October

A ka dinako tse dingwe go thata gore o ikobele ditaelo? Kgosi Dafide o ne a rata Jehofa, mme ka dinako tse dingwe go ne go le thata gore a mo ikobele. Ke gone ka moo a ileng a rapela a re: “Ntlhotlheletse gore ke nne le keletso ya go go ikobela.” (Pes. 51:12) Goreng ka dinako dingwe go le thata gore re ikobele Jehofa? Sa ntlha, re na le boleo, ka jalo bo dira gore go nne thata gore re mo ikobele. Sa bobedi, Satane o leka go dira gore re tlhanogele Jehofa jaaka ene. (2 Bakor. 11:3) Sa boraro, re tshela le batho ba ba laolwang ke ‘moya o o ba tlhotlheletsang gore ba se ka ba ikobela Modimo.’ (Baef. 2:2) Ka jalo, re tshwanetse go leka ka natla gore re se ka ra letla boleo, Satane le batho ba lefatshe leno ba re tlhotlheletsa gore re se ka ra ikobela Jehofa le batho ba a batlang gore re ba ikobele. w23.10 6 ¶1

Re ka ithuta eng mo kgakgamatsong ya ga Jesu ya go fetola metsi gore e nne beine? Re ithuta go nna boikokobetso. Jesu ga a ka a ikgantsha fa a sena go dira kgakgamatso eo, tota e bile, ga a ise a ko a ikgantshe ka dilo tsotlhe tse a di dirileng. Go na le moo, o ne a ikokobetsa e bile gangwe le gape o ne a batla gore go tlotlomadiwe Rraagwe. (Joh. 5:19, 30; 8:28) Fa le rona re le boikokobetso e bile re sa itseele kwa godimo, ga re kitla re ikgantsha fa re na le bokgoni bongwe jo bo rileng, mme re tla tlotlomatsa Jehofa. (Jer. 9:23, 24) Boammaaruri ke gore re ka se kgone go dira sepe fa Jehofa a sa re thuse. (1 Bakor. 1:26-31) Fa re le boikokobetso, ga re kitla re batla go tlotlomadiwa fa re thusitse ba bangwe. Re itumedisiwa ke go itse gore Jehofa o itumelela se re se dirang e bile o a se lebogela. (Bapisa le Mathaio 6:2-4; Baheb. 13:16) Jehofa o a itumela fa a bona gore re boikokobetso fela jaaka Jesu.​—1 Pet. 5:6. w23.04 4 ¶9; 5 ¶11-12

Moaposetoloi Paulo o ne a kgothaletsa Bakeresete gore ba se ka ba ikakanyetsa ba le nosi. Re ka dirisa kgakololo eo jang fa re le kwa dipokanong? Re tshwanetse go gopola gore batho ba bangwe le bone ba batla go araba. A re dire sekai. Fa o tlotla le ditsala tsa gago, a go bua wena fela o sa ba neye tshono ya go bua? Nnyaa ga o dire jalo, o batla gore le bone ba bue. Ka tsela e e tshwanang, fa re le kwa dipokanong, re batla gore ba bangwe ba nne le tshono ya go araba. Tota e bile, fa re naya bakaulengwe le bokgaitsadi tshono ya gore ba arabele, seno se ka ba kgothatsa. (1 Bakor. 10:24) Ka jalo, re araba ka bokhutshwane gore ba bangwe le bone ba nne le tshono ya go araba. Tota le fa o araba ka bokhutshwane, o se ka wa bua dintlha tse dintsi. Fa o araba dintlha tsotlhe mo serapeng, batho ba bangwe ba ka se ka ba kgona go araba. w23.04 22-23 ¶11-13

Re tshwanetse go tswelela re thusa batho ba bangwe, segolobogolo ka go ba rerela. Gape re tshwanetse go fetofetoga le maemo fa re le mo bodireding. Batho ba re kopanang le bone ba dumela dilo tse di farologaneng ka Modimo, e bile ba godile ka ditsela tse di sa tshwaneng. Moaposetoloi Paulo o ne a fetofetoga le maemo, mme re ka ithuta go le gontsi mo go ene. Jesu o ne a mo tlhoma gore e nne ‘moaposetoloi yo o rometsweng kwa ditšhabeng tse dingwe.’ (Bar. 11:13) Ka jalo Paulo o ne a rerela Bajuda, Bagerika, batho ba ba rutegileng le ba ba sa rutegang, badiredipuso le dikgosi. O ne a nna “dilo tsotlhe mo bathong ba mefuta yotlhe” gore a kgone go fitlhelela batho bao pelo. (1 Bakor. 9:19-22) O ne a akanyetsa dilo tse ba di dumelang le tsela e ba godileng ka yone. Seno se ne se mo thusa gore a kgone go fetofetoga le maemo le gore a bue le motho mongwe le mongwe ka tsela e e tla dirang gore a batle go itse Modimo. Le rona re ka atlega mo bodireding fa re fetofetoga le maemo e bile re akanya ka dilo tse batho ba re ba rerelang ba di tlhokang. w23.07 23 ¶11-12

Batho bangwe ba ka tsaya gore motho yo o bonolo o bokoa. Mme gone, seo ga se boammaaruri ka gonne ga go motlhofo gore motho a nne a ritibetse fa a rumolwa. Ka jalo, motho yo o bokoa o ne a ka se kgone go dira jalo. Re ka dira sekai ka pitse e e tlhaga. E ka katisiwa gore e nne bokgwabo, mme fa e setse e le bokgwabo, seno ga se reye gore jaanong e bokoa. Go ntse fela jalo ka rona batho, re ka kgona go nna bonolo le fa re ne re sa nna jalo kwa tshimologong. Ke eng se se ka re thusang? Baebele e a re bonolo ke lengwe la “maungo a moya o o boitshepo.” (Bagal. 5:22, 23) Ka jalo, re ka se kgone go nna le nonofo eno ka borona fela. Re tshwanetse go kopa Jehofa gore a re neye moya wa gagwe o o boitshepo o o tla re thusang go nna le nonofo eno. Go na le dikai di le dintsi tse di bontshang gore go a kgonega gore motho a nne bonolo. Bakaulengwe le bokgaitsadi ba ile ba araba ka bonolo fa batho ba ne ba leka go ngangisana le bone kgotsa ba leka go ba rumola. Mme seno se ile sa kgatlha batho ba bangwe ba e seng Basupi.​—2 Tim. 2:24, 25. w23.09 15 ¶3

Moaposetoloi Johane o ne a bona ponatshegelo ya bagolwane ba le 24 kwa legodimong ba obamela Jehofa. Ba ne ba baka Jehofa ba re ke Modimo yo o maatla e bile o “tshwanelwa ke go galalediwa le go tlotliwa.” (Tshen. 4:10, 11) Baengele ba ba ikanyegang le bone ba na le mabaka a mantsi a go baka Jehofa. Ba nna le ene kwa legodimong e bile ba mo itse sentle. Sengwe le sengwe se Jehofa a se dirang se ba thusa gore ba lemoge botho jwa gagwe, mme seo se dira gore ba batle go mmaka. (Jobe 38:4-7) Le rona re tshwanetse go baka Jehofa fa re mo rapela. Re tshwanetse go mmolelela mabaka a go bo re mo tlotla e bile re mo rata. Fa o bala Baebele, leka go bona dinonofo tsa ga Jehofa tse o di ratang thata. (Jobe 37:23; Bar. 11:33) Go tswa foo, mmolelele gore o ikutlwa jang ka ene. Gape re ka baka Jehofa ka go bo a re thusa e bile a thusa le bakaulengwe le bokgaitsadi ba rona.​—1 Sam. 2:1, 2. w23.05 3-4 ¶6-7

Ka 1919, batho ba Modimo ba ne ba tswa mo dinaleng tsa Babelona yo Mogolo. Ka one ngwaga oo, go ne ga tlhomiwa motlhanka yo o boikanyego le yo o botlhale” mme o ile a thusa batho ba ba siameng gore ba simolole go tsamaya mo ‘Tseleng ya Boitshepo.’ (Math. 24:45-47; Isa. 35:8) Tiro ya go baakanya e e ileng ya dirwa mo nakong e e fetileng, e ile ya thusa ba ba neng ba simolola go tsamaya mo tseleng eno gore ba ithute mo go oketsegileng ka Jehofa le ka se a ikaeletseng go se dira. (Diane 4:18) Gape ba ba thusitse gore ba kgone go tshela ka melao ya Modimo. Jehofa o ne a sa lebelela gore batho ba gagwe ba dire diphetogo ka nako e le nngwe fela. Go na le moo, o ile a ba thusa go dira diphetogo ka bonya ka bonya. Re itumelela gore mo nakong e e tlang re tlile go kgona go dira dilo tse di itumedisang Jehofa ka metlha. Tsela nngwe le nngwe e tshwanetse go nna e baakanngwa. Fa e sa le go tloga ka 1919, “Tsela ya Boitshepo” e nna e baakanngwa, mme seno se thusa batho ba le bantsi gore ba tswe mo Babelona yo Mogolo. w23.05 17 ¶15; 19 ¶16

Go fetile dingwaga di le dintsi bakaulengwe ba ba mo Setlhopheng se se Laolang ba katisa bakaulengwe ba dinku tse dingwe. Ka sekai, go na le dikolo tse di katisang bagolwane, balebedi ba ba etang, maloko a Dikomiti Tsa Makala, balebedi ba ba kwa Bethele le ba bangwe. Mo godimo ga moo, ba katisa bakaulengwe ba ba thusang mo dikomiting tse di farologaneng tsa Setlhopha se se Laolang. Bakaulengwe bano ba tla kgona go tlhokomela batho ba Modimo fa batlodiwa ba sena go ya kwa legodimong. Fa batlodiwa ba ya kwa legodimong go ela kwa bowelong jwa pitlagano e kgolo, batho ba ga Jehofa ba ba mo lefatsheng ba tla tswelela ba mo obamela ka boikanyegi ba eteletswe pele ke Jesu. Ke nnete gore ka nako eo, ditšhaba tse di kopaneng tse Baebele e di bitsang Gogo wa Magogo di tla tlhasela batho ba Modimo. (Esek. 38:18-20) Mme ga ba kitla ba dira gore re se ka ra obamela Jehofa ka gonne o tla re sireletsa. Mo ponatshegelong, moaposetoloi Johane o ne a bona “boidiidi jo bogolo” jwa dinku tse dingwe bo tswa “mo pitlaganong e kgolo.” (Tshen. 7:9, 14) Seno se re netefaletsa gore Jehofa o tla ba sireletsa. w24.02 5-6 ¶13-14

Re tshwanetse go dira eng gore Modimo a re neye moya o o boitshepo? Re tshwanetse go o rapelela, go ithuta Baebele le go ya dipokanong. Go dira dilo tseno go tla re thusa gore re nne le “maungo a moya o o boitshepo.” (Bagal. 5:22, 23) Modimo o tla re naya moya o o boitshepo fa fela re akanya dilo tse di siameng e bile re itshwara sentle. Ga a kitla a re naya moya wa gagwe fa re tswelela re akanya dilo tse di sa siamang e bile re sa itshware sentle. (1 Bathes. 4:7, 8) Mo godimo ga moo, ga re a tshwanela go “nyatsa boporofeti.” (1 Bathes. 5:20) Mo temaneng eno fa go buiwa ka “boporofeti,” go tewa melaetsa e Jehofa a re nayang yone a dirisa moya o o boitshepo, go akaretsa melaetsa e e buang ka letsatsi la ga Jehofa, le e e tlhalosang gore re tshela mo malatsing a bofelo. Ga re ipolelele gore ntwa ya Aramagedona e tla tla re setse re sule. Go na le moo, re bontsha gore re a itse gore go gaufi gore e tle ka go dira ditiro tse di ‘bontshang gore re ineetse mo Modimong’ le ka go itshwara sentle.​—2 Pet. 3:11, 12. w23.06 12 ¶13-14

Re tshwanetse go dira eng fa go tlhaga ditshwantsho tsa tlhakanelodikobo ka tshoganyetso mo didirisiweng tsa rona tsa ileketeroniki? Ga re a tshwanela go di lebelela. Go tla nna motlhofo go dira jalo fa re gopola gore botsala jwa rona le Jehofa bo botlhokwa fela thata. Boammaaruri ke gore, le fa ditshwantsho dingwe e se tsa tlhakanelodikobo di ka dira gore motho a nne le keletso ya go tlhakanela dikobo. Goreng re sa tshwanela go di lebelela? Ka gonne ga re batle go dira sepe fela se se ka dirang gore re feleletse re dirile boitsholo jo bo sa siamang. (Math. 5:28, 29) Mogolwane mongwe wa kwa Thailand yo o bidiwang David a re: “Ke na le go ipotsa go re: ‘Le fa ditshwantsho tseno e se tsa tlhakanelodikobo, a Jehofa o tla itumela fa ke di lebelela?’ Go ipotsa potso eno go nthusa gore ke dire se se siameng.” Go boifa Jehofa go tla re thusa gore re se ka ra dira dilo tse di sa siamang. Baebele e a re “go boifa Jehofa ke tshimologo ya botlhale.” w23.06 23 ¶12-13

Ka nako eo, ‘diphaposi tse di kwa teng’ e ka nna diphuthego tsa rona. Jehofa o solofetsa gore o tla re sireletsa fa re tswelela re mo direla re na le bakaulengwe le bokgaitsadi. Ka jalo re tshwanetse go leka ka natla gone jaanong go rata bakaulengwe le bokgaitsadi ka lorato lwa mmatota. Go dira jalo go ka boloka matshelo a rona. “Letsatsi le legolo la ga Jehofa” le tlile go nna thata tota. (Sefa. 1:14, 15) Batho ba ga Jehofa le bone ba tlile go nna le mathata. Mme fa re ipaakanya gone jaanong, re tla kgona go ritibala le go thusa batho ba bangwe ka nako eo. Re tla kgona go itshokela mathata mangwe le mangwe a re tla nnang le one. Fa bakaulengwe le bokgaitsadi ba nna le mathata, re tla dira sotlhe se re ka se kgonang go bontsha gore re ba tlhomogela pelo le go ba thusa ka dilo tse ba di tlhokang. E bile fa re rata bakaulengwe le bokgaitsadi gone jaanong, re tla bontsha gore re a ba rata le mo nakong e e tlang. Fa re dira jalo, Jehofa o tla re naya botshelo jo bo sa khutleng mo lefatsheng le le se nang masetlapelo le mathata.​—Isa. 65:17. w23.07 7 ¶16-17

Go le gantsi fa Lefoko la Modimo le bua ka batho bangwe ba ba neng ba na le tumelo, le a re ba ne ba nonofile. Mme gone, ga se ka metlha ba neng ba ikutlwa jalo. Ka sekai, ka dinako dingwe Kgosi Dafide o ne a le pelokgale e bile a le “thata jaaka thaba,” mme ka dinako tse dingwe o ne a le bokoa e bile a “tshoga thata.” (Pes. 30:7) Moya wa Modimo o ne o thusa Samesone gore a nne le maatla. Mme gone Samesone o ne a itse gore kwantle ga moya oo, o tla ‘nna bokoa a bo a tshwana le batho ba bangwe botlhe.’ (Baatlh. 14:5, 6; 16:17) Ka jalo, Jehofa ke ene a neng a thusa batlhanka bano ba gagwe ba ba ikanyegang gore ba nne le maatla. Moaposetoloi Paulo le ene o ne a itse gore Jehofa o tla mo naya maatla. (2 Bakor. 12:9, 10) O ne a lwala. (Bagal. 4:13, 14) Ka dinako tse dingwe go ne go le thata gore a dire se se siameng. (Bar. 7:18, 19) Mo godimo ga moo, o ne a tle a tlhobaele e bile ka dinako dingwe o ne a ipotsa gore o tla diragalelwa ke eng. (2 Bakor. 1:8, 9) Le fa go ntse jalo, o ne a re fa a le bokoa ke gone a leng maatla. O ne a itse gore Jehofa o tla mo thusa go itshokela mathata a gagwe. w23.10 12 ¶1-2

Fa ka dinako dingwe re ikutlwa re se batho ba sepe, re tshwanetse go nna re gopotse gore Jehofa ke ene a re gogetseng kwa go ene. (Joh. 6:44) O bona dinonofo tse dintle tse re nang le tsone tse rona re ka tswang re sa di bone, e bile o a itse gore re batho ba ba ntseng jang. (2 Ditir. 6:30) Ka jalo, re ka tlhatswega pelo gore o re tsaya re le botlhokwa. (1 Joh. 3:19, 20) Bangwe ba rona re ne re dira dilo tse di sa siamang pele re ithuta boammaaruri, mme re ka tswa re sa ntse re ikutlwa molato. (1 Pet. 4:3) Tota le bangwe ba ba nang le nako e telele ba direla Jehofa ba sa ntse ba lwantshana le mekgwa mengwe e e sa siamang. Fa e le gore ka dinako dingwe o ikutlwa e kete Jehofa ga a go itshwarela, itse gore batlhanka bangwe ba gagwe ba mo nakong e e fetileng ba ne ba tle ba ikutlwe jalo. Ka sekai, moaposetoloi Paulo o ne a utlwa botlhoko tota fa a akanya ka diphoso tse a ileng a di dira. (Bar. 7:24) Le fa gone a ne a ikwatlhaetse diphoso tseo e bile a kolobeditswe, o ne a sa ntse a tsaya gore ‘ga a botlhokwa jaaka baaposetoloi ba bangwe’ le gore o na le “maleo a mantsi.”​—1 Bakor. 15:9; 1 Tim. 1:15. w24.03 27 ¶5-6

Tshwetso e e sa siamang e Kgosi Jehoashe a ileng a e dira, e re ruta gore re tshwanetse go tlhopha ditsala tse di ratang Jehofa e bile di batla go mo itumedisa. Ditsala tseo di tla re thusa go dira se se siameng. Ga o tlhoke go nna tsala fela le dithaka tsa gago. Nna o gopotse gore Jehoashe o ne a le monnye thata mo go Jehoiada, mme e ne e le ditsala. Ipotse go re, ‘A ditsala tsa me di nthusa go atamalana le Jehofa? A ba ikobela Jehofa e bile ba nthotloetsa gore le nna ke dire jalo? A ba rata go bua ka Jehofa le dilo tse ba di ithutileng mo Baebeleng? A ba a nkgalemela fa ke sa dire dilo sentle?’ (Diane 27:5, 6, 17) Nnete ke gore fa ditsala tsa gago di sa rate Jehofa, di ka se go thuse ka sepe. Mme fa e le gore ba rata Jehofa, dilo di tla go tsamaela sentle.​—Diane 13:20. w23.09 9-10 ¶6-7

Alefa ke alefabete ya ntlha mo dialefabeteng tsa Segerika, mme omega ke ya bofelo. Fa Jehofa a re, “Ke nna Alefa le Omega” o bontsha gore fa a simolotse sengwe, o a se fetsa. Fa Jehofa a sena go bopa Adame le Efa, o ne a ba raya a re: “Atang lo nne bantsi lo tlatse lefatshe lo bo lo nne beng ba lone.” (Gen. 1:28) Fa Jehofa a ne a bua se a se ikaeletseng ka batho le ka lefatshe, e ne e le tshimologo kgotsa “Alefa.” Fa Jehofa a tla bo a dirile se a se solofeditseng, bana ba ga Adame le Efa ba tladitse lefatshe e bile ba dirile gore e nne paradaise, seo e tla bo e le bokhutlo kgotsa “Omega.” Fa Jehofa a sena go bopa “magodimo le lefatshe le dilo tsotlhe tse di mo go tsone,” o ile a bua sengwe se se bontshang gore o ne a tla netefatsa gore boikaelelo jwa gagwe ka batho le ka lefatshe bo tla diragadiwa kwa bowelong jwa letsatsi la bosupa.​—Gen. 2:1-3. w23.11 5 ¶13-14

Go tswa kwa Babelona go ya kwa Iseraele go ne go ka tsaya dikgwedi di ka nna nnê. Le fa go ntse jalo, Jehofa o ne a solofeditse gore o tla tlosa dikgoreletsi tsotlhe tse ba neng ba ka kopana le tsone mo tseleng. Bajuda ba ba ikanyegang ba ne ba itse gore go boela kwa Iseraele, go ne go tla ba tswela mosola thata le fa ba ne ba ka tshwanelwa ke go tlogela dilo dingwe. Fa ba le kwa Iseraele ba ne ba tla kgona go obamela Jehofa ka tsela e a e amogelang. Go ne go se na tempele ya ga Jehofa kwa Babelona. Molao wa ga Moshe o ne o laela Baiseraele gore ba ntshe ditlhabelo. Le fa go ntse jalo, go ne go se na dibeso kgotsa baperesiti kwa Babelona. Mo godimo ga moo, batho ba ba neng ba obamela medingwana ba ne ba le bantsi thata go feta ba ba neng ba obamela Jehofa e bile ba tshela ka melao ya gagwe. Ka jalo, Bajuda ba le bantsi ba ba neng ba rata Jehofa ba ne ba swegaswega pelo go boela kwa Iseraele gore ba kgone go obamela Jehofa ka tsela e e mo itumedisang. w23.05 14-15 ¶3-4

Ga go motlhofo go dira se se siameng mo lefatsheng leno le le tletseng boitsholo jo bo sa siamang. Ka jalo re tlhoka thuso ya moya wa Modimo o o boitshepo gore re kgone go tswelela re itshwara “jaaka bana ba lesedi.” (1 Bathes. 4:3-5, 7, 8) Moya o o boitshepo o ka re thusa gore re se ka ra akanya jaaka batho ba lefatshe leno ba ba sa ikobeleng Jehofa. Gape o ka re thusa gore “re dire se se siameng e bile re tsamaye mo tseleng e e siameng.” (Baef. 5:9) Re tshwanetse go dira eng gore Jehofa a re neye moya wa gagwe o o boitshepo? Re tshwanetse go o rapelela. Jesu o ne a re fa re ‘kopa moya o o boitshepo,’ Jehofa o tla re o naya. (Luke 11:13) Gape Jehofa o re naya moya wa gagwe o o boitshepo fa re le kwa dipokanong re mmaka re na le Bakeresete mmogo le rona. (Baef. 5:19, 20) Moya o o boitshepo wa Modimo o re thusa gore re tshele ka tsela e e mo itumedisang. w24.03 23-24 ¶13-15

A o tlhoka bopelotelele jo bo oketsegileng? Fa go le jalo, kopa Jehofa gore a go thuse. Bopelotelele ke nngwe ya dinonofo tse moya o o boitshepo o re thusang go nna le tsone. (Bagal. 5:22, 23) Ka jalo, re ka kopa Jehofa gore a re neye moya o o boitshepo le gore a re thuse go nna le nonofo eno. Fa go tlhaga maemo a a thata, re tshwanetse go ‘nna re kopa’ moya o o boitshepo gore o re thuse go nna pelotelele. (Luke 11:13) Gape re tshwanetse go kopa Jehofa gore a re thuse go akanya jaaka ene. Fa re sena go rapela, re tshwanetse go dira sotlhe se re ka se kgonang gore re nne pelotelele. Fa re nna re kopa Jehofa gore a re thuse gore re nne pelotelele e bile re leka ka natla go bontsha nonofo eno, Jehofa o tla re thusa gore re nne le yone. Go akanyetsa kwa teng ka batho ba go buiwang ka bone mo Baebeleng le gone go ka re tswela mosola. Baebele e bua ka batho ba le bantsi ba ba neng ba le pelotelele. Go akanyetsa kwa teng ka bone, go ka re thusa go bona ditsela tse re ka bontshang bopelotelele ka tsone. w23.08 22 ¶10-11

Jesu o ile a tlhomamisetsa moaposetoloi Petere gore Jehofa o ne a tla mo tlhokomela. Fa a sena go tsosiwa, o ne a dira kgakgamatso e a kileng a e dira. O ile a dira gore Petere le baaposetoloi ba bangwe ba tshware ditlhapi tse dintsi. (Joh. 21:4-6) Ga go pelaelo gore kgakgamatso eo, e ile ya tlhomamisetsa Petere gore Jehofa o ne a tlile go mo naya dilo tse a neng a di tlhoka. Gongwe e bile o ile a gopola gore Jesu o ile a re Jehofa o ne a tla tlhokomela batho ba ba nnang ba ‘batla Bogosi pele.’ (Math. 6:33) Seo se ile sa thusa Petere gore a dire tiro ya go rera go na le go tshwara ditlhapi. Ka Pentekosete ya 33 C.E. o ne a neela puo e e ileng ya thusa batho ba le bantsi gore ba amogele dikgang tse di molemo. (Dit. 2:14, 37-41) Moragonyana o ile a thusa Basamaria le batho ba e neng e se Bajuda gore e nne balatedi ba ga Jesu. (Dit. 8:14-17; 10:44-48) Eleruri Jehofa o ile a dirisa Petere gore a thuse batho ba ditšhaba tse di farologaneng gore ba mo direle! w23.09 20 ¶1; 23 ¶11

Dingwaga di ka nna pedi fa Bababelona ba sena go senya Jerusalema, Kgosi Nebukadenesare wa kwa Babelona o ne a lora toro e e tshosang. Mo torong eo, o ile a bona setshwantsho se segolo. O ne a laela banna ba gagwe ba ba botlhale mmogo le Daniele gore ba mmolelele gore o lorile eng le gore toro eo e kaya eng. Mme fa ba ne ba ka palelwa ke go dira jalo o ne a tla ba bolaya. (Dan. 2:3-5) Daniele o ne a tshwanetse go dira sengwe, go seng jalo batho ba le bantsi ba ne ba tla bolawa. O ne “a ya kwa kgosing mme a e kopa gore e mo neye nako ya gore a e bolelele tlhaloso ya toro eo.” (Dan. 2:16) Seno se bontsha gore Daniele o ne a le pelokgale e bile a na le tumelo. Goreng re rialo? Ga go na gope mo Baebele e re bolelelang gore Daniele o ne a kile a tlhalosa ditoro. O ile a kopa ditsala tsa gagwe gore “ba rapele Modimo yo o kwa legodimong gore a ba utlwele botlhoko mme a ba senolele sephiri seno.” (Dan. 2:18) Jehofa o ne a ba araba. O ne a thusa Daniele gore a tlhalose toro ya ga Nebukadenesare. Ka jalo, Daniele le ditsala tsa gagwe ga ba a ka ba bolawa. w23.08 3 ¶4

Akanya kafa go nna pelotelele go re tswelang mosola ka gone. Fa re le pelotelele re a itumela e bile re a ritibala. Gape go nna pelotelele go ka re thusa gore re nne le kagiso ya mogopolo le gore re se ka ra tshabelwa ke malwetse. Fa re le pelotelele, re tla kgona go dirisana sentle le ba bangwe. Go tla nna le kutlwano mo phuthegong. Fa mongwe a re kgopisa mme re sa galefe ka bonako, seo se tla dira gore dilo di se ka tsa nna maswe le go feta. (Pes. 37:8, ntlh.; Diane 14:29) Sa botlhokwa le go feta ke gore re etsa Jehofa e bile re atamalana le ene. Bopelotelele ke nonofo e e botlhokwa e e re tswelang mosola. Le fa ka dinako tse dingwe go se motlhofo gore re nne pelotelele, Jehofa a ka re thusa gore re nne le nonofo eno. Fa re ntse re letetse lefatshe le lesha, re ka tlhatswega pelo gore “leitlho la ga Jehofa le lebile ba ba mmoifang, ba ba letetseng lorato lwa gagwe lo lo sa kgaotseng.” (Pes. 33:18) E kete rotlhe re ka ikemisetsa go nna pelotelele! w23.08 22 ¶7; 25 ¶16-17

Jakobe o ile a tlhalosa gore motho a ka nna a ipolelela gore o na le tumelo, mme ditiro tsa gagwe di bo di mo latola. (Jak. 2:1-5, 9) Gape o ile a dira sekai ka motho yo o bonang ‘mokaulengwe kgotsa kgaitsadi a tlhoka diaparo kgotsa dijo,’ a bo a sa mo thuse. Tota le fa motho yoo a ka ipolelela gore o na le tumelo, dilo tse a di dirang ga di bontshe jalo. (Jak. 2:14-16) Jakobe o ile a dirisa sekai sa ga Rahabe go gatelela gore motho o tshwanetse go bontsha ka se a se dirang gore o na le tumelo. (Jak. 2:25, 26) Rahabe o ile a utlwela ka se Jehofa a ileng a se dira, mme o ile a lemoga gore Jehofa o ema Baiseraele nôkeng. (Josh. 2:9-11) O ile a bontsha gore o na le tumelo ka go sireletsa ditlhola tse pedi tsa Baiseraele fa kgosi e ne e batla go ba bolaya. Le fa a ne a dira diphoso e bile a sa ikobele Molao wa ga Moshe, Jehofa o ile a mo tsaya e le motho yo o siameng ka ntlha ya se a ileng a se dira. Se Rahabe a ileng a se dira, se re thusa go lemoga gore re tshwanetse go bontsha ka se re se dirang gore re na le tumelo. w23.12 5-6 ¶12-13

Ga re a tshwanela go kgotsofalela go ithuta fela dithuto tse re di rutilweng fa re ne re simolola go ithuta boammaaruri. Re tshwanetse go ithuta “dilo tse di boteng tsa Modimo,” mme moya o o boitshepo o tla re thusa go di tlhaloganya. (1 Bakor. 2:9, 10) O ka ipha nako go dira dipatlisiso tse di tla go thusang gore o atamalane le Jehofa. Ka sekai, o ka bala dipego tse di bontshang gore Jehofa o ne a rata batlhanka ba gagwe ba mo nakong e e fetileng, o bo o leka go bona gore di bontsha jang gore le wena o a go rata. Gape o ka ithuta gore Jehofa o ne a batla gore Baiseraele ba mo obamele jang le gore o batla gore rona re mo obamele jang. Mo godimo ga moo, o ka dira dipatlisiso ka boporofeti jo Jesu a ileng a bo diragatsa fa a ne a le mo lefatsheng.O ka dirisa Watch Tower Publications Index kgotsa Kaedi ya go Dira Dipatlisiso ya Basupi ba ga Jehofa go dira dipatlisiso ka ditlhogo tseo. Fa o dira jalo, tumelo ya gago e tla nonofa, e bile o tla “bona kitso ya Modimo.”​—Diane 2:4, 5. w23.10 18-19 ¶3-5

Lefoko “thata” le moaposetoloi Petere a le dirisitseng mo temaneng eno fa le ranolwa jaaka le ntse, le kaya go “phutholola.” Mo karolong ya bobedi ya temana eno, o tlhalosa gore go ratana thata go tla re thusa gore re dire eng. A re go tla re thusa gore re itshwarelane. Ka sekai, a re re o na le tafole e e nang le mengapo e mentsi. O ka phuthololela letsela mo go yone gore le fitlhe mengapo eo gore e se ka ya bonala. Letsela leo ga le kitla le fitlha mongapo o le mongwe fela, mme le tla e fitlha yotlhe. Ka tsela e e tshwanang, fa re rata bakaulengwe le bokgaitsadi thata, re tla ba itshwarela, le fa ba re direla diphoso di le dintsi. Re tshwanetse go rata bakaulengwe le bokgaitsadi thata jaana mo re kgonang go ba itshwarela fa ba re diretse diphoso, tota le fa go dira jalo go se motlhofo. (Bakol. 3:13) Fa re ba itshwarela, re bontsha gore re ba rata thata, le gore re batla go itumedisa Jehofa. w23.11 11-12 ¶13-15

Fa Kgosi Josia a na le dingwaga di le 26, o ne a simolola go baakanya tempele. Fa tempele e ntse e baakanngwa, go ne ga bonwa “buka ya Molao wa ga Jehofa o o neng o neilwe Moshe.” Kgosi Josia o ne a kopa gore e balwe, mme ka yone nako eo, o ne a simolola go dira se se neng se kwadilwe mo go yone. (2 Ditir. 34:14, 19-21) A o ipeetse mokgele wa go bala Baebele letsatsi le letsatsi? Fa e le gore go ntse jalo, go ntse go tsamaya jang? A o tla o kwala ditemana tse di tla go thusang? Fa Josia a na le dingwaga di ka nna 39, o ne a dira phoso e e neng ya dira gore a bolawe. O ne a dira se a neng a akanya gore se siame go na le go kopa kaelo ya ga Jehofa. (2 Ditir. 35:20-25) Re ithuta eng? Re tshwanetse go batla kaelo ya ga Jehofa le fa re ka tswa re godile kgotsa re na le lobaka lo loleele re ithuta Baebele. Re ka dira jalo ka go rapela ka metlha, go ithuta Baebele le go kopa kgakololo mo Bakereseteng ba bangwe. Fa re dira jalo, ga re kitla re dira diphoso tse di ka re tsenyang mo mathateng e bile re tla itumela.​—Jak. 1:25. w23.09 12 ¶15-16

Baebele e bua ka basadi ba le bantsi ba ba neng ba rata Jehofa e bile ba mo direla. Ba ne ba “na le mekgwa e mentle” e bile “ba ikanyega mo dilong tsotlhe.” (1 Tim. 3:11) Le gompieno go na le bokgaitsadi ba le bantsi ba ba tlhomang sekao, ba bokgaitsadi ba basha ba ka ithutang dilo di le dintsi mo go bone. Bokgaitsadi ba basha, ga go pelaelo gore go na le bokgaitsadi ba ba tlhomang sekao ba lo ka ba etsang mo phuthegong ya lona. Nnang lo gopotse gore dilo makwati di tsewa mo go ba bangwe. Ka jalo, leka go bona gore ba na le dinonofo dife tse dintle, go tswa foo o bo o ba etsa. Gore re nne Bakeresete ba ba tlhomang sekao, re tshwanetse go nna boikokobetso. Fa mosadi a le boikokobetso, o tla atamalana le Jehofa e bile o tla kgona go dirisana sentle le batho ba bangwe. Ka sekai, mosadi yo o ratang Jehofa o ikobela se se kwadilweng mo go 1 Bakorintha 11:3. Mo temaneng eno, Jehofa o tlhalosa gore Keresete ke tlhogo ya phuthego mme monna ke tlhogo ya lelapa. Go na le tsela e molaomotheo ono o tshwanetseng go dirisiwa ka yone mo phuthegong le mo lelapeng. w23.12 18-19 ¶3-5

Jehofa o batla gore monna a rate mosadi wa gagwe, a mo tlhokomele le gore e nne tsala ya gagwe. Mo godimo ga moo, o tshwanetse go thusa mosadi wa gagwe go atamalana le Jehofa. Ka jalo, fa o le mokaulengwe e bile o batla go nyala, go nna le bokgoni jwa go akanya, go tlotla basadi le go dira maikarabelo a o a neilweng, go tla go tswela mosola. Fa o sena go nyala, o ka nna le bana. Go na le dilo tse o ka di ithutang mo go Jehofa ka go dira maikarabelo ao. (Baef. 6:4) Jehofa o ne a bolelela Morwawe gore o a mo rata le gore o a mo amogela. (Math. 3:17) Fa o nna le bana, ba bolelele gore o a ba rata o bo o ba akgolele dilo tse dintle tse ba di dirang. Borre ba ba etsang Jehofa, ba thusa bana ba bone gore e nne banna le basadi ba ba tlhomang sekao. O ka ipaakanyetsa maikarabelo ao ka go tlhokomela ba bangwe mo lelapeng le mo phuthegong, e bile o ka ba bolelela gore o a ba rata le gore ba botlhokwa.​—Joh. 15:9. w23.12 28-29 ¶17-18

Le fa gone re direla Jehofa ka boikanyegi, re na le mathata e bile re a lwala fela jaaka batho ba bangwe. Mo godimo ga moo, re ka nna ra bogisiwa ke batho ba ba sa re rateng. Le fa gone Jehofa a sa dire gore re se ka ra nna le mathata, o re solofetsa gore o tla re thusa. (Isa. 41:10) O re thusa gore re kgone go tswelela re itumetse, re dire ditshwetso tse di siameng le gore re ikanyege mo go ene le fa re na le mathata a a boima. Jehofa o solofetsa gore o tla re naya kagiso. (Bafil. 4:6, 7) Re nna le kagiso eno ka gonne re atamalane thata le ene. Baebele e a re kagiso eno, ke e “batho ba ka se kgoneng go e tlhaloganya.” Ka sekai, a o kile wa rapela Jehofa ka tlhoafalo, mme fa o sena go rapela o bo o ikutlwa o wetse makgwafo? O ile wa ikutlwa jalo ka gonne Jehofa o ile a go naya kagiso. w24.01 20 ¶2; 21 ¶4

Batho ba ba ratang Jehofa ba baka leina la gagwe ka pelo yotlhe. Fa re utlwa leina Jehofa, re akanya ka mong wa lone, dinonofo tsa gagwe tse dintle, le dilo tse di gakgamatsang tse a di dirang. Dafide o ne a batla go baka leina la ga Jehofa, e bile o ne a batla go dira jalo ka “sengwe le sengwe se se mo teng” ga gagwe. Seno se raya gore o ne a batla go mmaka ka pelo yotlhe. Balefi le bone ba ne ba ikutlwa fela jalo. Ba ile ba tlhalosa gore ga go kgonege gore ba bake leina la ga Jehofa ka botlalo. (Neh. 9:5) Ga go pelaelo gore tsela e ba neng ba ikutlwa ka yone e ile ya dira gore Jehofa a itumele. w24.02 9 ¶6

Jehofa ga a lebelela gore o dire sengwe se o ka se kgoneng go se dira. (2 Bakor. 8:12) Fa go nna le sengwe se se go kgoreletsang go fitlhelela mokgele wa gago, ithute mo go sone. Nna o akanya ka se o setseng o kgonne go se dira. Baebele e a re: “Modimo ga a tshiamololo mo a ka lebalang tiro ya [gago].” (Baheb. 6:10) Le wena o se ka wa e lebala. Akanya ka dilo tse o setseng o kgonne go di dira. Gongwe o kgonne go nna tsala ya ga Jehofa, go bolelela batho ba bangwe ka ene kgotsa go kolobediwa. Fela jaaka o kgonne go fitlhelela mekgele e o neng o ipeetse yone mo nakong e e fetileng, o ka kgona go fitlhelela le o o ipeetseng one gone jaanong. Jehofa a ka go thusa gore o kgone go fitlhelela mokgele wa gago. Fa o ntse o dira ka natla go fitlhelela mokgele wa gago, itumelele go bona kafa Jehofa a go thusang le kafa a go segofatsang ka gone mo loetong lono. (2 Bakor. 4:7) Jehofa o tla go segofatsa le go feta fa o sa ineele.​—Bagal. 6:9. w23.05 31 ¶16-18

Jehofa o itumelela go bolelela batlhanka ba gagwe gore o a ba rata le gore o a ba amogela. O ile a bolelela Morwawe ka makgetlo a le mabedi gore o a mo rata le gore o a mo amogela. (Math. 3:17; 17:5) A le wena o ka rata go utlwa Jehofa a go bolelela gore o a go amogela? Jehofa ga a bue le rona ka tlhamalalo, mme o bua le rona a dirisa Baebele. Jesu o ne a nna a bolelela barutwa ba gagwe gore o a ba rata. O ne a na le botho jo bo tshwanang le jwa ga Rraagwe, ka jalo fa re bala se a neng a se bolelela barutwa ba gagwe, go ntse jaaka e kete Jehofa o bua le rona. (Joh. 15:9, 15) Fa re lebana le diteko, seo ga se reye gore Jehofa ga a tlhole a re amogela. Go na le moo, diteko di re naya tshono ya go bontsha gore re a mo rata le gore re a mo tshepa.​—Jak. 1:12. w24.03 28 ¶10-11