“Di Itse Lencwe ya Gagwè”
“YEHOFA ke modisa oa me.” Ano ke mafoko a a simololang mo go Pesalema 23. Dikwalo gape di tshwantsha Jehofa Modimo le modisa mo boperofeting jwa ga Isaia jo bo bolelang jaana: “O tla hudisa lecomane ya gagwè yaka modisa; o tla phuthèla dikwanyana mo lecogoñ ya gagwè, a di gara mo sehubeñ sa gagwè, me tse di amusañ o tla di tsamaisa ka pepetleco.”—Isaia 40:11.
Ka mo go tshwanang, Jesu Keresete le ene o tshwantshanngwa le modisa. O ne a bolela jaana: “Ke nna modisa eo o molemō; modisa eo o molemō o beèla dinku botshelō yoa gagwè.” (Yohane 10:11) Jesu o ne a bolela gore “dinku di utlw[a] lencwe ya [modisa]; me a bitse tse e leñ dinku tsa gagwè ka maina, a di gōgèle kwa ntlè.” O ne a oketsa ka gore “dinku di sale [modisa] moragō; gonne di itse lencwe ya gagwè. Me moeñ èna, ga di ketla di mo sala moragō, me di tla mo tshaba: gonne ga di itse lencwe ya baeñ.”—Yohane 10:2-5.
Jehofa Modimo mmogo le Morwawe, e bong Jesu Keresete, ba ile ba dira tumalanong le se se bontshitsweng mo dikwalong tse di fa godimo. Ba tshwara dinku tsa bone tsa tshwantshetso ka tsela e e bonolo le e e lorato. Ka go dira jalo, ba sekadinku ba ikutlwa ba ratiwa, ba bolokesegile, e bile ba sireletsegile.
Kamano eno e bapisiwa thata le ya dinku tsa mmatota fa di na le modisa wa tsone. Moragonyana ka 1831, John Hartley o ne a kwala ka dilo tse a neng a di lemoga mabapi le seno. O ne a ela tlhoko gore e ne e le mokgwa wa kwa Gerika gore badisa ba reye dinku tsa bone maina. Fa nku e ne e bidiwa ka leina, e ne e tsibogela lentswe la modisa. Ka 1882, mo e ka nnang dingwaga di le 51 moragonyana, J. L. Porter o ne a lemoga dilo ka tsela e e tshwanang. O ne a bona ka namana badisa ba “goa . . . ka lentswe le le sa tlwaelegang” dinku di bo di bontsha kutlo ka go sala badisa morago. Mo go one ngwaga oo William M. Thomson o ne a kwala ka ditekeletso tse di neng di boaboelediwa mme tsa tlhomamisa gore dinku di ka rutiwa go sala modisa wa tsone morago le go lemoga lentswe la gagwe.
A kamano eno e e sa tshwaneng le epe ya badisa le dinku tsa bone e ne ya lemogiwa mo metlheng e e ka kwano ya segompieno? Ee. Mo tokololong ya September 1993 ya National Geographic, molekeledi mongwe wa kwa Australia e bong Robyn Davidson o ne a kwala se se latelang malebana le badisa ba Ba-Rabari ba ba kwa bokonebophirima jwa India: “Modisa mongwe le mongwe o na le ditsela tse a bitsang ka tsone tse di farologaneng go le gonnye, go ikaegile ka gore ke eng se a batlang se dirwa. Go na le ditsela tsa go bitsa tsa mo mosong gore dinku di tsamaye, tsela ya go bitsa e e dirang gore dinku di tle go nwa metsi, le tse dingwe fela jalo. Monna mongwe le mongwe o itse dinku tsa gagwe le tsone di a mo itse, mme letsomane le e leng la gagwe le tla itlhaola mo letsomaneng le legolo le bo le tsamaya le mo setse morago mo mosong.”
Kwantle ga pelaelo, Jesu o ne a lemoga se se ileng sa tlhalosiwa ke batsamai bano ba bane ba ba sa tswang go umakiwa. Dilo tse a di lemogileng ka namana di ne di oketsa boammaaruri jwa setshwantsho sa dinku tse di itseng lentswe la gagwe. A o nngwe ya dinku tsa ga Jesu? A o itse lentswe la gagwe e bile o a le reetsa? Fa o lemoga e bile o dumela gore dithuto tsa gagwe di boammaaruri o bo o obamela ditaolo tsa gagwe le go latela kaelo ya gagwe ya go obamela Jehofa, he o tla itumelela tsela ya go disa e e lorato le e e bonolo ya ga Jehofa Modimo le Morwawe, Jesu Keresete.—Yohane 15:10.