A Bajuda Ba Tla Dumela Mo Modimong?

Jesu o mo tempeleng ka Mantaga Nisane 10, mme o bua ka loso lwa gagwe lo lo ntseng lo atamela. E re ka a tshwenyegile ka gore leina la Modimo le tlile go senngwa, a re: “Rara, galaletsa leina la gago.” Go utlwala lentswe le le maatla le le tswang kwa legodimong le re: “Ke le galaleditse e bile ke tla le galaletsa gape.”—Johane 12:27, 28.

Batho ba ba leng foo ba gakgametse. Bangwe ba bone ba akanya gore ba utlwile maru a duma. Ba bangwe ba re: “Moengele o buile le ene.” (Johane 12:29) Le fa go ntse jalo, tota ba sa tswa go utlwa Jehofa a bua! Mme leno ga se lekgetlo la ntlha batho ba utlwa lentswe la Modimo a bua sengwe se se amanang le Jesu.

Dingwaga di le tharo le halofo pele ga moo, fa Jesu a ne a kolobediwa, Johane Mokolobetsi o ne a utlwa Modimo a bua jaana ka Jesu: “Yono ke Morwaake yo o rategang, yo ke mo amogetseng.” Nako nngwe, morago ga Tlolaganyo ya 32 C.E., tsela e Jesu a lebegang ka yone e ne ya fetolwa a na le Jakobe, Johane le Petere. Banna bao ba bararo ba ne ba utlwa Modimo a re: “Yono ke Morwaake yo o rategang, yo ke mo amogetseng. Mo reetseng.” (Mathaio 3:17; 17:5) Mme jaanong mo lekgetlong leno la boraro, Jehofa o bua ka tsela e batho ba le bantsi ba kgonang go mo utlwa!

Jesu a re: “Lentswe leno ga le a utlwala ka ntlha ya me, mme le utlwetse ka ntlha ya lona.” (Johane 12:30) Lentswe leno le bontsha gore ruri Jesu ke Morwa Modimo, ke Mesia yo o solofeditsweng.

Mo godimo ga moo, tsela e Jesu a tshelang ka yone a ikanyega, e bontsha gore batho ba tshwanetse go tshela jang. Gape e tlhomamisa gore Satane Diabolo, yo e leng mmusi wa lefatshe leno, o tshwanetse go fedisiwa. Jesu a re: “Jaanong lefatshe leno le a atlholwa; jaanong mmusi wa lefatshe leno o tla latlhelwa kwa ntle.” Fa Jesu a bolawa o tla bo a sa fenngwa, go na le moo o tla bo a fentse. Ka tsela efe? O tlhalosa jaana: “Le fa go ntse jalo, fa ke tsholediwa ke ntshiwa mo lefatsheng, ke tla gogela batho ba mefuta yotlhe kwa go nna.” (Johane 12:31, 32) Fa Jesu a tla bo a bolaelwa mo koteng, o tla gogela batho ba bangwe kwa go ene, a ba bulela tsela ya go bona botshelo jo bo sa khutleng.

Fa batho bano ba utlwa Jesu a bua ka go “tsholediwa,” ba mo raya ba re: “Re utlwile mo Molaong wa ga Moshe gore Keresete o ntse ka bosakhutleng. Go tla jang go bo o re Morwa motho o tshwanetse go tsholediwa? Tota Morwa motho ke mang?” (Johane 12:34) Le fa gone ba bone bosupi jono jotlhe, go akaretsa le go utlwa lentswe la Modimo, bontsi jwa bone ga ba dumele gore Jesu ke ene Morwa motho, Mesia yo o solofeditsweng.

Jesu o ba bolelela gore ke ene “lesedi” jaaka a ile a dira pele ga foo. (Johane 8:12; 9:5) O ba rotloetsa jaana: “Lesedi le tla nna le lona ka lobakanyana. Fa lo sa ntse lo na le lesedi, tsamayang mo go lone, gore lefifi le se ka la lo fekeetsa . . . Fa lo sa ntse lo na le lesedi, dumelang mo leseding, gore lo tle lo nne bana ba lesedi.” (Johane 12:35, 36) Go tswa foo, Jesu o a tsamaya ka gonne Nisane 10 ga se letsatsi le a tshwanetseng go swa ka lone. O tshwanetse go “tsholediwa” kgotsa go kokotelwa mo koteng ka Nisane 14, go le Tlolaganyo.—Bagalatia 3:13.

Fa re leba kwa morago ka nako ya bodiredi jwa ga Jesu, go bonala sentle gore Bujuda ba ne ba diragatsa boporofeti fa ba ne ba sa dumele mo go ene. Isaia o ne a bolelela pele gore matlho a batho a ne a tla foufala le gore dipelo tsa bone di ne di tla thatafala gore ba se ka ba sokologa ba bo ba fodisiwa. (Isaia 6:10; Johane 12:40) Bontsi jwa Bajuda ba nna tlhogoethata mme ba gana bosupi jwa gore Jesu ke ene Mogolodi wa bone yo o solofeditsweng, ke ene tsela e e isang botshelong jo bo sa khutleng.

Nikodemo, Josefa wa kwa Arimathea le babusi ba bangwe ba bantsi “ba dumela” mo go Jesu. Mme gone, a ba tla bontsha ka ditiro gore ba dumela mo go ene, kgotsa a tla ba fitlha seo ka gonne ba tshaba gore ba tla lelekwa mo sinagogeng kgotsa ka gonne ba ‘rata go galalediwa ke batho’?—Johane 12:42, 43.

Jesu o tlhalosa gore go dumela mo go ene go akaretsa eng, a re: “Ope fela yo o dumelang mo go nna, ga a dumele mo go nna fela, mme gape o dumela le mo go yo o nthomileng; e bile ope fela yo o mponang, o bona le Ene yo o nthomileng.” Dithuto tsa boammaaruri tse Modimo a laetseng Jesu gore a di rute, e leng tsone tse Jesu a tsweletseng a di bolela, di botlhokwa thata jaana mo Jesu a ka buang a re: “Ope fela yo o intlhokomolosang e bile a sa amogele mafoko a me, o na le yo o tla mo atlholang. Lefoko le ke le buileng ke lone le le tla mo atlholang mo letsatsing la bofelo.”—Johane 12:44, 45, 48.

Go tswa foo Jesu o konela jaana: “Ga ke a bua ka bogame fela, mme Rara yo o nthomileng ke ene a nneileng taelo ya gore ke bue eng le gore ke rute eng. Mme ke a itse gore taelo ya gagwe e raya botshelo jo bo sa khutleng.” (Johane 12:49, 50) Jesu o a itse gore go ise go ye kae, o tla tsholola madi a gagwe a ntshetsa batho ba ba dumelang mo go ene setlhabelo.—Baroma 5:8, 9.