O Kwa Jerusalema Kwa Moletlong Wa Metlaagana

Fa e sa le Jesu a kolobediwa, o ile a itsiwe ke batho ba le bantsi. Bajuda ba le bantsi ba ne ba mmona a dira dikgakgamatso, mme batho ba bangwe ba ne ba utlwalela ka seo. Gone jaanong, o kwa Moletlong wa Metlaagana (kgotsa Diobo) kwa Jerusalema, mme batho ba le bantsi ba batla go mmona.

Batho ba akanya dilo tse di farologaneng ka Jesu. Bangwe ba re: “Ke monna yo o molemo.” Ba bangwe bone ba re: “Ga a nna jalo. O tsietsa batho.” (Johane 7:12) Dikganetsano tseno di a tswelela mo malatsing a ntlha a moletlo. Le fa go ntse jalo, ga go na ope yo o nang le bopelokgale jwa go buelela Jesu phatlalatsa, ka gonne ba tshaba baeteledipele ba Bajuda.

Fa moletlo o ntse o tsweletse, Jesu o ya kwa tempeleng. Batho ba le bantsi ba gakgamadiwa ke bokgoni jwa gagwe jwa go ruta. Ga a ise a ko a ye kwa dikolong tsa borabi, ka jalo Bajuda ba ipotsa jaana: “Go tla jang gore monna yono a bo a itse Dikwalo thata jaana, mme a sa ithuta kwa dikolong?”—Johane 7:15.

Jesu o ba tlhalosetsa jaana: “Se ke se rutang ga se sa me, mme ke sa yo o nthomileng. Fa mongwe a batla go dira thato ya Modimo, o tla itse gore a thuto eno e tswa kwa Modimong kgotsa a ke bua se se tswang mo go nna.” (Johane 7:16, 17) Dithuto tsa ga Jesu di dumalana le Molao wa Modimo, ka jalo ga go pelaelo gore o batla go galaletsa Modimo, e seng go ikgalaletsa.

Go tswa foo, o ba raya a re: “Moshe o ne a lo naya Molao, a ga go jalo? Mme ga go na ope wa lona yo o ikobelang Molao oo. Ke ka ntlha yang fa lo batla go mpolaya?” Bangwe ba batho ba ba leng foo, gongwe ba ba tswang kwa metseng e mengwe, ga ba itse gore go na le batho ba ba batlang go bolaya Jesu. Ga ba dumele gore go na le mongwe yo o ka batlang go bolaya morutisi yo o tshwanang le ene. Ka jalo, ba swetsa ka gore go tshwanetse ga bo go na le sengwe se se phoso ka ene fa a re bangwe ba batla go mmolaya. Ba mo raya ba re: “O na le ledimona. Ke mang yo o batlang go go bolaya?”—Johane 7:19, 20.

Boammaaruri ke gore ngwaga le halofo pele ga moo, baeteledipele ba Bajuda ba ile ba batla go bolaya Jesu fa a sena go fodisa monna mongwe ka letsatsi la Sabata. Jaanong Jesu o ba ntshetsa mabaka a a dirang gore ba akanye e bile o senola gore ga ba lebe dilo sentle. O ba gopotsa gore mo Molaong wa ga Moshe, ngwana wa mosimane o tshwanetse go rupisiwa mo letsatsing la borobedi, le fa letsatsi leo e le Sabata. Go tswa foo o ba botsa jaana: “Fa e le gore lo rupisa motho ka sabata gore lo se ka lwa tlola Molao wa ga Moshe, ke eng fa lo nkgalefetse thata ka gonne ke ile ka fodisa motho ka sabata? Tlogelang go atlhola go ya ka se lo se bonang, mme atlholang ka tsela e e siameng.”—Johane 7:23, 24.

Banni ba Jerusalema ba ba itseng ka kgang eno ba re: “A yono ga se ene monna yo [babusi] ba batlang go mmolaya? Mme bonang, o bua phatlalatsa, le fa go ntse jalo, ga ba mo reye sepe. A babusi ba setse ba itse gore ruri yono ke Keresete?” Jaanong ke eng fa batho ba sa dumele gore Jesu ke Keresete? Ba re: “Re itse kwa monna yono a tswang gone; mme fa Keresete a tla, ga go na ope yo o tshwanetseng go itse kwa a tswang gone.”—Johane 7:25-27.

Fa ba ntse ba le mo tempeleng, Jesu o ba raya a re: “Lo a nkitse e bile lo itse kwa ke tswang gone. Ga ke a tla ka bonna, mme Ene yo o nthomileng ke wa mmatota, mme ga lo mo itse. Nna ke a mo itse, ka gonne ke moemedi yo o tswang kwa go ene, mme Ene yoo o nthomile.” (Johane 7:28, 29) Fa a sena go bua jalo, ba leka go mo tshwara, ba ka tswa ba batla go mo tsenya mo kgolegelong kgotsa go mmolaya. Le fa go ntse jalo, ga ba atlege ka gonne ga e ise e nne nako ya gore Jesu a swe.

Mme gone, batho ba le bantsi ba dumela mo go Jesu. Go a tshwanela go bo ba dumela mo go ene ka gonne o kile a tsamaya mo godimo ga metsi, a didimatsa diphefo, a fepa batho ba le diketekete ka ditlhapi le dinkgwe di le mmalwa, a fodisa balwetse, a fodisa ba ba tlhotsang, a bula matlho a difofu, a fodisa balepero a bo a tsosa le baswi. Ba na le lebaka le le utlwalang la go botsa potso eno: “Fa Keresete a tla, ga a kitla a dira dikgakgamatso tse di fetang tse monna yono a di dirileng, gakere?”—Johane 7:31.

Fa Bafarasai ba utlwa batho ba bua dilo tseno, bone le baperesiti ba bagolo ba roma badiredi bangwe gore ba ye go tshwara Jesu.