Bagibeona Ba Ne Ba Batla Kagiso
MOTSE o o fa godimo o o mo godimo ga thaba go bolelwa gore ke lefelo leo Gibeona ya bogologolo e neng e le kwa go lone, dikilometara di ka nna lesome kwa bokone jwa Jerusalema.
O tshwanetse wa bo o itse gore Gibeona e ne ya itsege thata ka bonako fela fa Joshua a sena go tsenya Baiseraele mo Lefatsheng Le Le Solofeditsweng le fa a sena go thopa Jeriko. Bakanana ba Gibeona ba ne ba lemoga gore ba ne ba ka se ka ba kgona go emelana le Baiseraele, bao go neng go phepafetse gore ba engwe nokeng ke Modimo. Ba ne ba tla dira eng? Bagibeona ba ne ba swetsa go loga leano mme ba romela baemedi ba ba neng ba itira ekete ke batsamai ba ba tswang kwa nageng nngwe e e kwa kgakala. Maiteko ano a go batla kagiso a ne a atlega, ka go bo Baiseraele ba ne ba dira kgolagano le bone. Fa leano la bone le sena go senoga, Bagibeona ba ne ba nna baremi ba dikgong le bagi ba metse.
Go lebega Modimo o ne o itumelela batho ba ba neng ba batla kagiso bao. O ne a tshegetsa Joshua mo go femeleng Bagibeona ka nako ya fa ba ne ba tlhaselwa ke dikgosi tse tlhano, Jehofa o bile a bo a dira kgakgamatso ya gore letsatsi le nne le ntse le tlhabile gore go lowe.—Yoshue 9:3-27; 10:1-14.
Baepolodi ba ne ba fitlhela khwiti e e boteng, kana lekadiba le le neng le epilwe mo lentsweng mo thotaneng eno. Bagibeona ba ne ba tsena ka ditepisi mme ba ga metsi mo lefelong leno le le siregileng le le kafa tlase. A seno e ka tswa e le ‘lekadiba la Gibeona’ le le umakilweng mo go 2 Samuele 2:13? Baithutamarope le bone ba ne ba fitlhela le bobolokelo jwa beine bo epilwe mo lentsweng mmogo le didirisiwa tse dintsi tsa go dira beine. Ee, go lebega Gibeona e ne e le kwa go neng go dirwa beine teng.
Mo motlheng wa ga Dafide, tente, kana motlaagana, wa Modimo wa boammaaruri o ne wa bewa koo. Kgosi Solomone o ne a tla fano go tla go dira ditlhabelo, Jehofa o ne a itlhagisa mo go Solomone ka toro a bo a mo solofetsa gore o tla mo naya “pelo e e botlhale le e e tlhaloganyañ,” mmogo le dikhumo. (1 Dikgosi 3:4-14; 2 Ditihalō 1:3) Setlhogo se se mo ditsebeng 12-17 tsa tokololo eno se bontsha gore ditlogolwana tsa batho ba ba neng ba nna mo Gibeona moragonyana ba ne ba bona ditshiamelo mo morafeng oo wa Modimo. A o itse gore seno se ne sa direga jang?
[Motswedi wa Setshwantsho mo go tsebe 32]
Pictorial Archive (Near Eastern History) Est.