Balebedi ba ba Etelelang Pele—Molebedi wa Sekolo sa Bodiredi sa Puso ya Modimo
1 Molebedi wa Sekolo sa Bodiredi sa Puso ya Modimo ke monna yo o godileng semoyeng yo o dirang ka natla mo go bueng le mo go ruteng, yo o tshwanelwang ke gore re mo tlotle le go dirisana mmogo le ene. (1 Tim. 5:17) Maikarabelo a gagwe ke eng?
2 Ke ene yo o tlhokomelang laeborari ya Sekolo sa Bodiredi sa Puso ya Modimo e e leng kwa Holong ya Bogosi. O kgatlhegela thata go kgothatsa botlhe ba ba tshwanelegang go ikwadisa mo sekolong. O tlhokomela gore o boloka rekoto e e tshwanetseng e le gore a dire dikabelo ka mokgwa o o rulagantsweng sentle bobotlana dibeke di le tharo pele ga sekolo sengwe le sengwe. O tlhoka go itse phuthego sentle, a akantse ka moithuti mongwe le mongwe le ka bokgoni jwa gagwe. Le fa gone a ka nna a kopa gore mokaulengwe yo mongwe a mo thuse go rulaganya sekolo, ke molebedi wa sekolo ka namana yo o tshwanetseng go okamela dilo le go abela batho dipuo ka tsela e e tshwanetseng.
3 E le gore molebedi a rute sentle mo sekolong, o tshwanetse go baakanyetsa sentle beke nngwe le nngwe, a ithute tshedimosetso e e abilweng ka kelotlhoko. Seno se mo thusa gore a dire gore phuthego e nne e tlhagafaletse thulaganyo e e ithutiwang, gore a bone gore a tshedimosetso e e abilweng e neelwa sentle le gore a tlhomolole dintlha tse di botlhokwa tse di tla akarediwang mo ditlhatlhobong tse di kwalwang.
4 Morago ga puo nngwe le nngwe ya moithuti, molebedi o tla akgola moithuti le go tlhalosa lebaka la go bo karolo nngwe ya puo e ne e le molemo kana lebaka la go bo a tlhoka go tokafatsa mo go nngwe. Fa go na le mongwe yo o tlhokang kaelo e e oketsegileng gore a baakanyetse dikabelo tsa gagwe tsa sekolo, molebedi kana mongwe yo o tlhomilweng ke ene a ka nna a mo thusa ka tsela eo.
5 E le gore re ka solegelwa molemo ke go dira ka natla ga molebedi wa Sekolo sa Bodiredi sa Puso ya Modimo le bagakolodi ba bangwe ba ba kaelwang ke ene, re tshwanetse go nna teng ka metlha kwa sekolong. Gape re tshwanetse go neela dikabelo tsotlhe tsa rona le go dirisa kgakololo e re e newang le e e newang baithuti ba bangwe. Ka tsela eno, re tla nna re tokafatsa bokgoni jwa rona jwa go neela molaetsa wa Bogosi phatlalatsa le ka ntlo le ntlo.—Dit. 20:20; 1 Tim. 4:13, 15.