Ditiro Tse Dintle di Galaletsa Modimo

BATHO ba ba ratang Modimo ba leka go phatsimisa lesedi la semoya go tswa mo Lefokong la gagwe e leng Baebele. Ka tsela eno ba latela taelo eno ya ga Jesu: “A lesedi la lona le phatsime fa pele ga batho, gore ba tle ba bone ditiro tsa lona tse di molemomogolo mme ba neye Rraalona yo o kwa magodimong kgalalelo.” (Mathaio 5:16) Puo le boitshwaro jo bo siameng di ka galaletsa Modimo.

Basupi ba ga Jehofa ba batla go itumedisa Modimo ka go itshwara go dumalana le Baebele le ka go leka go thusa ba bangwe mo semoyeng. Ba dira jalo tota le mo dinageng tse bodiredi jwa bone jwa phatlalatsa bo iseng bo kwadisiwe kafa molaong. Mo motsemoshateng wa nngwe ya dinaga tseno, Basupi ba ntse ba tshwara dikopano tse dikgolo tsa ngwaga le ngwaga tse go yang batho ba ka nna go tloga go 6 000 go ya go 9 000. Gore ba nne le dikokoano tse di ntseng jalo, ba ile ba hira diholo mo dikagong tse go tshwarelwang ditshupo mo go tsone. Fela jaaka ba ne ba ntse ba dira mo dingwageng tse di fetileng, pele ga kopano ya bone e kgolo ka 1999, Basupi ba ba makgolokgolo ba ile ba dira ka natla go phepafatsa mafelo ao le go tsenya thulaganyo ya digodisamantswe le ditulo tse dintsintsi.

Dipaakanyetso tseno tsotlhe di ile tsa elwa tlhoko. Batsamaisi ba dikago tseno ba ne ba ela ditiro tseno tlhoko. Gape ba ile ba bona gore le mororo go ne go na le tlhora ya batho ba le 15 666 ba ba neng ba le teng, sengwe le sengwe se ne se tsamaya ka tolamo le gore Basupi ba ne ba na le thulaganyo tota. Badiri ba ne ba kgatlhwa le ke tsela e go ileng ga phepafadiwa ka botlalo ka yone morago ga foo.

Batsamaisi ba ile ba bontsha go anaanela seno sotlhe ka go tsenya Basupi kwa pele mo lenaaneng gore ba bone tshono ya ntlha go hira kago eo ngwaga o o latelang. Mme batsamaisi bano ba ne ba dira se se fetang seo. Ka July 15, 1999, ba ne ba naya komiti ya kopano mpho ya kanaanelo. Mo letlapeng leo la segopodiso go ne go gabilwe mafoko a a reng “phuthego ya Basupi ba ga Jehofa”—sengwe se se neng se sa lebelelwa mo nageng e tiro ya bone ya go ruta ka Baebele e thibetsweng mo go yone.

Go ralala lefatshe lotlhe ka 2000/2001, go lebeletswe gore dimilione di nne teng kwa Dikopanong Tsa Kgaolo Tsa Basupi ba ga Jehofa tse di makgolokgolo tsa “Badiri ba Lefoko la Modimo.” Ka go nna teng o ka iponela ka bowena kafa batho ba ba dirang se se bolelwang mo Baebeleng ka tlhoafalo ba dirang ditiro tse di molemo tse di tlisetsang Modimo kgalalelo ka gone.