Phitlhelelo e e Gakgametseng ya Costa Rica

“LO DIRA se rona re se ithutileng fela!” go ne ga akgela jalo moijeniere mongwe wa kago yo o neng a tlile go bona lekala le lesha le le neng le agiwa dikilometara di le somenngwe ka kwantle ga San Josè, mo Costa Rica.

Ke eng se se neng se kgatlhisa thata ka dikago tseno? Di ne di agiwa ka mofuta wa dipotana tse di bopetsweng ruri​—o o leng wa ntlha mo Costa Rica. La ntlha go ne go agiwa motheo le dipilara. Go tswa foo, gone fela mo lefelong la kago, dikarolo tsa dipotana di ne di bopelelwa fa fatshe mo godimo ga tse dingwe di tlhatlhaganngwa. Dikarolo tseno tsa dipotana tse di bopetsweng fa fatshe morago di ne di tsholediwa di bo di kukiwa ka selo se se kukang mme di bopelelwa fa di tshwanetseng teng. Labotelo, go ne go rulelwa, mme jaanong se se tshwanetseng go dirwa fela e nne go feleletsa fale le fale.

Tiro eno gape e ne e le kago ya ntlha e Mokgatlho wa Watch Tower o neng o leka go e aga ka mofuta wa dipotana tse di bopetsweng ruri ka kwantle ga United States. Ka lebaka leno, badiri ba ba tswang kwa makaleng a mangwe a a ikaelelang go aga kana go atolosa ba ne ba le teng ba etsetlhoko kafa go neng go dirwa ka teng. Ba ba neng ba le teng gape, e ne e le baiieniere le bora-dikago ba ba tswang dikarolong tse dingwe. Botlhe ba ne ba kgatlhiwa ke seo ba neng ba se bona.

Dikago tseo di ne tsa agiwa ka tsela e ntle e e tshwanang le ya mafatshe a a busiwang ke Spain, di ruletswe ka dithaele tse di khubidu gape di na le difensetere tse di gogoropo. Tselana e e dikologang tshingwana ya dithunya e kgolokwe e ya kwa kgorong e kgolo le kwa kamoreng ya boikhutso. Kafa mojeng go na le kago ya marobalo ya matlhatlaganyane a mabedi, e e nang le matlwana a le 24 le kamore e kgolo ya boitloso-bodutu e mo go yone go nang le motlobo wa dibuka, mafelo a go ithutela, le leiso le le ntle. Go bapa le yone go na le kamore ya bojelo e e nnang batho ba le 100, le lefelo la boapelo la segompieno le kwa go tlhatswediwang diaparo gone. Ntlha e nngwe ya segotlo go na le kago ya ofisi e e nang le diofisi di le 13 le kamore ya diphuthego e e agilweng go dikologa tshingwana e ntle e e senang borulelo e e patsimelwang ke lesedi la letsatsi Kago e kgolo e e kafa molemeng ke mabolokelo a go bolokelwang dibuka le didirisiwa tse dingwe mo go yone.

Mongwe le mongwe yo o neng a etile o ne a gakgamadiwa ke se a se bonang. Dikakgelo tse di neng di utlwiwa gangwe le gape e ne e le tse di tshwanang le: “A tiro ya boleng jo bogololo!” “Ga ke ise ke ko ke bone selo se sentle mo go kana!” “Kwantle ga pelaelo seno ke tiro ya lorato.”

Tota, seno sotlhe se ne se kgonegile ka “tiro ya lorato.” Bakaulengwe le bokgaitsadi ba ba fetang 4 700, go kopanyeletsa le ba ba 295 ba ba tswang mafatsheng a mangwe, ba ne ba dira tiro eo mo dikgweding di le 24. Bontsi jwa didirisiwa le dilo tsa kago di ne di diretswe gone mo lefelong la kago. Ka sekai, kwa tshimologong go ne ga dirwa lifiti ya matlhatlaganyane a mabedi, eo ka lorato bakaulengwe ba neng ba e bitsa Julio. Matlhakanyetso a semente a bidiwang Bertha le Martha a ne a rekwa a ba a baakanyediwa tiro eo. Dipone, dilo tsa lesedi la motlakase, ditshipi tse i dirilweng ka tshipi e e tlhakantsweng, mapalamelo le mafologelo a mokgabiso wa bogologolo, jalo le jalo, tsotlhe di ne di dirilwe ke bakaulengwe bao ba neng ba sena boitemogelo bope mo ditirong tseno. “Botlhaga jwa bakaulengwe ba naga eno mo tirong eno bo ne bo kgatlha tota,” go ne ga bolela jalo mokaedi wa tiro eo.

Bogolo jwa botlhaga joo bo ne jwa bonala ka January 4, 1987, fa boidiidi jwa batho ba ba 13 111 ba ne ba tla kgakolong. Maribela a a kata bokone jwa kamore ya boitloso-bodutu a ne a dirisiwa jaaka serala mme boidiidi jwa batho bo ne jwa phuthaganela mo lebaleng le legolo le le kwa tlase. Bo-Mokaulengwe M. G. Henschel le L. A. Swingle ba Setlhopha se se Laolang sa Basupi ba ga Jehofa e ne e le bone dibui tse dikgolo mo thulaganyong eo. Puo e e matlhagatlhaga ya ga Mokaulengwe Swingle e ne e na le setlhogo se se reng “Jehofa o a Ungwisa,” mme mo puong ya kgakolo, Mokaulengwe Henschel o ne a thusa botlhe go anaanela gore kago e ntle e botlhokwa mo bathong ba ga Jehofa fela fa ba tswelela ba bontsha maungo a moya.

Ba ba neng ba kopanngwa mo tiragalong eno e e kgethegileng e ne e le maloko a lelapa la ntlha la barongwa ba Gilead mo Costa Rica. Jaanong ka ba setse ba tsofetse, ba ne ba itumedisiwa thata ke go kopana mono le bosupi jo bo bonalang jwa tshegofatso e kgolo ya ga Jehofa mo tirong ya go rera kaga Bogosi mo Costa Rica go kgabaganya dingwaga Ka jaana go ne go na le thuso e ntle ya legae leno le legolo, le le agegileng sentle, le bile le dule diatla, botlhe ba ba neng ba le teng ba ne ba tshepa gore leina la ga Jehofa le ne le tla nna le galalediwa mo lefatsheng leno la boboa-tsatsi.

[Ditshwantsho mo go tsebe 31]

Lebota le le bopeletsweng fa fatshe le tsholediwa . . . le ba le bewa mo boemong jwa lone

Tselana e e dikologang e ya kwa kagong ee agilweng ka mokgwa wa mafatshe a a busiwang ke Spain

Bontlhanngwe jwa boidiidi jo bo tlhagafetseng mo letsatsing la kgakalo