Batlhanka ba Bodiredi ba Dira Tiro e e Botlhokwatlhokwa
1 “Ba ile ba itshupa fa ba le banna ba ba ineetseng eleruri bao tumelo ya bone e ileng ya bonadiwa mo tirelong e e tlhoafetseng ya Bogosi le mo go thuseng ba bangwe go nitamisiwa mo tumelong.” Go rialo Re Rulaganyeditswe go Swetsa Bodihedi jwa Rona, mo go tsebe 57, fa e bua ka batlhanka ba bodiredi. Eleruri sekao sa semoya se se tlhomiwang ke batlhanka ba rona ba bodiredi se tshwanelwa ke go etsiwa. Go dirisana mmogo le bone le bagolwane go “direla kgolo ya mmele gore o ikage mo loratong.”—Baef. 4:16.
2 Batlhanka ba bodiredi ba dira ditiro tsa botlhokwa mo phuthegong. Akanya ka ditirelo tsotlhe tsa bone tse di botlhokwatlhokwa! Ba tlhokomela diakhaonto, dibuka, dimakasine, dipeeletso le ditshimo; ba dira jaaka batlhokomedi, ba tlhokomela digodisa mantswe, le go thusa go tlhokomela Holo ya Bogosi. Ba nna le seabe mo Sekolong sa Bodiredi sa Puso ya Modimo le Pokano ya Tirelo. E bile bangwe ba bone ba neela dipuo tsa phatlalatsa kana ba tshwara dingwe tsa dipokano tsa phuthego. Jaaka maloko a mmele wa nama, batlhanka ba bodiredi ba dira ditiro tse re di tlhokang.—1 Bakor. 12:12-26.
3 Go bona batlhanka ba bodiredi ba dirisana mmogo ka kutlwano le bagolwane jaaka karolo ya setlhopha se le sengwe sa motlhanka, ba tlotlana e bile ba tlhaloganyana, go dira gore ba bangwe le bone ba dire fela jalo. (Bakol. 2:19) Ka go diragatsa maikarabelo a bone ka boikanyego beke le beke le ka go bontsha gore ba kgatlhegela batho ba bangwe, ba thusa go dira gore phuthego e gole sentle semoyeng.
4 Re ka dirang go supa gore re anaanela batlhanka bano ba bodiredi ba ba dirang ka thata? Re tshwanetse go tlwaelana le ditiro tse ba di abetsweng mme re supe gore re iketleeditse go dirisana mmogo le bone fa ba tlhoka gore re ba thuse. Ka mafoko kana ka ditiro, re ka dira gore ba itse gore tiro ya bone e a anaanelwa. (Dia. 15:23) Bao ba dirang ka natla mo boemong jwa rona ba tshwanelwa ke go anaanelwa go tswa pelong.—1 Bathes. 5:12, 13.
5 Lefoko la Modimo le bolela ditiro tsa batlhanka ba bodiredi le ditshwanelego tsa bone. (1 Tim. 3:8-10, 12, 13) Tirelo ya bone e e botlhokwatlhokwa e e boitshepo e a tlhokega go dira gore phuthego e tswelele sentle. Banna ba ba ntseng jalo ba tshwanelwa ke gore re ba kgothatse ka metlha, fa botlhe ba ntse ba na le “mo gontsi go go dira mo tirong ya Morena.”—1 Bakor. 15:58.