Go Diragadiwa ga Boporofeti Jwa Baebele

KWA Lontone kwa Imperial War Museum kwa Engelane go beilwe tshupanako e e tlhomologileng e e nang le motšhininyana wa dinomoro wa eleketoroniki. Fa nako e ntse e tsamaya, motšhininyana ono o ne o itaya metsotswana mengwe le mengwe e le 3,31. Nako le nako fa o itaya nomoro e nngwe e kopanngwa mo palokakaretsong. Go itaya gongwe le gongwe ga motšhininyana ono le nomoro nngwe le nngwe ya one go emela monna, mosadi, kana ngwana yo o ileng a bolawa ke ntwa mo lekgolong leno la dingwaga.

Motšhininyana ono o ile wa simolola go bala ka June 1989 mme go lebeletswe gore le fetse go bala bosigogare letsatsi pele ga ngwaga wa 2000. Ka nako eo palo e e tla bong e le mo motšhininyaneng ono e tla bo e supa dimilione tse di lekgolo—e leng palo e go phopholediwang gore ke ya dintsho tse di amanang le dintwa mo lekgolong leno lotlhe la bo20 la dingwaga.

Mo e ka nnang dingwaga di le 2 000 tse di fetileng, Jesu Keresete o ne a bolelela pele ka nako ya fa ‘morafe o tla tsogolegela morafe mme bogosi bo tsogologele bogosi.’ Tumalanong le seo, Basupi ba ga Jehofa ga ba bolo go rera gore dintwa tse di senyang tsa lekgolo leno la dingwaga, le dithoromo tse dintsi tsa lefatshe, malwetse, go tlhaela ga dijo, le ditiragalo tse dingwe, tsotlhe di neela bosupi jwa gore re tshela mo “metlheng ya bofelo”—ya morago ga fa Keresete a sena go tlhomiwa jaaka Kgosi kwa legodimong ka ngwaga wa 1914.—Luke 21:10, 11; 2 Timotheo 3:1.

Tora ya Tebelo e e kaelwang ke Baebele, e itsise mafoko a a molemo a gore Bogosi jwa Modimo bo tla tloga bo nyeletsa bagateledi mme bo bo bo fetola lefatshe go nna paradaise. Baebele e bolela jaana: “Tlang, lo bone ditiro tsa ga Jehofa, e bong ditšhwafatso tse o di dirileng mo lefatsheng. O khutlisa ditlhabano le kwa bokhutlong jwa lefatshe; o roba bora, o putlaganya lerumo ka bogare; o fisa dikara tsa tlhabano mo molelong.”—Pesalema 46:8, 9.

[Motswedi wa Setshwantsho mo go tsebe 32]

Clock: By Courtesy of the Imperial War Museum