Dipotso tse di Tswang go Babadi

◼ Ga twe batho ba Modimo ba “tlamele ba ga gabō,” jalo ke ka ntlhayang fa Aberahame a ne a kgona go lelekela Hagare le Ishemaele kwa nageng?

Ke selo se se lorato le se se tshwanelang gore batlhanka ba Modimo ba tlhokomele bamalapa a bone ba ba tlhokang. Malebana le batsadi ba Bakeresete, moaposetoloi Paulo o ne a kwala a re: “Me ha moñwe a sa tlamele ba ga gabō, bogolo ba e leñ ba ntlo ea gagwè, o latotse tumèlō, me o boshula go gaisa eo o sa dumeleñ.”—1 Timotheo 5:8.

Re ka tlhomamisega gore tiro e e dirilweng ke Aberahame e ne e sa fapaane ka gope le boikaelelo jwa kgakololo e e ntseng jalo ya bomodimo, ka go bo o tlhongwa jaaka sekao sa tumelo ya boammaaruri, ka go nna “tsala ea Modimo.”—Yakobe 2:23; Bahebera 11:8-19.

Modimo o ne a solofetsa gore tshegofatso e tla tla ka losika lwa ga Aberahame, kana moruaboswa. Fa Sara a sena go tsofala mme a santse a le moopa, o ne a kgothaletsa Aberahame go tsala ngwana wa mosimane ka lelata la gagwe la Moegepeto ebong Hagare. Moragonyana, fa Hagare a sena go ima, o ne a simolola go tlhokela Sarah maitseo mo e leng gore seo se ne se ka tlhalosiwa jaaka ‘se se sa siamang,’ kana phoso e e masisi kgatlhanong le mosadi yo o rategang wa ga Aberahame. (Ekesodo 23:1; 2 Samuele 22:49; Pesalema 11:5) Aberahame o ne a dumelela Sara go direla Hagare se se mo tshwanetseng, mme jalo Hagare a tshabela kwa nageng, gongwe a boela kwa Egepeto. Pego ga e bolele gore o ne a tsaya mefago, jalo o ka nna a bo a ne a itse gore o ne a ka bona dijo le metsi kwa mathibelelong a mangwe, jaaka mo ditlhopheng tsa Bakgarakgatshegi.—Genesise 12:1-3, 7; 16:1-6.

Moengele o ne a tshereganya mme a bolelela Hagare a re a boe, gore o tla nna le ditlogolwana di le dintsi, le gore morwawe Ishemaele “o tla nna kgañ le motho moñwe le moñwe.” (Genesise 16:7-12) Go ise go fete dingwaga di le dintsi moragonyana, Ishemaele o ne a itshupa a le kgatlhanong le Isake yo mmotlana, moruaboswa wa mmannete wa ga Aberahame yo o neng a tsetswe ke Sara. Ishemaele o ne a simolola go “shotla” kana go gobolola Isake. Seno e ne e se go lwantshana fela ga bana. Lefoko la Modimo le go kaya e ne e le go “bogisa” losika lo lo boleletsweng pele ke Modimo go Aberahame. Jalo kgato e e nonofileng e ne e tshwanela.—Genesise 21:1-9; Bagalatia 4:29-31.

Jehofa o ne a raya Aberahame a re a reetse mosadi wa gagwe ka se se neng se tshwanetswe go dirwa, go ‘leleka Hagare le morwawe.’ Lemororo Aberahame a ne a seka a itumedisiwa ke go bona Hagare le morwawe ba tsamaya, Aberahame o ne a ba baakanyetsa ka ditlamelo dingwe tsa mefago. Ka go fapaana le nako ya pele fa Hagare a ne a ya kwa nageng, mo sebakeng seno o ne a tsamaya a tshotse senkgwe (gongwe seno se raya dijo tse di farologanyeng) le metsi—tse a neng a di filwe ke Aberahame. Go bonala fa a ne a timela golo gongwe “mo nageñ ea Beresheba,” mme a felelwa ke dijo pele ga a ka bona sengwe sa didiba tsa mo lefelong leo. Mme mathata a gagwe e ne e se a a bayang Aberahame molato, ka go bo a ne a ‘tlametse ba eleng ba gagabo,’ le eleng fa ba ne ba dirile maitseo a a sa siamang mo go dirileng gore a lelekwe mo ntlong ya gagwe.—Genesise 21:10-21.

[Mmapa/Setshwantsho mo go tsebe 31]

(For fully formatted text, see publication)

Lewatle le Legolo

Thaba ya Karemela

Megiddo

Jerusalema

Heberone

Beresheba

Lewatle le le Suleng

Naga ya Borwa

[Motswedi wa Setshwantsho]

Based on a map copyrighted by Pictorial Archive (Near Eastern History) Est. and Survey of Israel

[Setshwantsho]

Wadi Zin, mokgatšha wa noka o o omeletseng mo borwa jwa Beresheba