Nonofo ya Lefoko la Bopelonomi
“Pelo e e imetsweng ke ditlhobaelo, a bo e lapolosiwa ke lefoko la bopelonomi!”—Diane 12:25, Knox.
BAKERESETE le bone ba nna le dipitlagano. Ka dinako tse dingwe ba nna le ditlhobaelo ka ntlha ya go bo ba tshela mo ‘dipakeng tse di tlhokofatsang’ tseno.—2 Timotheo 3:1.
Fa motho a le mo pitlaganong e e ntseng jalo, a bo e le tshegofatso jang ne go utlwa tsala e e ikanyegang e bua mafoko a bopelonomi! Baebele ya re: “Tsala e rata motho ka metlha yotlhe, le morwa rra motho o tsaletswe motlha wa pitlagano.” (Diane 17:17) Monna yo o ikanyegang Jobe o ne a itsiwe e le tsala e e ntseng jalo. Le e leng Elifase o ne a bua jaana ka ga gagwe: “Mafoko a gago a emisitse yo o ne a kgokgweetsega, le mangole a a obegang o a nonotshitse.”—Jobe 4:4.
Lefa go ntse jalo, fa Jobe ka boene a ne a tlhoka go kgothadiwa, Elifase le ditsala tsa gagwe ga ba a ka ba bua mafoko a bopelonomi le ene. Ba ne ba pega Jobe molato ka ntlha ya pitlagano e a neng a le mo go yone, ba supa gore o tshwanetse a bo a dirile phoso nngwe mo sephiring. (Jobe 4:8) The Interpreter’s Bible e akgela jaana: “Seo Jobe a se tlhokang ke kutlwelobotlhoko ya batho. Se a se utlwang ke go tewa mafoko a ‘boammaaruri’ jo bo feteletseng le a a mantle tota mme a tswapogile a bodumedi le dikgakololo tse di senang bokao tsa boitsholo.” Jobe o ne a hutsafetse thata fa a ne a utlwa mafoko a ga Elifase le ditsala tsa gagwe mo a ileng a ikutlwa a patelesega go botsa a re: “Lo tlaa nna lo tshwenya mowa wa me, lo nthubaganya ka mafoko ka lobaka lo lo kae?”—Jobe 19:2.
Re se ka le ka motlha ra dira gore motlhanka wa Modimo a utlwisiwe botlhoko ke mafoko a re a buang kwantle ga go akanyetsa le kwantle ga bopelonomi. (Bapisa Duteronome 24:15.) Seane sengwe sa Baebele se re tlhagisa jaana: “Se o se buang se ka senya kana sa boloka botshelo; ka jalo o tshwanetse wa rwala molato wa mafoko a gago.”—Diane 18:21, Today’s English Version.
E re ka re lemogile nonofo eo puo e nang le yone, a re lateleng sekao sa ga moaposetoloi Paulo. Fa a na a le kwa Maketonia o ne a “ba laya thata.”—Ditiro 20:2.