Go Galefa Kana Boitekanelo jwa Me?
KE MANG yo a se kang a galefa? Go re diragalela rotlhe. Ka dinako tse dingwe o ka nna wa galefa ka selekanyo se se rileng mme go siame. Mme ruri, a ga go boammaaruri gore gantsi go galefa ga rona (kana selekanyo se re galefang ka sone) go a bo go sa siama?
Bibela e re bolelela jaana: “Bakèla bogale, u lesè kgakalō: u se ka ua ichwenya, ka go ichwenya go tlo go ise kwa boshuleñ.” (Pesalema 37:8) Kgakololo e e ntseng jalo e botlhale go le kana kang? A e ka ama boitekanelo jwa gago jwa mmele?
The New York Times e ne ya akgela jaana mo karolong ya yone e e buang ka “Boitekanelo”:
“Batho ba gantsi ba galefang ka bonako kana ba ba galefisiwang ke sengwe le sengwe se ba akanyang gore se a kgopisa ba ka tswa ba dira se se fetang fela go nna ba sa itumela. Ba ka tswa ba ipolaya ka bobone.
“Babatlisisi ba ile ba kgobokanya tshedimosetso e ntsi tota morago jaana e e akantshang gore go tlhola o nnetse go galefa go kotsi mo mmeleng, go tshwana fela, kana e bile go feta, go goga motsoko, go ja bobe e bile o ja dijo tse di tletseng mafura, dilo tseno di ka dira gore motho a swe ka bonako.
“‘Dilo tse re di ithutileng di supa gore go galefa o tletse bobaba, e bile le ka dilo tse o di belaelang fela go tshwana le selo sepe fela se re se itseng se se kotsi mo boitekanelong,’ go ne ga bolela jalo Dr. Redford Williams, yo o batlisisang ka melemo e e alafang malwetsi a a tsosiwang ke boitshwaro kwa Duke University Medical Center.”
Dipatlisiso di supa gore mebele ya ba ba galefang go feta selekanyo ka ntlha ya mathata a a tlwaelegileng fela a letsatsi le letsatsi e ntsha dihoromone tse di bakang go ngomoga pelo. Go galefa ga bone kgapetsakgapetsa go ka dira gore diasiti tsa mafura tse di kotsi le tse di seng kotsi di se ka tsa lekalekana sentle, go ba baya mo kotsing ya go tsenwa ke malwetsi a pelo le methapo.
Bangwe ba ka nna ba re, ‘Mme nna ke ntse jalo,’ kana, ‘Ke godile ke ntse jalo.’ Lefa go ntse jalo, seo ga se reye gore ga o ka ke wa fetoga, fa o leka ka natla go dirisa kgakololo ya Modimo. Tsaya Bibela ya gago, mme o bone kafa a gakololang ka teng ka go galefa le go shakgala jaaka go kwadilwe mo go Diane 14:29, 30; 22:24, 25; Baefesia 4:26; Yakobe 1:19, 20.
O ka tokafatsa boitekanelo jwa gago le go lelefatsa botshelo jwa gago ka go dirisa botlhale joo jwa bomodimo. Times e ne ya akgela jaana: “Babatlisisi ba bantsi ba bolela gore batho ba ba ratang go galefa ba ka fokotsa kotsi ya go swa ka bonako ka go tlogela go galefa ka bonako.”