A O A Gakologelwa?

A o ile wa itumelela go bala ditokololo tsa bosheng tsa Tora ya Tebelo? He, bona gore a o ka kgona go araba dipotso tse di latelang:

◻ Badisa ba semoya ba na le motheo ofe o o ba letlang go tsaya kgato pele go ya go kopana le batho ba ba neng ba kgaotswe go bona gore a ba ikwatlhaile?

Le eleng ka nako ya fa Baiseraele ba ne ba le kwa botshwarwa mme ba sa ikwatlhae, Jehofa, jaaka modisa, o ne a tsaya kgato mme a ya go ba batla, a ba romelela baperofeti ba gagwe. Badisa ba Bakeresete ba itumelela go thusa motho ope yo o ikwatlhaileng yo o ka tswang e le nku e e timetseng. (Bapisa Luke 15:4-7.)—4/15, ditsebe 21-3.

◻ Setshwantsho sa ga Jesu sa morwa sesinyi se re bontsha jang kafa re tshwanetseng go ikutlwa ka teng fa motho mongwe a busediwa mo phuthegong ya Bokeresete? (Luke 15:22-32)

Mokgele wa rona e tshwanetse ya nna gore re etse rre yo a neng a itumela tota fa morwa wa gagwe wa sesinyi a boa. Ka gone, re tshwanetse go bua le mokaulengwe yo o buseditsweng yono re gololesegile re bo re mo kgothaletse gore a gatele pele mo boammaaruring jaanong.—4/15, tsebe 25.

◻ Ke dilo dife tse di mosola tseo motho a ka di dirang go tila gore a se ka a tlhaselwa ke dikebekwa?

Fa go kgonega, tila go tsamaya mo mafelong a a kotsi bosigo. Fitlha dibenyane tsa gago, mme o tsenye dilo tse di tshwanang le ditsayaditshwantsho mo kgetseng e o rekelang dilwana mo go yone. Ela tlhoko gore o se ka wa tsamaela thata fa thoko ga tsela, segolobogolo fa o tshotse sutukeisi kana kgetsana e e tsholwang ka diatla. (Bona Diane 3:21-23)—5/1, ditsebe 5-6.

◻ Ke ka ntlha yang fa boperofeti jo bo mo go Sefania 2:3 bo re: “E ka tla ea re goñwe loa shuywa mo letsatsiñ ya bogale yoa ga Yehofa”?

Go bolokiwa gore o bone botshelo go ikaegile ka gore a o a ikanyega le go itshoka. (Mathaio 24:13) Ka gone, ke fela ba ba dirang dilo tse Modimo o di batlang le bao ba nnang ba bua puo e e itshekileng ba tlileng go sujwa ka letsatsi la bogale jwa ga Jehofa. (Sefania 2:1, 2)—5/1, tsebe 14.

◻ Go baya Modimo kwa pele mo botshelong jwa gago jwa lelapa go akaretsa eng?

Batsadi le bana ba tshwanetse go obamela Jehofa le go dira dilo tse a di batlang tse di kwadilweng mo Bibeleng.—5/15, tsebe 5.

◻ Ke ka ntlha yang fa Jehofa a se kile a otlhaya baleofi fela ka bonako?

Lebaka le lengwe ke gore leina la Modimo le tshwanetse go itsisiwe mo lefatsheng lotlhe. (Bapisa Baroma 9:17.) Le lengwe ke gore o ne a batla go letla nako gore kgang ya bolaodi jwa Modimo le boikanyegi jwa motho eo e ileng ya nna teng ka ntlha ya botsuolodi jwa kwa Edena e fediwe. Gape, bopelotelele jwa Modimo bo naya ba ba dirang phoso tshono ya go ikwatlhaya le go baakanya ditsela tsa bone. (2 Petere 3:9)—5/15, ditsebe 11-12.

◻ Ke dintlha dife tse di supang gore Bibela e kwadilwe ke mongwe yo o fetang motho?

Bibela e ne ya kwalwa ke bakwadi ba le 40 ba ba farologaneng, ba maemo otlhe a botshelo bao ba tshedileng mo lobakeng lwa dingwaga di le 1 600; lefa go le jalo bakwadi bano botlhe ba ne ba kwala ka setlhogo se le sengwe. Go dumalana gono ga Bibela ga go kake ga bo go itiragaletse fela kana gone gore go ne go kaelwa ke motho mongwe.—6/1, tsebe 5.

◻ Ke tiro efe e e sa tshwaneng le epe le e e sa tlwaelegang e e neng ya bolelelwa pele mo go Isaia 28:21 eo Jehofa a tlileng go e dira mo motlheng ono wa rona?

Tlhagiso e e mo go Tshenolō 17:16 e bontsha gore Letsatsi lengwe babusi ba dipolotiki ba Babelona O Mogolo ba tlile go mo tlhasela. Go tla felela ka gore, Labokeresete yotlhe e senngwe mmogo le ditumelo tsotlhe tse dingwe tsa maaka. Seno e tla nna yone tiro e e sa tshwaneng le epe le e e sa tlwaelegang e Jehofa a tla e dirang mo motlheng ono wa rona.—6/1, tsebe 22-3.

◻ Ke eng seo basadi ba Bakeresete ba tshwanetseng go nna ba se gakologetswe mabapi le go dirisa dibenyane le ditlolontlafatsi?

Bibela ga e thibele go dirisiwa ga dilo tse di ntseng jalo tse di ikgabisang. (Ekesodo 32:2, 3; Esethere 2:7, 12, 15) Mme go tshwanetse ga lekalekanngwa. Mosadi a ka simolola go etsa mekgwa ya lefatshe motlhofo fela, a itlopela setshasi sa molomo, setshasi sa marama, kana sa matlho, go tshwana le Jesebele. (2 Dikgosi 9:30) Go tshwanetse ga tlhokomelwa gore ditlolontlafatsi di se ka tsa tshasiwa thata le dibenyane di se ka tsa dirisiwa di le dintsi thata.—6/1, ditsebe 30-1.

◻ Baiseraele ba ne ba falola jang “matlhoko a a boshula a Egepeto” ao a neng a tletsetletse mo dinakong tseo tsa pele? (Duteronome 7:15)

Go lebega gore ba ne ba falola go tsenwa ke malwetsi ao segolo thata ka gonne ba ne ba tshela go ya ka mekgwa ya boitekanelo eo ba neng ba laelwa go tshela ka yone ke kgolagano ya Molao.—6/15, tsebe 4.

◻ Ke ka ntlha yang fa Modimo o laetse gore batho ba se ka ba ja madi? (Genesise 9:3, 4; Lefitiko 17:10, 11; Ditihō 15:22-29)

Botshelo ke mpho e e tswang mo Modimong mme batho ba kgona go tshela ka ntlha ya sere se se bolokang botshelo se se bidiwang madi. (Pesalema 36:9) Batho ba tshwanetse go supa gore ba tsaya madi a le botlhokwa, ba ikaega ka Modimo gore ke one o ba tshedisang. Ka gone, lebaka la konokono la go bo Modimo o tlhomile molao wa madi e ne e se ka gonne a ne a tsaya gore go ja madi go diphatsa mo boitekanelong, mme e ne e le gore madi a ne a kaya sengwe se se kgethegileng.—6/15, ditsebe 8-9.

◻ Batsadi le basha ba Bakeresete ba ka tlhomamisa jang gore fa ngwana wa bone a gana go tshelwa madi go tla dirwa go ya kafa a kopang ka gone?

Lemororo go ya ka molao e se mogolo, mosha wa Mokeresete o tshwanetse a bo a kgona go tlhalosa ka phepafalo ebile a nonofile lebaka la go bo a gana madi go ya ka bodumedi. Batsadi ba ka nna ba katisa ngwana mo go seo a ka nnang a se bua gore ba kgone go nna le boitemogelo jwa go tlhalosa dilo tseo ba tlhatswegileng pelo ka tsone.—6/15, tsebe 18.

◻ Basadi ba ne ba segofadiwa thata jang mo bodiheding jwa ga Jesu jwa mo lefatsheng?

Jesu o ne a simolola tiro e e neng e gomotsa basadi ba merafe yotlhe, e ba naya tsholofelo, le gore ba tlotliwe ka tsela e e sa tshwaneng le ya pele. O ne a ruta basadi boammaaruri jo bo boteng jwa semoya. (Yohane 4:7, 24-26) O ne a direlwa ke basadi fa a ntse a eta go ralala naga a le mo bodiheding. (Mareko 15:40, 41)—7/1, ditsebe 14-15.

◻ Ke mekgwa efe ya ga Jesu ya go ruta eo batsadi ba ileng ba e fitlhela e le mosola fa ba e dirisa mo baneng ba bone?

Batsadi ba dira sentle go dirisa ditshwantsho go dira gore boammaaruri jwa Bokeresete bo ikuele mo dipelong tsa bana ba babotlana, mme ba ka dirisa dipotso tse di akanyeditsweng thata go bona gore bana ba bone tota ba akanya eng. (Bapisa Mathaio 17:24-27.)—7/1, tsebe 26.

◻ Ke ka ntlha yang fa re tshwanetse go nna le bopelonomi jo bo lorato ka metlha?

Nonofo ya bopelonomi jo bo lorato e re dira gore re ratwe ke Modimo le ba bangwe. E dira gore re amogele baeng le go akanyetsa ba bangwe ka tsela e e oketsegileng. E nonotsha dikgolagano tsa lelapa le mo phuthegong ya Bokeresete. Mo godimo ga tsotlhe, bopelonomi jo bo lorato bo galaletsa Jehofa.—7/15, tsebe 22.

◻ Ke ka ntlha yang fa Mokeresete a kgona go faposiwa mo tseleng fa go tla mo kgannyeng ya ditsala? (1 Bakorintha 15:33)

Motho a ka nna a lebega a le botsalano ebile a sa ganetse, mme fa a sa amege ka tirelo ya ga Jehofa kana a sa dumele Bibela jaaka Bakeresete, ke tsala e e sa siamang. Ka ntlha yang? Gonne botshelo jwa gagwe bo laolwa ke melaometheo e e farologaneng, le dilo tse di leng botlhokwa mo Mokereseteng di ka tswa di sa ikuele thata mo go ene.—7/15, tsebe 23.

◻ Ke ka ntlha yang fa Letsatsi la Katlholo e le nako eo re ka nnang le tsholofelo mo go yone?

Letsatsi la Katlholo ke lobaka lwa dingwaga di le sekete. Le tlile go okamelwa ke Modimo ka boone a na le Morwawe, Jesu Keresete, yoo Modimo o mo tlhomileng go nna Moatlhodi. Eno e tla nna nako ya go dira gore batho ba bone botshelo jo bo itekanetseng joo Adame a ileng a dira gore bana ba gagwe ba se ka ba bo bona. (1 Bakorintha 15:21, 22)—8/1, ditsebe 5-7.