Thuto 15

Go Thusa Batho ba Bangwe go Dira go Rata ga Modimo

Ke ka ntlha yang fa o tshwanetse go bolelela batho ba bangwe ka dilo tse o di ithutang? (1)

O ka bolelela bomang mafoko a a molemo? (2)

Boitsholo jwa gago bo ka ama batho ba bangwe jang? (2)

O ka rera leng mmogo le phuthego? (3)

1. Gone jaanong o setse o ithutile dilo tse dintsi tse di molemo go tswa mo Baebeleng. Kitso eno e tshwanetse go dira gore o leke go nna le botho jwa Bokeresete. (Baefeso 4:22-24) Go botlhokwa gore o nne le kitso e e ntseng jalo gore o tle o bone botshelo jo bo sa khutleng. (Johane 17:3) Lefa go ntse jalo, batho ba bangwe le bone ba tshwanetse gore ba utlwe mafoko a a molemo gore le bone ba tle ba bolokiwe. Bakeresete botlhe ba boammaaruri ba tshwanetse gore ba supele batho ba bangwe. Ke taolo e e tswang kwa Modimong.—Baroma 10:10; 1 Bakorinthe 9:16; 1 Timotheo 4:16.

2. O ka nna wa simolola go bolelela batho ba ba leng gaufi le wena ka dilo tse di molemo tse o di ithutang. Di bolelele ba lelapa la gago, ditsala, bao o tsenang le bone sekolo le badirimmogo. Nna bonolo e bile o nne pelotelele fa o dira jalo. (2 Timotheo 2:24, 25) Gakologelwa gore gantsi batho ba leba boitsholo jwa motho thata go na le go reetsa se a se buang. Ka jalo, boitsholo jwa gago jo bo siameng bo ka nna jwa kgatlha batho ba bangwe gore ba reetse molaetsa o o ba bolelelang one.—Mathaio 5:16; 1 Petere 3:1, 2, 16.

3. Fa nako e ntse e ya, o ka nna wa tshwanelegela gore o simolole go rera le phuthego ya lefelo la lona ya Basupi ba ga Jehofa. Eno ke kgato e e botlhokwa e o e tsayang ya go gatela pele. (Mathaio 24:14) A bo e tla bo e le boitumelo jang ne fa o ka thusa motho yo mongwe gore a nne motlhanka wa ga Jehofa le gore a bone botshelo jo bo sa khutleng!—1 Bathesalonika 2:19, 20.