“Yaka Tau E E Dumañ”
AO DUMELA gore Satane o teng? Ba le bantsi gompieno ga ba dumele gore o teng. Go bonala fa ba leba go dumela selo se se ntseng jalo e le “selo se se ganetsang saense.” Le eleng morago kwa ka 1911, Encyclopædia Britannica e ne ya bolela jaana: “Saense e setse e tlhalositse dilo tse dintsi tse di diragalang tseo e seng tsa tlholego le tseo di diragalang mo botshelong jwa motho mo e leng gore ga go na gope mo maatla a Bosatane a tsenang teng.” Baithutabomodimo ba tlhalosa gore Satane ke letshwao fela, ke leinane. The World Book Encyclopedia e bolela jaana: “Baithutabomodimo ba le bantsi ba motlha wa segompieno ba tsaya gore Diabolo ke letshwao la maatla a bosula, jo e ka nnang nonofo e e bosula go di gaisa tsotlhe tse motho a ka nnang le tsone.”
Mme gone, boammaaruri malebana le seno ke eng? Fa e le gore o dumela mo Bibeleng, o tshwanetse wa dumela gore Satane tota o teng. Jesu ga a ka a dumela fela gore o teng mme o bile o ne a mmitsa a re ke “kgōsana ea lehatshe.” (Yohane 14:30) Moaposetoloi Paulo o ne a bitsa Satane a re ke “modimo oa lehatshe yeno.” (2 Bakorintha 4:4) Mme moaposetoloi Johane yo o neng a setse a tsofetse o ne a bolela jaana: “Lehatshe yeotlhe le namaletse ha tlhatse ga eo o boshula.”—1 Yohane 5:19.
Fa e le gore ga o dumalane le se Johane a se bolelang, a ko o akanye ka seo se diragetseng bosheng jaana. Akanya ka ditlhopha tsa masole tseo di neng di rulagantswe go bolaya le ka moo batho ba neng ba bogisiwa mo go botlhoko ka gone ke mebuso. Gakologelwa go bolawa ga batho ba bantsi ka bosetlhogo le dintwa tseo kokomana eno ya rona e di boneng. Mme go tweng ka bokebekwa jo bo maswe jo bo nnileng jwa phasaladiwa mo dipampiring tsa rona tsa dikgang—go bolawa ga batho ba le bantsi, dipetelelo, dipolao tse di sa kgaotseng, go sotliwa ga bana ka go tlhakanela dikobo le bone, fa go umakiwa di sekae fela? A ga go tshwanele gore e be e le Satane fela yo e leng modimo wa lefatshe leno?
Moaposetoloi Petere wa Mokeresete o ne a tlhagisa jaana: “Lo nnè tishō: mmaba oa lona, diabolo, o potologa yaka tau e e dumañ, a batla eo o ka mo kometsañ.” (1 Petere 5:8) Fa e ne e le gore mo tikologong e o nnang mo go yone go na le tau e e itsamaelang fela, a o ne o santse o tla botsa gore a e teng kana nnyaa? Kana a o ne o tla siana go bona mo o ka iphitlhang teng?
Nna o tlhomamisegile gore Satane tota o teng. Ga a na kutlwelobotlhoko mme o bosula thata ebile o maatla go re feta. Ka jalo, sianela go Mongwe yo o maatla le go feta gore o bone tshireletsego. “Leina ya ga Yehofa ke kagō e e godileñ e e thata: mosiami o sianèla mo go eōna, me a bolokège.” (Diane 18:10) Ikamogelele tshireletsego ya ga Jehofa Modimo, mme tlhomamisega gore go ise go e kae batho ba tla bo ba gololesegile mo tlhotlheletsong ya ene yo o bosula yoo e leng Satane. Abo go tla bo go itumedisa jang ne go kgwa mowa!—Tshenolō 20:1-3.