Motho yo o Nang le Dingwaga di le Lekgolo yo o Nang le Boikaelelo mo Botshelong
ELIN ke mongwe wa batho ba le 60 kwa Sweden ba bosheng jaana ba neng ba tsenngwa mo lenaaneng la gore ba na le dingwaga di le 105 kgotsa go feta. Ene ka boene o na le dingwaga di le 105. Le fa a sa kgone go tswa mo ntlong ya batho ba ba godileng, botsogo jwa gagwe bo mo letla gore a tswelele pele e le Mosupi yo o tlhoafetseng wa ga Jehofa, tsela ya botshelo e a neng a e tlhopha dingwaga tse di fetang 60 tse di fetileng.
Fa Elin a rerela ba bangwe, o latela sekao se se neng sa tlhomiwa ke moaposetoloi Paulo fa a ne a tswaletswe mo ntlong ya gagwe a disitswe, a sa kgone go tswa mo ntlong. Paulo o ne a rerela batho botlhe ba ba neng ba mo etela. (Ditiro 28:16, 30, 31) Ka tsela e e tshwanang, Elin o dirisa sebaka sengwe le sengwe go bua le batho ba ba phepafatsang, dingaka tsa meno, dingaka, batho ba ba baakanyang meriri, baoki le ba bangwe ba a kopanang le bone mo legaeng la batsofe, a ba bolelela dikgang tse di molemo tse di mo Baebeleng. Gangwe le gape, badumedi ka ene mo phuthegong ya gaabo Elin ba laletsa diithuti tsa bone tsa Baebele go mo etela gore ba solegelwe molemo ke kitso le boitemogelo jwa gagwe.
Maloko a phuthego ya gaabo Elin a rata botho jwa gagwe le go rata go itse dilo ga gagwe. Mosupi ka ene a re: “O na le bokgoni jo bo gakgamatsang jwa go itse se se diregang mo phuthegong. O gakologelwa maina a bana botlhe le a batho ba ba sa tswang go fudugela mo phuthegong.” Gape Elin o itsege thata ka moya wa go amogela baeng, go dira metlae le go leba botshelo ka tsela e e siameng.
Ke eng se se thusang Elin go nna a itumetse le go nna a tlhomile mogopolo mo go se a se tshelelang? O bala temana ya Baebele letsatsi le letsatsi mo bukaneng ya Go Tlhatlhoba Dikwalo ka Malatsi Otlhe, e e gatisitsweng ke Basupi ba ga Jehofa. Gape o bala karolo nngwe ya Baebele letsatsi le letsatsi, a thusiwa ke go dirisa galase e e godisang ditlhaka. Elin o baakanyetsa dipokano tsa beke le beke tsa Basupi ba ga Jehofa, mme le fa a sa kgone go ya kwa go tsone, o reetsa dikhasete tsa dipokano tseno. Go bala Baebele ka metlha le dikgatiso tse di theilweng mo Baebeleng le go se latlhegelwe ke dipokano tsa Bokeresete go ka re thusa go tshela botshelo jo bo kgotsofatsang le jo bo nang le boikaelelo go sa kgathalesege dingwaga tsa rona.—Pesalema 1:2; Bahebera 10:24, 25.