‘Mosadi wa Bokau jwa Gago’

“BOAKA bo setse bo lebega jaaka tiro e e tlwaelegileng fela.” Bomankge ba le bantsi ba bolela jalo, go ya ka Los Angeles Times. A mafoko a a ntseng jalo a a go gakgamatsa? Lefa go ntse jalo, ngaka nngwe ya tlhaloganyo ebong Frank Pittman o akanyetsa gore mo e ka nnang 50 lekgolong ya banna le go tloga ka 30 lekgolong go ya go 40 lekgolong ya basadi ba ile ba se ka ba ikanyega. Fa e le gore seo ke boammaaruri, mo e ka nnang sephatlo sa batho botlhe ba ba nyetseng ba dira boaka!

A seo se bolela gore boitsholo jo bo maswe bo siame fela? Le eseng! Go anama ga go sa ikanyege ga go go dire gore go siame—go tshwana fela le go gola ga thubakanyo ya mo mmileng ga go go dire gore re tsietse ba bangwe. Boitsholo jo bo sa siamang bo utlwisa botlhoko. Ka sekai, batho gompieno ba amilwe ke leroborobo la malwetsi a a kotsi a tlhakanelodikobo ao otlhe a ka laolwang motlhofo fela fa batho ba itshola sentle. Bolwetsi jo bo bolayang jwa AIDS bo ne bo ka seka le ka motlha jwa bolaya fa e le gore batho ba ne ba sa repisa mo matshelong a bone a tlhakanelodikobo.

Go na le moo, le eleng batho ba ba botlhale le “ba ba itseng thata” ba utlwa botlhoko fa molekane a sa ikanyege. Kgato nngwe ya go sa ikanyege e ka baka dintho tseo di ka tsayang sephatlo sa botshelo go fola.

Lefa go ntse jalo ntlha ya botlhokwa ke gore go tshameka kana go latlha maitlamo a lenyalo ke boleo jo bo masisi jwa go sa tlotle Modimo, ereka e le Mosimolodi wa lenyalo. Bibela e gakolola jaana: “A nyalō e tlotlwè mo go botlhe.” Gape re tlhagisiwa jaana: “Modimo o tla sekisa bagokahadi le baboaka.”—Bahebera 13:4.

Legale, batho ba ba botlhale ba ela tlhoko mafoko ano a a tlhotlheleditsweng: “Itumèlè mo mosadiñ oa bokau yoa gago.” (Diane 5:18) Ba batla go kgotsofadiwa le go itumedisiwa ke balekane ba bone ba lenyalo. Ka go dira jalo ba tlhokomela boitekanelo jwa bone jwa nama le jwa maikutlo, se se botlhokwa go gaisa, ba tlotla Mosimolodi yo mogolo wa lenyalo ebong Jehofa Modimo.