“Jehofa O ne A Araba Dithapelo Tsa Me!”

BASUPI BA GA JEHOFA mo lefatsheng lotlhe ba tshwara dithuto tsa Baebele tsa magae tse di ka tshwarang dimilione di le tlhano le batho ba ba kgatlhegelang go bona kitso e e tlhomameng ka Modimo le maikaelelo a gagwe a a itumedisang ka batho. Tota le bana ba e leng Basupi ba ga Jehofa ba nna le seabe mo tirong eno. Ka sekai, akanya ka mosimane mongwe yo o bidiwang Joel. O ne a supa boineelo jwa gagwe mo go Jehofa mme a kolobediwa a le dingwaga di le robongwe. Ngwaga morago ga foo o ne a nna le boitemogelo jono:

“Fa ke ntse ke le mo bodireding, ke ne ka kopana le mosadi mongwe yo o bidiwang Candy. Ke ne ka mo tsamaisetsa boroutšhara jwa ‘Bonañ Dilō Cotlhe Ke Di Diha Sesha.’ O ne a setse a na le jone mme ka gone ka bo ke mo tsamaisetsa buka ya O Ka Tshelela Ruri mo Lefatsheng la Paradaise. Le yone o ne a setse a na le yone. Ke ne ka akanya he gore ‘ke tla buelela thuto ya Baebele mo mosading yono.’ O ne a dumela!

“Morwadiarraagwe Candy yo o neng a tshwerwe ke bolwetse jwa kankere, o ne a tla go nna le ene. Mo godimo ga moo, Candy o ne a ithutela go nna mooki. Ka jalo, ka nakwana, thuto ya Baebele e ne ya emisiwa. Mme lefa go ntse jalo, nna le batsadi ba me re ne ra nna re ikgolaganya le ene ka go mo tlogelela dimakasine kana go di tlogelela monna wa gagwe e bong Dick. O ne a re bolelela gore o ne a baya dimakasine fa thoko ga bolao jwa gagwe a bo a di bala bosigo.

“Kgabagare, morwadiarraagwe Candy o ne a swa. Nna le Rre le Mme re ne ra bua le Candy ka boemo jwa baswi. O ne a swetsa go ithuta Baebele gape. Ka letsatsi le lengwe, re ne ra botsa Dick gore a o ne a ka se rate go ithuta le Candy mme ba dire thuto ya lelapa. O ne a akanya gore ke mogopolo o montle. Jaanong, nna le Rre re ithuta le Dick le Candy. Ba gatela pele sentle mme ba bolela fa ba itumelela thuto ya Baebele.

“Ke ne ke ntse ke rapelela thuto ya Baebele mme Jehofa o ne a araba dithapelo tsa me!”