Mo mabakeng otlhe a, re tshwanetse go lekalekanya kgogedi ya go ikgotsofatsa kwantle ga go dia nako fa e bapisiwa le diphelelo tse dintsi tse di tsayang nako e telele. Ke boammaaruri gore tseno e ka nna ya bo e se dilo tsa botlhokwatlhokwa.

Se se masisi thata ke diphetso tsa boitsholo tseo batho ba lebaneng natso: ‘A ke tshwanetse go bua maaka gore ke tswe mo seemong seo, kana a ke tshwanetse go batla tsela e e ikanyegang ebile e le e e botlhale?’ ‘A ke tshwanetse go arabela go lorato lono lwa boferefere mme ke bone gore go diragala eng, kana a ke tshwanetse go ngomaela lenyalo la me?’ ‘A ke tshwanetse go ya le mogoro mme ke goge marijuana, kana a ke tshwanetse go obamela molao mme ke sireletse mmele wa me?’ Kwantle ga pelaelo jaaka o setse o lemogile, tsela eo ya go ikgotsofatsa kwantle ga go dia nako e ka dira gore botshelo jwa motho e nne tlhakantshukwe fela mo nakong e khutshwane.

Fela jaaka makasine wa Science o tlhalosa jaana: “Gore dilo di tsamaye ka thelelo, batho ka bobone ba tshwanetse go tsosolosa go batla go kgotsofala ka yone nako eo mme ba ganelele mo boitshwarong jo bo nang le mokgele e le gore ba tle ba bone matswela a a tlang moragonyana.” Jalo kwantle ga pelaelo re ka seka ra tshela botshelo jo bo molemo fa e le gore re tshwanetse go kgotsofatsa keletso nngwe le nngwe ya rona gone fela foo.

Lefa go ntse jalo, re tshela mo lefatsheng le le tshwaregileng ka go ikgotsofatsa kwantle ga go dia nako, lefatshe leo go lebegang le tletse bagolo ba ba farologaneng ba ba dikete tse di senang palo ba ba tshwanang le Johnny yo mmotlana, ba ba ratang go bona seo ba se batlang ka yone nako eo, ba sa itse gore diphelelo e ya go nna dife. Boikutlo jwa bone ke joo bo ileng jwa bopa lefatshe la rona la segompieno, mme jwa seka jwa le tokafatsa.