Modimo a re Lefatshe le Tla Nnela Ruri

Mafoko ano a ne a buiwa ke setlhopha sa babatlisisi ba lefatshe lotlhe fa ba ne ba bua ka go fetofetoga ga maemo a bosa. Fa e le gore o dumela gore go na le Mmopi yo o amegang ka batho, mafoko a babatlisisi bano a ka tswa a go gopotsa ditsela tse dintsi tse Modimo a di dirileng gore polanete ya rona e kgone go ipaakanya.

Mme gone, e re ka batho ba sentse lefatshe thata, le ka se kgone go ipaakanya ka bolone fela. Goreng re ka tlhatswega pelo gore Modimo o tla dira sengwe ka lone?

Ela tlhoko ditemana tse di mo lebokosong tse di re tlhomamisetsang gore batho ga ba kitla ba nyeletsa lefatshe.

• Lefatshe le bopilwe ke Modimo. “Kwa tshimologong Modimo o ne a bopa magodimo le lefatshe.”​—Genesise 1:1

• Modimo ke ene mong wa lefatshe. “Lefatshe ke la ga Jehofaa le sengwe le sengwe se se mo go lone.”​—Pesalema 24:1

• Modimo o bopetse lefatshe gore le nnele ruri. “O dirile lefatshe mo metheong ya lone e e thata; ga le kitla le sutisiwa mo lefelong la lone ka bosakhutleng le go ya go ile.”​—Pesalema 104:5

• Modimo a re go tla nna go na le ditshedi mo lefatsheng go ya go ile. ‘Modimo wa boammaaruri, Ene yo o bopileng lefatshe, ga a a le bopela lefela, mme o le bopetse gore le nniwe.’​—Isaia 45:18

• Modimo a re batho ba tla nna mo lefatsheng ka bosakhutleng. “Basiami ba tla rua lefatshe, mme ba tla nna mo go lone ka bosakhutleng.”​—Pesalema 37:29

Modimo o dirile lefatshe ka tsela e e dirang gore le kgone go emelana le dilo tse batho ba di dirang mo go lone tse di ka le senyang. Baebele e tlhalosa gore Jehofa Modimo o tlhomile nako e a tla fedisang batho ba ba pelotshetlha ba ba senyang lefatshe.​—Tshenolo 11:18

Mme morago ga moo, o tla fetola lefatshe leno a le dira paradaise a bo a bula seatla sa gagwe gore a ‘kgotsofatse keletso ya setshedi sengwe le sengwe.’​—Pesalema 145:16