‘O Tshwana le Leje la Botlhokwatlhokwa la Mmala o Mohibidu’

MOAPOSETOLOI Johane o ne a bona ponatshegelo ya setulo sa bogosi se se galalelang kwa legodimong. Yo o neng a ntse mo setulong sa bogosi o ne a tshwana “le leje la jasepere.” Gape o ne a tshwana le “leje la botlhokwatlhokwa la mmala o mohibidu.” (Tshenolo 4:2, 3) E ne e le maje a mofuta ofe ano?

Ano e ne e se maje a a sa bonaletseng a a phatsimang fela fa godimo. Mo metlheng ya bogologolo, lefoko la Segerika le le ranotsweng ka go re “jasepere” le ne le dirisiwa go tlhalosa maje a mebala e e farologaneng, go akaretsa majana a a tlhokegang a a bonaletsang. “Leje la jasepere” la Tshenolo 4:3 “tota [e ne e se] leje la jasepere la gompieno la tlhwatlhwa e e kwa tlase,” go bolela jalo A. T. Robertson mo bukeng ya gagwe ya Word Pictures in the New Testament. Mo godimo ga moo, moragonyana mo bukeng ya Tshenolo, Johane o tlhalosa motse wa selegodimo, e bong Jerusalema, a re: “Phatsimo ya one e ne e tshwana le leje le le tlhokegang thata go a gaisa otlhe, jaaka leje la jasepere le phatsima mo le galalelang jaaka legweka.” (Tshenolo 21:10, 11) Go bonala maje a Johane a buang ka one e ne e le a a bonaletsang.

Yo a tlhalosiwang a ntse mo setulong sa bogosi mo ponatshegelong ya ga Johane ke Motho yo o galalelang go gaisa botlhe mo lobopong, e bong Jehofa Modimo. O itshekile e bile o boitshepo go feta ope o sele. Go dumalana le seo, moaposetoloi Johane o ne a kwala jaana: “Modimo ke lesedi mme ga go na lefifi ka gope seoposengweng le ene.” (1 Johane 1:5) Ka jalo, Johane o ne a rotloetsa badumedikaene go ‘iitshekisa fela jaaka Jehofa a itshekile.’—1 Johane 3:3.

Re tshwanetse go dira eng gore Modimo a re lebe re itshekile? Go botlhokwa thata gore re nne le tumelo mo mading a a tshologileng a ga Keresete gore re itshwarelwe maleo. Gape re tshwanetse go tswelela re “tsamaya mo leseding” ka go ithuta Baebele ka metlha le go tshela go dumalana le se e se rutang.—1 Johane 1:7.