Di Baka Mmopi wa Tsone Kwantle ga Lefoko

GO PHIRIMA ga letsatsi ke selo se sentle ka tlholego fela. Mme go bona letsatsi le wela ka fa morago ga thaba ya Apuan Alps kwa Tuscany, kwa Italy, go ka se bapisiwe le sepe.

Fa o leba o le kgakala, go bonala letsatsi le wela mo teng ga thaba go na le gore le wele ka fa morago ga yone. Ka ntlha yang? Ka gonne setlhoa sa thaba eno ka bosone se na le lephago le e keteng le gabilwe go tswa mo thabeng. Eleruri, setlhoa seno se tshwanela leina la sone, Monte Forato—Thaba e e Phuntsweng. Ka ntlha ya go dikologa letsatsi ga lefatshe, batho ba ba lebileng go tswa mo lephagong ba ka kgona go bona letsatsi le bonala le wela mo teng ga Monte Forato ka makgetlho a le mabedi fela ngwaga nngwe le nngwe.

Jaaka dikarolo tse dingwe tsa popo, magodimo a a didimetseng a baka Mmopi wa one. Jang? Fela jaaka setshwantsho se se takilweng se ka dira gore motaki wa sone a bakiwe. Tota e bile, dipopego tsa magodimo di bolela ka maatla, botlhale le bogolo jwa ga Jehofa. Jaaka mopesalema a tlhalosa, “magodimo a bolela kgalalelo ya Modimo; phuthologo le yone e supa tiro ya diatla tsa one.” (Pesalema 19:1; 69:34) E re ka letsatsi le dilo tse dingwe tse di sa tsheleng di baka Mmopi wa tsone, a bo rona re tshwanetse go mmaka thata jang ne!—Pesalema 148:1, 3, 12, 13.