Ba Bona Keresete A Le Mo Kgalalelong

Fa Jesu a ntse a ruta batho kwa kgaolong ya Kaesarea Filipi, e e dikilometara di ka nna 25 go tswa kwa Thabeng ya Heremone, o dira kitsiso eno e e gakgamatsang baaposetoloi ba gagwe: “Ammaaruri ke a lo bolelela, go na le bangwe mo go ba ba emeng fano ba ba se kitlang ba swa pele ga ba bona Morwa motho a tla a le mo Bogosing jwa gagwe.”—Mathaio 16:28.

Barutwa bano ba tshwanetse ba bo ba ipotsa gore Jesu o bua ka eng. Mo e ka nnang beke moragonyana, o tsaya Petere, Jakobe le Johane, a bo a tsamaya le bone kwa thabeng nngwe e e kwa godimo. Go ka tswa go ne go le bosigo, ka gonne banna bano ba bararo ba ne ba otsela. Fa Jesu a ntse a rapela, tsela e a lebegang ka yone e fetoga ba ntse ba mo lebile. Baaposetoloi bano ba bona sefatlhego sa gagwe se phatsima jaaka letsatsi, mme diaparo tsa gagwe di tsabakela jaaka lesedi, di nna ditshweu.

Go tswa foo, go tlhagelela banna ba babedi ba ba tlhalosiwang e le “Moshe le Elija.” Ba bua le Jesu ka ‘go tsamaya ga gagwe mo go tla diragalang kwa Jerusalema.’ (Luke 9:30, 31) Ga go pelaelo gore go tsamaya ga ga Jesu go kaya loso lwa gagwe le tsogo ya gagwe e e tla latelang moragonyana, mo a neng a bua ka gone bosheng. (Mathaio 16:21) Go farologana le se Petere a neng a se akanya, motlotlo ono o bontsha gore loso lwa ga Jesu lo lo tlhabisang ditlhong ga se selo se a ka se tilang.

Jaanong baaposetoloi bano ba bararo ba thantse, ba lebile tiragalo eno e bile ba reeditse ka kgakgamalo. Seno ke ponatshegelo, mme gone e lebega e le ya mmatota mo e leng gore Petere o simolola go nna le seabe mo go yone, a re: “Rabi, re itumelela go bo re le fano. Ka jalo, a re tlhome ditente di le tharo, e nngwe e le ya gago, e nngwe e le ya ga Moshe, mme e nngwe e le ya ga Elija.” (Mareko 9:5) A Petere o batla gore ba tlhome ditente ka gonne a batla gore ponatshegelo eno e tswelele?

Fa Petere a ntse a bua, leru le le phatsimang le a ba okama, mme lentswe le tswa mo lerung leo le re: “Yono ke Morwaake yo o rategang, yo ke mo amogetseng. Mo reetseng.” Fa baaposetoloi bano ba ba tshogileng ba utlwa lentswe la Modimo ba a khubama ba bo ba ikoba, mme Jesu o ba raya a re: “Emang. Lo se ka lwa tshoga.” (Mathaio 17:5-7) Fa ba ema ka dinao, ba bona Jesu a le nosi. Ponatshegelo eno e fedile. Mo mosong fa ba fologa thaba, Jesu o ba laela a re: “Lo se ka lwa bolelela ope ponatshegelo eno go fitlha Morwa motho a tsosiwa mo baswing.”—Mathaio 17:9.

Kgang ya go bo Elija a tlhagelela mo ponatshegelong eno e tsosa potso. Baaposetoloi ba botsa jaana: “Jaanong ke ka ntlha yang fa bakwadi ba re Elija o tshwanetse go tla pele?” Jesu o ba araba a re: “Elija o setse a tlile, mme ba ne ba se ka ba mo lemoga.” (Mathaio 17:10-12) Jesu o bua ka Johane Mokolobetsi, yo o ileng a diragatsa seabe se se tshwanang le sa ga Elija. Elija o ne a baakanyetsa Elisha tsela, mme Johane ene o ne a baakanyetsa Keresete tsela.

Ruri ponatshegelo eno e nonotsha Jesu le baaposetoloi ba gagwe! Tota seno ke maoko a kgalalelo e Keresete a tla nnang le yone fa a setse a busa. Ka jalo, barutwa bano ba bone “Morwa motho a tla a le mo Bogosing jwa gagwe,” jaaka Jesu a ne a ba solofeditse. (Mathaio 16:28) Fa ba ne ba le kwa thabeng, ba ne ba bona “kafa a leng mogolo ka gone.” Le fa gone Bafarasai ba ne ba batla sesupo se se bontshang gore Jesu e ne e tla nna ene Kgosi e Modimo a e tlhophileng, ga a a ka a ba bontsha sesupo sepe. Mme gone, barutwa bano ba ba atamalaneng le Jesu ba ne ba newa tshono ya go bona Jesu a le mo kgalalelong, e leng tiragalo e e ba tlhomamisetsang gore dipolelelopele tsa Bogosi di tla diragadiwa. Ke gone ka moo Petere a ileng a kgona go kwala a re: ‘Re ne ra tlhatswega pelo gore sengwe le sengwe se Modimo a se buileng se tla diragala.’—2 Petere 1:16-19.