Dilo Tse Di Thusang Tse Di Rometsweng kwa Ukraine

METSWEDI ya dikgang e tletse ka dipego tse di botlhoko. Lefatshe le tlhasetswe ke go tlhakatlhakana ga ikonomi, go tlhaela ga dijo, le tlala—mme jaanong seno se kwa dikarolong tsa koo e kileng ya bo e le Soviet Union pele. Setlhopha Se Se Laolang sa Basupi ba ga Jehofa se ne bosheng jaana sa kopa ofisi ya lekala ya Watch Tower Society e e kwa Denmark gore e rulaganye gore Basupi ba ba tlhokang ba kwa Ukraine ba thusiwe ka dilwana. Bakaulengwe ba kwa Denmark ba ne ba dira eng?

Ba ne ba tsena mo tirong! Ofisi ya lekala e ne ya ntsha bakaulengwe go ya go budutsa mebaraka go reka dijo tse di siameng. Go ne ga romelwa molaetsa kwa diphuthegong tsa batho ba ga Jehofa mo Denmark, ba bolelelwa ka dilo tse di tlhokegang. Lekala leno le bega jaana: “Diphuthego tsotlhe di ne di iketleeditse tota go aba. Kgabagare re ne ra kgona go ntsha bosupi jo bo bonwang ka matlho jwa gore eleruri re ne re utlwela batho ba ba sotlegang bao botlhoko.” Dillori tse tlhano le dibene tse pedi mmogo le bakgweetsi ba ba ithaopileng ba le 14 di ne tsa goroga kwa lekaleng la Denmark ka Matlhatso, December 7, 1991. Ba ba dirang mo lekaleng ba ne ba tlatsa dillori tseno ka dijo tse ba neng ba di rekile.

Ka thapama ka Mantaga, December 9, mokoloko ono o ne wa tsaya loeto lo loleele go ralala Yuropa o ya kwa Ukraine. “E ne e le sengwe se se amang pelo tota fa lelapa lotlhe la Bethele le ne le phuthegile le ba tsholeleditse diatla le ba tsamaisa sentle,” lekala leo le kwala jalo. “Ereka re ne re itse gore batho ba ba mo maetong a a ntseng jalo a go isa dilo tse di thusang ba a tlhaselwa, re ne ra sala bakaulengwe ba rona morago ka dithapelo tse dintsi fa ba le mo tseleng.”

Makgwafo a ne a wela ka December 18. Lekala la Denmark le ne la amogela molaetsa wa gore mokoloko oo o ne o gorogile sentle ka pabalasego kwa Lviv, kwa Ukraine. Bakaulengwe ba kwa Ukraine ba ne ba amogetse dilo tse di tla ba thusang tseo. Abo ba ne ba thusega jang ne fa ba ne ba folosa dipakana di le 1 100 tse di lekanang lelapa tsa dikilogerama di le 20—nngwe le nngwe ya tsone e na le nama, boupe jwa borotho, reisi, sukiri, le dijo tse dingwe! Mokoloko ono o ne wa gorosa ditone di le 22 tsa dilwana. Lekala la Denmark le kwala jaana: “Re itumetse tota, re ntse re leboga Jehofa ka ntlha ya tshireletso ya gagwe le go bo a re neile tshono ya go thusa.”

Go rulagantswe gore go romelwe diaparo. Lekala leno le bega gore le mo go seno, “diphuthego di ile tsa dira go tlala diatla.” Jehofa eleruri o ‘humisitse batho ba gagwe dilo tsotlhe, gore ba ntshe mpho e kgolo.’ (2 Bakorintha 9:11) Le bone gape ba ikutlwa ba na le boitumelo jo bogolo tota jo bo bonwang fela ka go abela bakaulengwe le bokgaitsadi ba bone ba sa ikgogone. Lorato lo ba lo supang ka seno ke lotshwao lo lo tshwayang balatedi ba ga Jesu. (Yohane 13:35) Lorato lo lo ntseng jalo ga lo bontshiwe motlhofo mo lefatsheng leno le le humanegileng.