Jesu Keresete—A ke Modimo, Motho, Kana Tlhamane?

MAITISO mangwe a mmino wa rock a a neng a bulwa mo Broadway mo New York City ka 1971 a ne a tsosa dikgang, ka go bo a ne a dirisa setlhogo sa bodumedi. Mme re ka nna ra re setlhogo seo se ne se sa tsose kgang e e tshwanang le ya gore motho yo go neng go buiwa ka ene thata ke mang.

Nngwe ya dipina tse dikgolo moo e ne e botsa ka go re: “Jesu Keresete Sethakga se Segolo, a o akanya gore o sone se ba reng o sone?” Batho ba bogologolo mo lekgolong la ntlha la dingwaga ba ne ba re Jesu ke mang? Jesu ka boene o ne a botsa barutwa ba gagwe yone potso eo mme a amogela dikarabo di le dintsinyana tse di farologaneng. (Mathaio 16:13, 14) Gompieno, mo e ka nnang dingwaga tse 2 000 moragonyana, e santse e le kgang ya moruthutha gore ene Jesu Keresete ke mang.

A tota go a kgathalesega gore Jesu e ne e le mang? Go itse gore ke mang go ka re ama jang? Ebu, batho ba ba tumileng ba metlha ya bogologolo ba ne ba laola seemo sa ditiragalo, mme ka jalo ba re ama rotlhe, le fa gongwe e ne e se ka tsela e e tlhamaletseng. Mme gompieno jaana ba sule. Ka gone, lemororo ba ile ba re ama ka se ba se dirileng, ga go ka tsela epe ba re amang ka seo ba se dirang.

Lefa go ntse jalo, mo lekgetlong la ga Jesu Keresete boemo bo farologane le joo gotlhelele. Didikadike di dumela gore Jesu o santse a tshela le gompieno, eseng jaaka motho mo lefatsheng mme eleng jaaka moya o o nonofileng kwa legodimong, mme ba na le bosupi jo bo tlhatswang pelo malebana le tumelo e e ntseng jalo. Seo Jesu a ntseng a se dira, segolo-bogolo mo lekgolong leno la bo-20 la dingwaga, se nnile le diphelelo tse di seng kana ka sepe mo bathong ootlhe. Mo godimo ga moo, tsela e Jesu a amang matshelo a rona ka yone ga e felele fela mo go seo a se dirileng mo nakong e e fetileng. Se akareletsa se a se dirang gone jaanong jaana mme, se se itumedisang ke gore, le seo a tla se dirang mo isagweng.

Fa re boela mo setlhogong sa rona: Jesu Keresete—a e ne e le Modimo, motho, kana tlhamane? O akanya jang? Jesu Keresete wa ditlhamane go ne go tla raya gore e ne e se Modimo ebile e ne e se motho, go dira gore go tlhola re bua ka ene go se nne mosola. Mo letlhakoreng le lengwe, re tshwanetse ra tlhoafalela go ithuta ka Jesu yo o tshelang ebile a filwe maatla ke Modimo gore a tlisetse setho melemo e e nnelang ruri.