“Dithunya tsa Mashōma a Naga”

GO TLHOKA ditiro. Ditlhotlhwa tse di golelang pele. Lehuma. Mathata a tsa ikonomi. Mafoko ano a tlhagelela gangwe le gape mo metsweding ya dikgang. Mme a bontsha mathata ao dimilione tsa batho di leng mo go one fa ba ntse ba leka go tlamela le go apesa malapa a bone le go dira gore a nne le moo ba ka latsang tlhogo gone.

Batho ba ba dumelang le bao ba sa dumeleng ba amiwa ke seno ka tsela e e tshwanang. Lefa go le jalo bao ba dumelang ga baa tlogelwa fela ba sa thusiwe ka sepe go ka lebagana le mathata ano. Fa Jesu a ne a bua le batho ba ba dipelo di ikanyegang ba lekgolo la ntlha la dingwaga, o ile a re: “Lebañ dinōnyane tsa loapi, yaka di sa yale, le gōna di sa robe, leha e le go rorèla mo mabolokeloñ: me Rra eno oa legodimo oa di otla. Lona a ga lo tlhwatlhwa e kgolo thata bogolo go cōna?”—Mathaio 6:26.

Jesu gape o ile a re: “Akanyañ dithunya tsa mashōma a naga, kaha di golañ ka gōna: ga di dihe, ga di otlhe: Leha go nntse yalo kea lo raea, le e leñ èna Solomone, mo kgalaleloñ eotlhe ea gagwè, o na a sa kgabe yaka señwe sa cōna tseuō. Me ha Modimo o apesa yalo boyañ yoa naga, . . . a ga o ketla o apesa lona?”—Mathaio 6:28-30.

A seno se bolela gore Mokeresete ga a tlhoke go bereka gore a ke a kgone go itshedisa? Legoka! Mokeresete o dira ka natla e le gore a ke a kgone go duela dikoloto tsa gagwe. Moaposetoloi Paulo o ile a re: “Ha moñwe a gana go diha, le gōna a se ka a ya.” (2 Bathesalonia 3:10) Lefa go le jalo, Mokeresete o itse kafa Modimo o tlhokomelang ka lorato ka teng ebile o na le tumelo ya gore Rraagwe wa selegodimo o mo lebeletse. Ka gone, ga a thetheekediwe ke ditlhobaelo tsa botshelo. Le eleng mo dinakong tse di boima, o tlhoma dilo tsa botlhokwa—dilo tsa semoya—kwa pele. O dumela mafoko ano a ga Jesu: “Me batlañ pele bogosi yoa gagwè, le tshiamō wa gagwè; me dilō cotlhe tse lo tla di okelediwa.”—Mathaio 6:33.