Pego ya Baboledi ba Bogosi
“Boamarure Bo tla Lo Golola”—Mme Bo Lere Boitumelo
BOAMMAARURI jwa Bibela bo golotse batho ba ba fetang 113000 kwa Boritane, mme ba ba oketsegileng ba ntse ba amogela boammaaruri letsatsi le letsatsi. Ka boammaaruri mafoko a ga Jesu a a diragala a a reng: “Lo tla itse boamarure, me boamarure bo tla lo golola.” (Yohane 8:32) Kgololo eno e felela ka boitumelo, jaaka fa maitemogelo a a latelang go tswa Boritane a bontsha.
◻ Fa Penny a ne a dira bodihedi jwa gagwe jwa ntlo le ntlo, go bolela jalo ofisi ya lekala, mosadi mongwe yo o tsofetseng o ne a mo kgomogela a mo raya a re, “Ke santse ke bereka.” Penny o ne a fetola ka go re o tla mo etela gape. Morago ga malatsi a sekae, ka nako eo a neng a sa tlwaela go eta ka yone, o ne a etela batho ba matlo ao go neng go sena ope mo go one mme a tsena mo go yone ntlo eo a tlhola fela. Mosadi yo o tsofetseng yoo o ne a bula setswalo mme a amogela Penny. “Ke itsile gore o tla boa gape,” a rialo, “mme ebile ke ntse ke go letetse.” Ba ne ba tlotla ka tsholofelo ya Bogosi, mme mosadi yoo o ne a bolela gore o ne a solofela gore go ne go tla nna jalo. O ne a na le dingwaga tse 79, mme monna wa gagwe o ne a sule dingwaga di le tharo tse di fetileng. Kereke eo a neng a e tsena e ne e sa mo gomotsa ka gope mme ebile o ne a sa bone lebaka la go tshela. O ne a batla go swa. Moragonyana, fa Penny a sena go simolola go ithuta Bibela le ene, o ne a bolelela Penny gore o ne a ntse a akanya go ipolaya mme a itse gore go phoso. O ne a ile a rapela Modimo gore o mo gomotse o bo o mo thuse gore a boe a nne le tsholofelo gape. Ka bonya, jaaka a ntse a ithuta, boitlhobogo jwa gagwe bo ne jwa fetoga tsholofelo, a nna le tumelo e kgolo mo go Jehofa a ba a mo leboga. O ne a tlogela kereke eo a neng a sa bolo go e tsena, a kolobediwa a na le dingwaga tse 80, mme jaanong ke mmoledi wa ka metlha yo o tlhaga fela thata. Ka boammaaruri, boammaaruri jwa Lefoko la Modimo bo mo golotse jwa ba jwa mo naya boitumelo jo bogolo.
◻ Boammaaruri kaga Bogosi jwa Modimo bo golola mo botshwarong jwa bodumedi jwa maaka. Gape bo ka fetola botho jwa motho, mme phetogo eno gantsi e kgatlha ba bangwe e bo e ba thusa gore ba bone boammaaruri, jaaka boitemogelo jo bo latelang bo bontsha.
Lekgarebe lengwe le ne la kokota mo legaeng la Mosupi mongwe mme la kopa gore go ithutiwe Bibela le ene. Seno se ne se bakilwe ke eng? Batsadi ba mosadi yoo ba ne ba ithuta Bibela le Basupi ba ga Jehofa, mme phelelo e seo se neng se nnile nayo mo batsading ba gagwe—segolo bogolo rraagwe—e ne e le kgolo ebile e kgatlha mo eleng gore morwadiabone o ne a gakgamala fela thata. Rraagwe, yo o neng a ntse a goga disekerete di le 80 ka letsatsi, o ne a tlogela go goga motsoko gotlhelele fa a ne a tlhalosediwa gore Jehofa o ne a sa go amogele. Mo e ka nnang ka bokhutshwane fela morago ga foo o ne a busetsa bahiri ba gagwe dilo tsotlhe tseo a neng a nnile a di utswa mo nakong e telele. Morwadiabone o ne a bona gore selo seo se nnileng le diphelelo tsa go nna jalo mo batsading ba gagwe eleruri se ne se tshwanetse go tlhatlhobiwa. Jaanong batsadi ba gagwe ba kolobeditswe, mme morwadiabone o tla dipokanong tsotlhe.
Boammaaruri joo Jesu a neng a bo bolela bo ne jwa tlisetsa batho bao ba umakilweng fa godimo le ba bangwe ba ba senang palo boitumelo. Bo ka dira se se tshwanang go bape fela ba ba amogelang boammaaruri jwa Bibela mme ba bo dirisa mo matshelong a bone.—Pesalema 19:7, 8.