Buka ya ga Irina ya Dipina E a E Ratang Thata

BOSHENG jaana, Irina, mosetsanyana wa dingwaga tse robonngwe wa kwa Sofia, kwa Bulgaria, o ne a kolobediwa go nna mongwe wa Basupi ba ga Jehofa. O ne a rata go opela thata, segolobogolo a rata dipina tse di mo bukeng ya Opelelang Jehofa Dipako. Ka jalo Irina o ne a ipeela mokgele wa gore kgwedi nngwe le nngwe a ithute dipina di le mmalwa gore a di itse ka tlhogo.

Sengwe sa dithuto tse Irina a di ratang thata kwa sekolong ke mmino. Ka jalo morutabana wa gagwe o ne a gamarega fa Irina a ne a gana fa a ne a mo abela gore a opele mo khwaereng ya sekolo. Mme ke ka ntlha yang fa Irina a ne a gana? O ne a lemogile gore bontsi jwa dipina tseo a neng a tla tshwanela go di opela di ne di galaletsa bagaka ba bosetšhaba le malatsi a boikhutso a a simolotsweng ke baheitane. Tota e bile dingwe tsa dipina tseo di ne di buelela botsuolodi le thubakanyo e le go tsweledisa pele maikaelelo a setšhaba. Morutabana ga a ka a kgona go tlhaloganya boemo jwa ga Irina mo kgannyeng eno. Irina o ne a bona gore selo se se ka mo thusang ke go kwalela morutabana wa gagwe lekwalo go mo tlhalosetsa ka dilo tseo a di dumelang mo bodumeding jwa gagwe—mme ga a ka a atlega.

Rraagwe Irina o ne a nna le leano. O ne a naya morutabana sekaelo sa buka ya Opelelang Jehofa Dipako, e e nang le dipina tseo Irina a neng a rata go di opela. Morago ga malatsinyana a le mmalwa, morutabana o ne a biletsa Irina kwa phaposing ya mmino. O ne a kopa Irina gore a opele dipina dingwe tseo a neng a di rata thata mo bukeng e—mme a dira seo fa pele ga balekane ba gagwe ba mo tlelaseng—fa morutabana ene a letsa piano. Tiragalo eo e ne ya tsaya sebaka sa ura! Morutabana o ne a tshwanela go dumela gore buka ya ga Irina ya dipina e a neng a e rata e ne e na le mmino o o monate thata.