Basadi mo Lefatsheng Lotlhe

FA BATHO ba ntlha ba babedi ba ne ba tsuologela Modimo, Jehofa o ne a bolelela pele ka ditlamorago tsa masetlapelo tse di neng di tla ba wela mmogo le bana ba bone. Jehofa o ne a bolelela Efa jaana: “Keletso ya gago e tlaa nna kwa monneng wa gago, mme o tlaa go laola.” (Genesise 3:16) Baebele e tlhomame fa e kgothaletsa gore basadi ba tlotliwe fela thata, mme dimilione tsa basadi di ipelela matshelo a a itumedisang, a a kgotsofatsang ka gonne bone le ba malapa a bone ba dirisa melaometheo ya Baebele.

Lefa go ntse jalo, pego nngwe ya bosheng jaana e e neng e le mabapi le ditshwanelo tsa batho e bega gore basadi ba bangwe ba le bantsi mo lefatsheng lotlhe ba tseelwa kwa tlase, ga ba tshwarwe sentle e bile ba a tlontlololwa. International Herald Tribune e bolela jaana fa e ne e akgela ka pego eno: “Pego e e begang ka dinaga di le 193 e e nang le dintlha tse di utlwisang botlhoko tota . . . e bontsha maemo a a hutsafatsang a go tlhaolwa ga basadi letsatsi le letsatsi le go ba sotla.”

Dikai di sekae fela: Kwa Afrika bogare, basetsana ba tshwanetse gore ba dire tiro e e boima thata mo dipolaseng, mme gantsi basimane ba tsena sekolo go ba feta ka makgetlho a mararo. Mo nageng e nngwe gone koo, basadi ga ba a letlelelwa kafa molaong gore ba dire boaka mme banna bone ba ka bo dira. Molao wa naga e nngwe ya mo Afrika o itshwarela monna yo o bolayang mosadi wa gagwe fa a tshwerwe a ne a dira boaka, mme molao ga o itshwarele mosadi yo o bolayang monna wa gagwe yo o dirang molato o o tshwanang.

Pego eno e bega gore mo dikgaolong tsa Amerika Borwa, mapodise ga a utlwele botlhoko basadi ba ba itewang ka tsela e e setlhogo. Mme basadi ba ba berekang gantsi ba tshwanelwa ke gore ba itshedise ka dituelo tse di kwa tlase ga tsa banna ka 30 go ya go 40 lekgolong.

Mo dikgaolong tsa Asia, basadi ba patelediwa gore ba tswale popelo le gore ba senye dimpa. Kwa nageng e nngwe, go na le basadi ba diaka ba ba ka nnang 500 000, ba le bantsi mo go bone ba ile ba rekisediwa tiro eno ke batsadi ba ba batlang madi a a ka ba thusang gore ba ithekele matlo a masha. Mo nageng e nngwe, mapodise a tshwanetse gore a itshokele go anama ga “dintsho tsa bogadi”—mo mosadi a bolaiwang ke monna wa gagwe kana ba lelapa la bomonna ka gonne bogadi jwa gagwe bo ne bo le bonnye go gaisa jaaka ba ne ba lebeletse.

Baebele e re tlhomamisetsa jaana malebana le Jesu Keresete: “O tlaa golola motlhoki mogang o lelang; le mohumanegi yo o se nang mothusi. O tlaa tlhomogela bahumanegi le batlhoki pelo; mme mewa ya batlhoki o tlaa e boloka. O tlaa golola mewa ya bone mo pogisong le mo thubakong; mme madi a bone a tlaa tlotlega mo matlhong a gagwe.” (Pesalema 72:12-14) Ka jalo re na le lebaka la gore re nne le tsholofelo; basadi mo lefatsheng lotlhe ba ka lebelela kwa pele go tla go bona maemo a a tokafaditsweng a a tla nnang gone mo nakong eo.